தமிழ் விக்கிப்பீடியா

பிரித்தானியப் பாரம்பரியத் தொழிற்கலைகள்

2011-12-08T21:01:00.000-08:00

பாரம்பரியத் தொழிகலை இழப்பு என்பது தமிழர்களுக்கு மட்டும் உரிய ஒரு சிக்கல் அல்ல. பிரித்தானியாவிலும் கூட இது ஒரு சிக்கல் என்று அடையாளம் காணப்பட்டுள்ளது.

பிரித்தானியாவின் தொழிற் புரட்சிக்கு அங்கு விருத்தி பெற்ற பாரம்பரியத் தொழிற்கலைகள் ஒரு முக்கிய மூலவேராக இருந்தன. இந்த தொழிற்கலைகளைப் பாதுகாக்கும் வண்ணம் பாரம்பரியத் கைத்தொழில்கள் அமைப்பு (http://www.heritagecrafts.org.uk) மற்றும் பிற நூற்றுக்கணக்கான அமைப்புக்களும் (http://www.heritagecrafts.org.uk/index.php/about/friends-and-affiliated-groups, http://www.worldskillslondon2011.com/) தனிநபர்களும் (http://traditionalcraftsblog.blogspot.com, http://greenwood-carving.blogspot.com, http://nicolawood-design.blogspot.com/p/projects.html) பல்வேறு செயற்திட்டங்களில் ஈடுபட்டு வருகிறார்கள். இதன் முக்கியத்துவத்தை உணர்ந்த பிரித்தானிய அமைச்சர் யோன் கெயின்சு இந்தப் பாரம்பரிக் கலைகளை ஆய்வு (http://www.ccskills.org.uk/LinkClick.aspx?fileticket=6cMoZSIdVOA=&tabid=81) செய்வதற்காக ஒரு பெரும் தொகை பணத்தை ஒதுக்கி உள்ளார். இந்தப் பாரம்பரியக் கலைகளை ஊக்குவிப்பதன் மூலம் நவீன பொருளாரத்தின் ஒரு முக்கிய கூறாகவும் இவற்றைப் பயன்படுத்தலாம் என்பதை அவரின் செயற்பாடுகள் உணர்த்துகின்றன.

வில்வித்தை, எழுத்துக்கலை போன்றவை நவீன பொருளாதாரத்துக்கு பயன்படாமல் கூடப் போகலாம். ஆனால் அவற்றில் ஒரு இயல்பான நிறைவு கிடைக்கிறது. இசைக் கருவியைப் வாசிப்பது போன்று இந்தக் கலைகளைப் பயில்வதிலும் செய்வதிலும் மகிழ்ச்சி கிடைக்கிறது. இதற்காகவாவது இக் கலைகளைப் பாதுகாப்பது முக்கியம் ஆகிறது.

தமிழ்ச் சூழலைப் பொருத்த வரையில் அரசுகள் இந்த மாதிரி தொலைநோக்கான செயற்பாடுகளில் ஈடுபடும் என்று எதிர்பார்க்க முடியாது. எமது தேவைகளை உணரக் கூடிய, தொலைநோக்கான அரசுகளை அமைக்க நாம் தவறிவிட்டோம். எனவே இந்த மாதிரி முன்னெடுப்புக்களை தனிநபர்களும், தன்னார்வலர் அமைப்புக்களுமே முன்னெடுக்க வேண்டிய அவசியம் உள்ளது.

எழுதப்படாத அறிவு

2011-12-08T19:25:00.000-08:00

கருவியில், ஓவியத்தில், சிலையில், கட்டிடத்தில், கைவேலைப்பொருளில், நிகழ்த்தலில், செயலாக்கங்களில், நுணுக்கங்களில் நிறைந்துகிடைக்கிறது எமது அறிவு. ஓர் எண்ணத்தை வெளிப்படுத்த, அடுத்த தலைமுறைக்கு எடுத்துச் செல்ல எழுத்து என்பது ஒரு வழிமுறை மட்டுமே. இன்னும் பல வழிமுறைகள் உள்ளன.

உளவியலின் பல் அறிவுகள் கோட்பாட்டின் படி எழுத்தறிவை அல்லது மொழியறிவை விட வேறு பல அறிவுகள் உள்ளன. உடல்சார் அறிவு, இசை அறிவு, அக அறிவு, காட்சி அல்லது இடம்சார் அறிவு (spatial intelligence), மனிதத் தொடர்பாடல் அறிவு, இயற்கை அறிவு இருத்தலியல் அறிவு என்று பல்வேறு அறிவுகள் மனிதருக்கு உள்ளன. வெவ்வேறு நபர்கள் வெவ்வேறு அறிவுகளில் கூடிய ஆற்றல்களையும் பிறவற்றில் குறைந்த ஆற்றல்களையும் பெற்று இருப்பர். இந்த அறிவுகள் எல்லாவற்றையும் நாம் எழுத்து மூலம் முழுமையாக வெளிப்படுத்த முடியாது.

ஆடல்காரருக்கு, நடிகருக்கு, அறுவைச் சிகிச்சை நிபுணருக்கு, விளையாட்டு வீரருக்கு உடல் அறிவு முக்கியம் பெறுகிறது. நாம் எவ்வளவுதான் ஓர் ஆடலை எழுத்தில் விபரித்தாலும் அந்த ஆடலை காண்பதற்கு இணையாகாது.

ஓவியருக்கு, வடிவமைப்பாளருக்கு, கட்டிடக்கலைஞருக்கு இடம்சார் அல்லது காட்சியறிவு முக்கியம் பெறுகிறது. ஆயிரம் சொற்களுக்கு ஒரு படம் இணையானது என்பது ஒரு பழமொழி. வட்டத்தை வரையறை செய்து விளக்குவதிலும் பார்க்க படத்தைக் கீறி, இது வட்டம் என்று கூறுவது மிக எளிதானது. ஒருவரின் சிந்தனைத் திறனை விரித்து புது இயல்புகளை கற்பனை செய்ய அல்லது வடிவமைக்க இந்த அறிவு பயன்படுகிறது. இவ்வாறே பல்வேறு அறிவுகள் பல்வேறு வழிகளில் முக்கியம் பெறுகின்றன.

தமிழிலே நுட்பங்கள் பற்றி விரிவான தகவல்கள் எதுவும் எழுதப்படவில்லையெனினும் நாம் அவர்கள் விட்டுச் சென்ற தொல்பொருட்களில் இருந்தும், இன்றும் எம்மிடம் தலைமுறை தலைமுறையாக வழங்கும் கலைகளில் இருந்தும் அவற்றைப் பற்றி ஓரளவு அறிந்துகொள்ள முடிகிறது. இந்தக் கலைகள் அழியவிடுவது என்பது எமது பல் அறிவுகளை அழியவிடுவது என்பதாகும். இதில் இருந்து நாம் மீளலாம், எமது அறிவுகளை மீட்டெக்கலாம், மீளுருவாக்கலாம், பேணலாம், புத்தாக்கம் செய்யலாம்.

எழுத்தைத் தாண்டி படங்களாக, ஒலிக் கோப்புக்களாக, நிகழ்படங்களாக, பல்லூடகப் பதிவுகளாக, பொருட்களாக, நிகழ்கலைகளாக நாம் இவற்றை ஆவணப்படுத்தல் காலத்தின் தேவை ஆகும். அதன் ஒரு சிறு முயற்சியான தமிழ் விக்கி ஊடகப் போட்டியில் உங்கள் பங்களிப்பை நல்கிடுவீர்.

எமது தொழிற்கலைகளை பேணுதல், ஆவணப்படுத்தல், புத்தாக்கல்

2011-11-26T19:42:00.000-08:00

எமது வாழ்வாதாரமாக விளங்கும் எமது தொழிற்கலைகளை நாம் தகுந்த மதிப்புத் தந்துப் பேணவில்லை, அவற்றில் புத்தாக்கம் செய்யவில்லை. மாற்றாக தொழில்களில் ஏற்றம் இறக்கம் காட்டி திறமைகளை சிறுமைப்படுத்தினோம். தொகை தொகையாக இலக்கியம் படைத்த தமிழ்ச் சமூகம், ஒரு சில தொழிற்கலை ஆவணங்களைத் தானும் உருவாக்க வில்லை. இப்போ, அந்தக் கலைகள் எல்லாம் காலவதியாகி விட்டன. அவற்றால் ஒரு பயனும் இல்லை. எனவே அவை அழிவதே இயல்பு என்ற மனநிலைக்கு தள்ளப்பட்டு விட்டோம்.

அந்தக் கலைகள் எல்லாம் காலவதியாகி விட்டன என்பது ஒரு பெரும் பொய். இன்றும் இன்னும் பல மில்லியன் தமிழர்கள் கலப்பையால் உழுத அல்லது கையால் நாத்து நடப்பட்ட அரிசியையே உண்ணுகிறார்கள். இன்றும் இன்னும் பல்லாயிரக்கணக்காண தமிழர்கள் கரைவலையால் இழுக்கப்பட்ட மீன்களையே உண்ணுகிறார்கள். இன்றும் இன்னும் உள்ளூரில் மரவேலைக்கலை உயிர்ப்புடன் இருக்கிறது. உலோகக் கலை, நெசவுக்கலை, கட்டிடக்கலை, பல்வேறு கைத்தொழில்கள் என்று பல தொழிற்கலைகள் இன்றும் இன்னும் எமக்கு வாழ்வாதரமாக இருக்கின்றன. இவை வாழ்வாதரம் மட்டும் அல்ல எமது அடையாளமும் கூட. ஆனால் நாம் இவற்றைப் பேணுவது பற்றியோ, ஆவணப்படுத்துவது பற்றியோ சற்றும் அக்கறை அற்றவர்களாகவே இருக்கிறோம்.

நாம் ஏன் இவற்றை மதிப்பதில்லை. யேர்மனியர்களைப் போல், யப்பானிர்களைப் போல் நாம் ஏன் தொழிற்கலைகளை, தொழிற் கலைஞர்களை மதிப்பதில்லை. சாதியம் எம்மீது நடத்திய அட்டூளியத்தின் பாதிப்பா. அல்லது உலகமயமாதலால் நாம் எல்லோரும் முதலாளிகள் ஆகிவிடலாம் என்ற மாயையாலா. அலுவலக வேலை உயர்ந்தது, கைத்திறன் வேலை தாழ்தந்து என்ற எமது போலிச் சமூகச் சட்டகமா. இந்த மனநிலையின் அபத்தத்தை புகலிட நாடுகளில் இன்னும் விகாரமாகப் பார்க்கலாம். அங்கு சராசரி அலுவலக ஊழியரை விட சாராசரி தொற்கலைஞர், ஒர் இயந்திரவியலாளர், ஒரு கட்டுமானக் கலைஞர், ஒரு மரவேலைக்காரர் அதிக ஊழியம் பெறுகிறார். ஆனால் எமது சமூகத்தில் இந்தத் தொழிகளுக்கு மதிப்பு இல்லை.

இந்தியாவிலும், இலங்கையிலும் தமிழர் நிலப்பரப்புக்களில் பெரும்பகுதி கடற்கரையை அண்டியவை. அதனால் இயல்பாக மீன்பிடிப்பு மற்றும் கடற்தொழில்களில் தமிழர்கள் அதிகம் ஈடுபட்டுவந்துள்ளார்கள். கடல் பற்றிய அறிவு, அதில் உள்ள உயிரினங்கள் பற்றிய அறிவு, அவற்றைப் பிடிப்பதற்கான பல்வேறு பொறிகள், வலைகள், தூண்டில்கள், கலவைகள் போன்ற கருவிகளின் தொழில்நுட்ப அறிவு எம்மிடம் உண்டு. கட்டுமரத்தில் இருந்து பல்லாயிர படைவீரர்களை பல மைல்கள் ஏற்றி இறக்கிய பெரும் கப்பல்கள் கட்டிய கப்பற்கலை என்று எமது அறிவு பரந்து இருந்தது. அண்மை வரை கப்பல் கட்டுவதில் நாம் பல புத்தாக்கங்களை செய்திருந்தோம். ஆனால் இவற்றை நாம் இன்னும் விரிவாக ஆவணப்படுத்தவில்லை, பேணவில்லை.

பல போதாமைகள் இருந்தாலும் ஒரு சில முயற்சிகளை இங்கு அடையாளப்படுத்துவது நன்று. தமிழ்நாட்டிலேயே பல்கலைக்கழகளுக்கான சிறந்த வலைத்தளங்களில் தமிழ்நாடு வேளாண் பல்கலைக்கழகத்தின் வேளாண் இணையத் தளமும் (http://agritech.tnau.ac.in/ta/) ஒன்று. இங்கு வேளாண்மை, மீன்பிடிப்பு, கால்நடை, வனவியல் போன்ற பல துறைகளில் விரிவான கட்டுரைகளும் தகவல்களும் தமிழில் கிடைக்கிறன. கடந்த ஆண்டு தமிழ் விக்கிப்பீடியாவில் கட்டுரைப் போட்டி நடத்திய போது பல மாணவர்கள் பிரதி செய்து அனுப்பி இருந்த கட்டுரைகளில் பெரும்பாலானவை இந்த வலைத்தளத்தில் இருந்துதான் வந்திருந்தன. (வேளாண் தளம் பற்றி ஒரு தனிக் கட்டுரை எழுதவேண்டும்.) இதே போல ஒரு பொறியல் பல்கலைக்கழகம், ஒரு மருத்துவப் பல்கலைக்கழகம் செய்தால் அதனால் கிடைக்கும் பலன்களை எண்ணிப் பாருங்கள். தற்போது தமிழ் விக்கிப்பீடியாவிலும் நாம் இயன்றவரை இவ்வாறான தகவல்களைத் தொகுக்த்து வருகிறோம். நூலகத் திட்டத்திலும் இந்தவகை அறிவை ஆவணப்படுத்துவதை ஒரு முக்கிய நோக்கமாக கொண்டுள்ளார்கள்.

இதில் நீங்களும் உங்கள் பங்களிப்பைச் செய்யலாம். நீங்கள் அன்றாடம் பயன்படுத்தும் ஒரு உள்ளூர் கருவியைப் பற்றி, தொழில் நுட்பத்தைப் பற்றி, தொழிலைப் பற்றி, தொறிற் கலைஞரைப் பற்றி, அது சார்ந்த பரந்த அறிவைப் பற்றி ஒரு படம், நிகழ்படம், ஒலிப் பதிவு அல்லது கட்டுரை என்று வழங்குங்கள். இவ்வாறு நாம் கூட்டாக இவற்றைப் பேணுவோம், வளர்த்தெடுப்போம்.

தமிழ் விக்கி ஊடகப்போட்டி!

2011-11-14T04:19:00.000-08:00

இந்த போட்டி பற்றிய விபரங்களை அறிய இங்கே செல்லுங்கள்.

தமிழ் விக்கிப்பீடியா 39 000 கட்டுரைகளைத் தாண்டியது

2011-10-14T17:54:00.000-07:00

கடந்த ஆறு மாதங்களில் 9 000 புதிய குறு, நெடுங் கட்டுரைகள் உருவாக்கப்பட்டு, தற்போது தமிழ் விக்கிப்பீடியா 39 000 கட்டுரைகளைத் தாண்டி உள்ளது. கட்டுரைகளின் எண்ணிக்கையில் இந்திய விக்கிகளில் 3 ம் இடத்தில் இந்தி, தெலுங்குக்கு அடுத்தபடியாக தமிழ் விக்கிப்பீடியா உள்ளது. உலக அளவில் நாம் இப்போது 61 நிலையில் உள்ளோம். பெரும்பாலான கட்டுரைகள் தானியங்கிகள் இல்லாமல் பயனர்களால் நேரடியாக உருவாக்கப்பட்டவை ஆகும். குறிப்பாக இலங்கையில் இருந்து புன்னியாமீன், சிங்கப்பூரில் இருந்து கார்த்திக், ஃகொங்கொங்கில் இருந்து அருண், இந்தியாவில் இருந்து சங்கைப் பொதுவன், மலேசியாவில் இருந்து மலாக்கா முத்துக்கிருஷ்ணன், மற்றும் பல புதுப் பயனர்களின் பங்களிப்பு முதன்மையானது. இந்தக் குறுகிய கால கட்டத்தில் இந்தளவு கட்டுரைகளை எழுதியது தமிழ் விக்கியில் இதுவே முதல் முறை ஆகும்.

இந்தக் கால கட்டத்தில் தமிழ் இதழ்கள், துடுப்பாட்ட விளையாட்டு வீரர்கள், சிங்கப்பூர் மற்றும் ஃகொங்கொங் நகரங்களின் தொடரு நிலையங்கள், சங்க இலக்கியங்கள், மலேசியத் தமிழ்ப் பள்ளிகள், மருத்துவம், இரண்டாம் உலகப் போர் என பல வகைத் தலைப்புக்களில் கட்டுரைகள் உருவாக்கப்பட்டுள்ளன. மேற்குறிப்பிட்ட தலைப்புக்கள் பல தரப்பட்ட தகவல்கள் தமிழில் பகிரப்பட தமிழ் விக்கிப்பீடியா உகந்த களம் என்பதை உணர்ந்துகின்றன.

இந்தியாவில் வெறும் 10% மக்கள் கூட இன்னும் இணையத்தைப் பெறவில்லை. இலங்கையிலும் மலேசியாவிலும் இதைவிடச் சற்று மேம்பட்ட நிலை இருக்கலாம், ஆனால் பெரும்பான்மைத் தமிழர்கள் இன்னும் இணையத்துக்கு வரவில்லை. அவர்கள் வரும் போது, அவர்களுக்குப் போதுமான பயன் உள்ள உள்ளடக்கத்தை உருவாக்கும் வாய்ப்பை, பொறுப்பை இன்றைய தமிழ் இணையப் பயனர்கள் பெற்று உள்ளார்கள். ஆகவே வலைப்பதிவுகளில் மட்டும் அல்லாமல் கூட்டாக விக்கியூடகங்களிலும் உங்கள் படைப்பை வழங்குங்கள். தமிழ் விக்கிகளின் வளர்ச்சி வேகத்தை இன்னும் பல மடங்கு அதிகரியுங்கள். எண்ணிக்கையில் மட்டும் அல்ல கருத்து ஆழமான ஆக்கங்களையும் தாருங்கள். பங்களிப்பதில் ஏதும் நுட்பச் சிக்கலா, இன்றே எம்மைத் தொடர்பு கொள்ளுங்கள்.

தமிழ் விக்கிப்பீடியாவில் மலேசியத் தமிழர் தகவல்கள்

2011-10-12T16:11:00.000-07:00

மலேசியாவில் தமிழர்கள் பெருந்தொகையில் (~1.5 மில்லியன்) வாழ்கிறார்கள் என்று பலர் அறிந்து இருப்பினும் அவர்களின் சமூக, கல்வி, பொருளாதார நிலை, அவர்கள் தமது மொழியை பண்பாட்டை உரிமைகளைப் பேண எடுக்கும் முயற்சிகள், அவர்களின் படைப்புகள் போன்ற தகவல்களைப் பிற நாட்டுத் தமிழர்கள் அவ்வளவாக அறிந்திருக்க வாய்ப்புக்கள் அண்மை வரை இலகுவாக இருந்ததில்லை. ஆனால் இணையம் ஊடாக, வலைப்பதிவுகள் ஊடாக, தமிழ் விக்கியூடகங்கள் ஊடாக நாம் மலேசியத் தமிழர்கள் பற்றி அறியும் வாய்ப்புக்கள் பெருகி உள்ளன.

மலாக்கா முத்துக்கிருஷ்ணன் அவர்கள் தமிழ்ப் பள்ளிகள், மலேசியத் தமிழ்த் தலைவர்கள், மலேசியத் தமிழ்ப் பெண்கள், தமிழர்கள் வசிக்கும் இடங்கள் பற்றி தகவல் ஆழம் மிக்க கட்டுரைகளை தமிழ் விக்கியில் எழுதி வருகிறார். நிறையப் படங்களைச் சேர்ப்பது எம்மை மலேசியாவிற்கு அழைத்துச் சொல்வது போல் உள்ளது. வேறு சில பயனர்களும் மலேசியத் தமிழ் மொழி, மலேசிய ஊடகங்கள் பற்றி தகவல் கட்டுரைகளைப் எழுது வருகிறார்கள். மலேசியாவில் தமிழர்களில் பெரும்பான்மையினர் தமிழ் வழிக் கல்வியைப் பெறுவதையும், மிகுந்த சவால்களை எதிர்நோக்கியும் இவர்கள் அதைத் தொடர்வதையும் இக் கட்டுரைகள் உணர்த்துகின்றன. தமிழ்நாட்டில் தமிழ்ப் பள்ளிகளும், தமிழ் வழிக் கல்வியும் திராவிடக் கட்சிகளின் ஆட்சியில் மதிப்பிழந்து வரும் இத் தருவாயில் மலேசியாவிலும், இலங்கையில் தமிழ் வழிக் கல்வி இன்னும் தொடர்வது இங்கு குறிப்பிடத்தக்கது. தமிழ் விக்கியின், அறிவியல் தமிழின் தேவை இவர்களுக்கு உள்ளது என்பதை நாம் உணர்ந்து கொள்ள வேண்டும்.

அண்மையில் மலேசியாவில் நடந்த கற்றல் கற்பித்தலில் புதிய சிந்தனைகள் - பன்னாட்டு மாநாடு, உலக இஸ்லாமியத் தமிழ் இலக்கிய மாநாடு, மலேசியத் தமிழர் வாழ்வியல் மாநாடு போன்ற மாநாடுகள் பற்றிய குறிப்புக்களும் விக்கியில் உள்ளன. இவை மலேசியத் தமிழர்கள் தமிழ்க் கல்வியை, இலக்கியத்தை, வாழ்வியலை எந்தளவு வீச்சுடன் பேண, வளர்க்க முயல்கிறார்கள் என்பதை உணர்த்துகின்றன.

மலேசியத் தமிழர் வாழ்வியலின் ஒரு தனித்துவமான பகுதி அவர்களின் கலைகள் ஆகும். சொல்லிசை (தமிழ் ராப்), உறுமி இசை ஆகியவை மலேசியாவில் வளர்ச்சி பெற்று உள்ளன. அவர்கள் தங்களுக்கென ஊடகங்களை, திரைப்படங்களை வளர்த்தெடுத்து உள்ளார்கள். இவை பற்றியும் தமிழ் விக்கியில் தகவல்கள் பெறலாம்.

அண்மையில் மலேசியாவில் தமிழ் விக்கி அறிமுகக் கூட்டங்கள் இரண்டு நடத்தப்பட்டுள்ளன. மேலும் பல மலேசியத் தமிழர்கள் இணைந்து தகவல் பகிர்வைத் தொடர்வார்கள் என எதிர்பார்க்கலாம்.

தமிழ் ஆய்வுக் களங்களுக்கு தமிழ் விக்கியூடகப் பயன்பாடு

2011-08-24T17:08:00.000-07:00

தமிழ்மொழிக் கல்விமுறையில், பாடத்திட்டங்களில் வரவேற்கத்தக்க மாற்றங்கள் நிகழ்ந்து வருகின்றன. தமிழ்மொழி கற்கப்படும் மாறுபடும் சூழல்கள், தொழில்நுட்பம், மொழித் தேவைகள், கல்வியாளர்களின் தேடல்கள் எனப் பல காரணங்கள் இந்த மாற்றத்தின் உந்தல்களாக அமைந்துள்ளன. நோர்வேயில் நடைபெற்ற தமிழ் - தாய்மொழி மாநாடு, மலேசியாவில் நடைபெற்ற பன்மொழித் தமிழ் மொழியியல் மாநாடு மற்றும் கற்றல் கற்பித்தலில் புதிய சிந்தனைகள் பன்னாட்டு மாநாடு, தற்போது அமெரிக்காவில் ஒழுங்குசெய்யப்படும் புலம்பெயர்ந்தோர் தமிழ்க் கல்வி மாநாடு ஆகியவற்றின் உள்ளடக்கங்கள் இந்த புதிய மாற்றங்களை சுட்டுவதாக அமைதுள்ளன.

தமிழ்மொழிக் கல்வியில் முக்கியமாக இடம்பெற்றுவரும் ஒரு மாற்றம் தமிழ்மொழி தொடர்புடைய பல்வேறு துறைகளை தமிழ்மொழிக் கல்வியின் முக்கிய உறுப்புக்களாக இடம்பெறச் செய்வதாகும். இவற்றின் ஊடாகத் தமிழ் கற்பதும், தமிழ் ஊடாக பிற துறைகளைக் கற்பதும் நலம் மிக்க ஒரு பரிமாற்றம் ஆகும். முதற்கட்டமாக இலக்கியம், இலக்கணம் என்று இருந்த மரபு உடைக்கப்பட்டு ஊடகவியல், நாட்டுப்புறவியல், திறனாய்வு, மொழியியல், மொழிபெயர்ப்பு, வரலாற்றியல் போன்ற துறைகள் உள்ளுக்குள் வந்தன. இன்று தமிழாய்வில் இடம்பெறும் ஆய்வுகளின் பெரும்பகுதி இத் துறைகளைச் சார்ந்தனவே. அடுத்தகட்டமாக
தமிழ்க் கணிமை (தட்டச்சில் இருந்து இயற்கைமொழி செயலாக்கம் வரை), அறிவியல் தமிழ், எண்ணிம ஆவணவியல், சமூக அறிவியல் போன்ற துறைகள் தமிழ்மொழிக் கல்வியின் அங்கமாகி வருகின்றன. தமிழ்மொழிக் கல்வியின் அனைத்து களங்களுக்கும் தமிழ் விக்கியூடகங்களை நல்ல உசாத்துணைகளாக வளர்த்தெடுக்க முடியும்.

தமிழ் நூல்கள், இதழ்கள், பத்திரிகைகள், இசைத்தட்டுக்கள் பற்றிய ஒரு தரவுத்தளமாக, தமிழரின் ஆடற்கலைகள், நாடகங்கள், இசை வடிவங்கள், இசைக் கருவிகள், வாழ்வியல் கூறுகள், மெய்யியல், பண்பாடு, அறிவியல், அரசியல், வரலாறு ஆகியவற்றின் தகவல் கோப்பாக தமிழ் விக்கிப்பீடியாவை வளர்க்க முடியும். தமிழ் மக்களின் பரம்பல், அவர்கள் வெவ்வேறு நாடுகளில் வாழும் முறை, அங்கு அவர்களின் அரசியல் பொருளாதார நிலைமைகள், அவர்கள் நடத்தும் அமைப்புகள், ஊடகங்கள் பற்றிய தகவல்களை தமிழ் விக்கிப்பீடியாவில் தொகுக்க முடியும். இவற்றை விட, தமிழ் விக்கிப்பீடியா அறிவியல் தமிழின் மிகச் சிறந்த எடுத்துக்காட்டாக, அதற்குரிய களமாக செயற்படமுடியும். இலங்கை-தமிழக கலைச்சொற் வேறுபாடுகளை இணைக்கும் இடமாக, தமிழ்மொழி ஊடாக கல்வி பயிரும் மாணவர்களின் மூலமாக இதனை நாம் வளர்க்க முடியும்.

விக்கி செய்திகளில் ஒவ்வொரு நாட்டில் நடைபெற்றும் முக்கிய நிகழ்வுகள், குறிப்பாக தமிழர்களுக்கு பாதிப்புடைய செய்திகளை நாம் உடனுக்குடன் தொகுத்துப் பகிர முடியும். விக்சனரியை ஒரு தமிழ்-பன்மொழி பன்மொழி-தமிழ் மின்னகராதியாக வளர்க்க முடியும். தமிழ் இலக்கியங்களை, எழுத்து மூலங்களை விக்கி மூலத்தில் சேர்க்கலாம். எமக்குத் தேவையான நூல்களை விக்கி நூல்களில் ஆக்கலாம். இவ்வாறு விக்கியூடகத் திட்டங்கள் பலவும் பலவகைகளில் தமிழ்மொழி மாணவர்களுக்கும் ஆசியர்களுக்கும் பயன்படும்.

தமிழின் பழைய, புதிய ஆய்வுகள் களங்கள் தொடர்பான ஒரு விரிந்த தகவல் தொகுப்பை நாம் விக்கியூடகங்களில் செய்யமுடியும். தமிழுக்கு சமயங்களின் பங்களிப்பு, தமிழின் பதிப்புத்துறை வரலாறு, தமிழ் சிற்றிதழ்களின் பாதிப்பு, வாழ்கை வரலாறுகள், தமிழர் கட்டிடக்கலை, நாட்டுப்புறைக் கதைகளின் பொதுக் கூறுகள், தமிழ்க் கணிம், தமிழர் வானியல், 19 ம் நூற்றாண்டில் அறிவியல் தமிழ் எனப் பல வகைத் தலைப்புகளுக்கு இன்றே தமிழ் விக்கியூடகங்களில் நல்ல தகவல்கள் கிடைக்கின்றன. இன்றைய ஆய்வாளர்கள் அவற்றை மேலும் விரிவாக்கி, அடுத்த தலைமுறையினரை புத்தாக்கங்கள் நிகழ்த்திட உதவிடனும்.

தமிழில் திறந்த தரவுகள் ஏன், எப்படி

2011-08-20T22:46:00.000-07:00

இணையம் மிக வேகமாக மாறி வருகிறது. இணையம் உலகளாவிய வலையாகவும், பின்னர் வலை 2.0 ஆகவும், இப்போது பொருளுணர் வலையாக (semantic web) உருவாகி வருகிறது. பிற ஊடகங்கள், அல்லது துறைகள் போல் அல்லாமல் தமிழ் இணையத்தில் அதன் மைய வேகத்துக்கு ஈடுகொடுத்து முன்னேறி வந்துருக்கிறது. அந்த வகையில் இந்தப் பொருளுணர் வலைக்கு எப்படித் தமிழ் வளர்ச்சி பெறவேண்டும் என்று தமிழ் ஆர்வலர்கள் சிந்திக்கத் தொடங்க வேண்டும். அந்த நோக்கத்துடன், மிக மேலோட்டமான அலசலாக இந்தப் பதிவு அமையும்.

உலகளாவிய வலையின் முதல் கட்டத்தில் நாம் வ்லைப்பக்கங்கள் சென்று செய்திகளைப் படித்தோம். மின்னஞ்சல்களை பயன்படுத்தத் தொடங்கினோம். தமிழ் படிக்க வேண்டும் என்றால் தமிழ் எழுத்துக்களை தரவிறக்கல், நிறுவுதல் என்று சிக்கல்கள் இருந்தன. அந்தச் சிக்கல்களுக்கு எல்லாம் ஒருங்குறி ஓரளவு தீர்வாக அமைந்தது. வலை 2.0 இற்கு தமிழ் வேகமாகவே வந்தது. வலைப்பதிவுகள், விக்கி, டிவிட்டர், முகநூல் என எல்லா வலை 2.0 தொழில்நுட்பங்களும் தமிழில் பயன்படுத்த முடியும். நகர்பேசித் தொழில்நுட்பங்களில் சில தடைகள் இருந்தாலும், தமிழில் சமாளித்துக் கொள்ளலாம். இதுவெல்லாம், ஒட்டு மொத்தமாக தமிழ் ஆர்வலர்களால் சாத்தியமானவையே. (இன்றுவரைக்கு தமிழக அரசால் இவற்றுக்கு துளிப் பங்களிப்பும் கிடையாது. தமது கட்சி வலைத்தளங்களில் இருந்து, பல்கலைக்கழகங்கள், அரச திணைக்களங்கள் என எல்லாம் பெரும்பாலும் ஆங்கிலத்தில் மட்டுமே வலைத்தளங்களை வைத்திருகின்றன என்பது மட்டுமே தமிழக அரசின் கொள்கை நிலைப்பாட்டையும், செயற்திறனையும் சுட்டிநிற்கின்றன. கனடாவில் பிரெஞ்சு மாநிலத்தில் (கியூபெக்) போல், எல்லாக் கணினிகளிலும் (வணிக நிறுவனங்கள் உட்பட) பிரெஞ்சு நிறுவப்படவேண்டும் என்ற கொள்கையை தமிழகத்தில் எதிர்பார்க்க முடியாது.)

பொருளுனர் வலை (semantic web) இணையத்தில் அல்லது உலகளாவிய வலையின் அடுத்த கட்டமாக கூறப்படுகிறது. அடிப்படையில் பொருளுணர் வலை என்றால், வலையில் கிடைக்கும் தரவுகள் அல்லது தகவல்களை கணினிகள் பொருள் புரிந்துகொள்ளத்தக்கவாறு ஒழுங்குபடுத்தும் நுட்பம் ஆகும். தற்போது ஒரு வலைப்பக்கத்தில் உள்ள தரவுகள் அல்லது தகவல்கள் எந்த வகையான சீர்தரப்பட்ட கட்டமைப்புக்குள் இருப்பதில்லை. இதனால் இந்த தரவுகள் மீது கணித்தல் செய்வது சிரமானது. இந்தத் தகவல்கள் முறையான ஒரு கட்டமைப்புக்குள் வந்தால், பல்வேறு வகையான தேவைகளுக்கு, கணித்தலுக்கு அவற்றைப் பயன்படுத்த முடியும். அத்தகைய முறைமைகளையே பொருளுணர் வலை சுட்டுகிறது. உலகளாவிய வலையின் முதல் இரு கட்டங்கள் தகவலால் முதன்மை பெற்றது என்றால், அதன் அடுத்த கட்டம் தரவுகளால், அவற்றின் மீதான கணித்தலால் முதன்மை பெறும்.

சரி அவைதான் என்ன தரவுகள், அவை ஏன் முக்கியம். ஒரு நகரத்தின் பல்வேறு கூறுகள் அல்லது தொழில்பாடுகள் பற்றிய தரவுகளை எடுத்துக் கொள்வோம். நகரத்தின் நிலவரைபடம். போக்குவரத்துச் சாலைகள். பொதுப் போக்குவரத்து வசதிகள். நகரத்தில் வாழும் மக்கள்வகைப்பாடு. மிகவும் ஏழையான மக்கள் எங்கு வாழ்கிறார்கள். அவர்கள் வாழும் இடங்களில் உள்ள பாடசாலைகளின் தரம் என்ன? அரச திட்டங்கள் எங்கு, யாரால், எப்போது, எப்படி நிறைவேற்றப்படுகின்றன. எங்கு குற்றங்கள் அதிகம் நடைபெற்றுகின்றன. எங்கு ஊழல் அதிகமாக இருக்கிறது. இப்படிப் பட்ட தகவல்கள் பொதுமக்களுக்கு கிடைக்குமாயின் அவர்களின் முடிவொடுக்கும் ஆற்றலை, அல்லது அவர்கள் முடிவுகளின் தரத்தை பல மடங்கு அதிகரிக்கும். ஐக்கிய அமெரிக்கா, கனடா, ஐரோப்பா போன்ற நாடுகளில் இந்தத் தரவுகள் பொதுவில், திறந்த முறையில் தற்போது கிடைக்கத் தொடங்கி இருக்கின்றன. அந்த நாட்டு அரசுகளின் கொள்கையாக இது நடக்கிறது. எ.கா toronto.ca/open, toronto.ca/wellbeing/. நகரங்கள் மட்டும் அல்ல, ஊர்களுக்கு இதே தேவை இருக்கிறது.

மாணவர்களுக்கு தரவுகளும், கணிக்கும் கருவிகளும் முக்கியம் ஆகும். எ.கா www.wolframalpha.com என்ற தேடல் அல்லது கணித்தல் கருவி பல்வேறு கேள்விகளுக்கு பதில் சொல்லும் திறமை கொண்டது. www.gapminder.org, google.com/publicdata, linkeddata.org எனப் பலரும் தரவுகளை ஆழத் தோண்டத் தொடங்கி இருக்கிறார்கள். தரவுகளைக் கணித்தலும் காட்சிப்படுத்தலும் நாமும், நமது கணினிகளும் தொழிற்படும் முறையை புரட்சிகரமாக மாற்றிவருகின்றன.

நாம் தரவுகள் என்ற அடுத்த கட்டத்தை நோக்கும் முன், தற்போது இணையத்தில் தமிழ் உள்ளடக்கம் என்பது இன்னும் பல போதாமைகளைக் கொண்டது என்பதை ஏற்றுக் கொள்ள வேண்டும். மதுரைத் திட்டம், நூலகத் திட்டம், விக்கியூடகத் திட்டங்கள், தமிழ் இணையக் கல்விக்கழகம் போன்று சில நல்ல திட்டங்கள் இருந்தாலும் இவை சிறு துளியே. தமிழின் அறிவியல், வாழ்வியல், மருத்துவ மற்றும் பிற கலைக்களஞ்சியங்கள் இணையத்துக்கு வரவேண்டும். நாட்டுடமை நூல்கள் இணையத்துக்கு வர வேண்டும். எமது கலைகள், தொழில்கள், வாய்மொழி அறிவு பல்லூடக முறையில் ஆவணப்படுத்தப் பட வேண்டும். இவற்றை நாம் விரைந்து செய்தல் மூலமே மிக வேகமாக உருவாகி வரும் அறிவுச் சமூகத்தில் பங்கு கொள்ள முடியும்.

தரவு என்பது எண்தானே, அதில் எப்படி தமிழ் வர முடியும் என்று எண்ணக் கூடும். ஆனால் நாடுகள் பெயர்கள், அளவீடுகள் பெயர்கள் போன்றவை தமிழில் அமைவதில்லை. அவற்றைத் தமிழ்ப் படுத்த வேண்டும். (கூகிள் தனது மொழிபெயர்ப்புக் கருவியில் தமிழ் விக்கிப்பீடியாவில் இருந்து எடுத்த தரவுகளின் ஒரு பகுதி இந்த வகையானவை.) இது ஒரு வகை தன்மொழியாக்கமே. அடுத்தது தரவுகளைக் கையாளும் முக்கிய கருவிகளில் தமிழ் இடைமுகங்களை உருவாக்க வேண்டும். இது தமிழில் தரவுகளை உருவாக்க ஒரு வழி.

அடுத்தது தமிழ், தமிழர் பற்றிய தரவுகளை நாமே உருவாக்க அல்லது தொகுக்க வேண்டி இருக்கிறது. தரவுகள் பற்றி தமிழ் ஆர்வ அமைப்புகள் ஒரு பொது உடன்பாட்டுக்கு வரவேண்டிய தேவை இருக்கிறது. தமிழ் நூல்கள், தமிழ்த் திரைப்படங்கள், தமிழ் இதழ்கள், தமிழ்க் கலைகள், தமிழ் மக்கள்வகைப்பாடு, ஊடகங்கள், அமைப்புகள் ஆகியவற்றைப் பற்றிய தரவுகளை எந்த முறைமையின் கீழ் சேர்க்கப் போகிறோம். எப்படிப் கூட்டாக உருவாக்கிப் பகிரப் போகிறோம் என்பது எமக்கு முன் உள்ள ஒரு முக்கிய பணி ஆகும்.

ஈழம், தமிழகம், மலேசியா எங்கும் ஆங்கிலம் திறமையாகத் தெரிந்த அந்த 20-40% விட்டுவிடுவோம். மற்றவர்களுக்காக, எமது தற்சார்பு மிக்க அறிவுக்காக, எமது சமூக உரையாடல்களுக்காக தமிழில் தரவுகளை உருவாக்குவது எமது பணியாகிறது.

தமிழ் விக்கிப்பீடியாவில் இலங்கைச் சூறாவளி

2011-05-02T01:17:00.000-07:00

கடந்த இரு மாதங்களாக தமிழ் விக்கிப்பீடியா இதுவரை சந்தித்திராத ஓர் வளர்ச்சியைக் கண்டு வருகிறது. பலகாலமாக 68ஆம் இடத்திலே இருந்த தமிழ் விக்கிப்பீடியா 64 வரை முன்னேறக்கூடிய நிலையை அடைந்துள்ளது. இதற்கு முக்கியமான உந்துசக்தியாகவும் தொடர் உழைப்பாளராகவும் இருப்பவர் தன்னந்தனியே 3000 கட்டுரைகளை மூன்றே மாதங்களில் ஆக்கிய இலங்கைச் சூறாவளி விக்கிப்பீடியர் புன்னியாமீன் ஆவார்.

பீ. எம். புன்னியாமீன், இலங்கையில் உள்ள கண்டியைச் சேர்ந்தவர். நவம்பர் 14, 2010 முதல் தமிழ் விக்கிமீடியா திட்டங்களில் பங்களித்து வருகின்றார். கல்வித்துறையில் பல பொறுப்புகளுக்குப் பிறகு, தற்போது வெளியீட்டு நிறுவனமொன்றின் முகாமைத்துவப் பணிப்பாளராக பணியாற்றி வருகின்றார். இதழியலில் ஆர்வம் மிக்க இவர் ஓர் எழுத்தாளரும், தன்விருப்ப ஊடகவியலாளரும் ஆவார். இதுவரை 173 நூல்களை எழுதி வெளியிட்டுள்ளார். விக்கிப்பீடியாவில் இவரது பங்களிப்புகள் சகல துறைகளிலும் இடம்பெறுகின்றன. இலங்கை எழுத்தாளர்கள், கலைஞர்கள், ஊடகவியலாளர்களின் அறிமுகம், இலங்கைத் தமிழ் நூல் பட்டியல், சர்வதேச விளையாட்டு நிகழ்வுகள், சர்வதேச நினைவு தினங்கள், பொதுஅறிவு, அரசறிவியல், வரலாறு, மரபுகள், பாரம்பரியங்கள், நடப்பு விடயங்கள் தொடர்பாக 450க்கும் மேற்பட்ட கட்டுரைகளை எழுதியுள்ளார். விக்கிப்பீடியாவின் 10வது ஆண்டு நிறைவை முன்னிட்டு இவர் எழுதிய கட்டுரை இலங்கையின் முக்கிய பத்திரிகைகளுள் ஒன்றான ஞாயிறு தினக்குரல் உட்படப் பல வலைத்தளங்களில் இடம்பெற்றது. மேலும் சுவிசு அரசு வானொலியான 'கனல்கா" வில் விக்கிப்பீடியா பற்றி இவரது ஒருமணிநேர நேர்காணல் இடம்பெற்றுள்ளது.

ஏப்ரல் மாதத்தில் ஒரே நாளில் 200 கட்டுரைகள் எழுதும் சாதனை நிகழ்த்த திட்டமிட்டார். தனது அலுவலக உதவியாளர்கள், மனைவி மற்றும் மக்கள் என அனைவரின் ஒத்துழைப்புடன் எண்ணியதற்கு மேலாக ஒரே நாளில் 300 கட்டுரைகள் இட்டு சாதனை படைத்தார். சமூகமாக இயங்கும் விக்கிப்பீடியாவின் நெறிகளுக்குட்பட்டு இவர் நிகழ்த்தியுள்ள இந்த வேள்வி மற்ற தமிழர்களுக்கு ஓர் தூண்டுகோலாக இருந்து தமிழ் விக்கிப்பீடியா விரைவில் 50000 கட்டுரைகளை எட்ட வழிசெய்யும்.

30 000 கட்டுரைகளைத் தாண்டி

2011-04-15T18:54:00.000-07:00

கடந்த ஏப்ரல் 8, 2011 அன்று தமிழ் விக்கிப்பீடியா 30, 000 கட்டுரைகளைத் தாண்டியது. இது எமக்கு ஒரு குறிப்பிடத்தக்க மைல்கல். சனவரியில் இருந்து சுமார் 3000 கட்டுரைகள் மூன்று மாதங்களில் எழுதப்பட்டுள்ளன. பெரும்பாலானவை குறுங்கட்டுரைகளே. எனினும் குறுங்கட்டுரைகளே பல அரிய தகவல்களைக் கொண்டிருப்பதோடு, விரிவான கட்டுரைகளுக்குத் நல்ல தொடக்கமாக அமைகின்றன. பல்துறைகள் சார்ந்தும் இக்கட்டுரைகள் எழுதப்பட்டு இருப்பது நலமானது.

நீங்களும் ஒரு சில கட்டுரைகளைச் சேர்த்தால் இன்னும் வேகமாக நாம் வளரலாம். வாருங்கள், வந்து எமது பயணத்தில் இணையுங்கள்.

தமிழ் விக்கிப்பீடியாவில் பெண்கள் பங்களிப்பு

2011-03-08T16:46:00.001-08:00

தொடர்ச்சியான போராட்டங்களின் பின்பு பெண்கள் வாக்கு, சொத்து, கல்வி, வேலைவாய்ப்பு என உரிமைகளைப் பெற்றார்கள். மேற்குநாடுகளிலும், சீனா, இந்தியா மற்றும் பிற பல நாடுகளிலும் பெண்கள் தொடர்ச்சியாக முன்னேறி வருகிறார்கள். இன்று மருத்துவம், சட்டம், கல்வி, ஊடகத்துறை போன்ற துறைகளில் ஆண்டுகளுக்கு நிகராக அல்லது ஆண்களை விட சிறப்பான பங்களிப்பை பெண்களே செய்து வருகிறார்கள். தமிழ்ச் சூழலிலும் பெண்களின் உரிமைகள், பெண் கல்வி, பெண்களின் தலைமைத்துவம் தொடர்பாக பல புரட்சிகர மாற்றங்கள் நடைபெற்று உள்ளன. எனினும் இன்னும் பல துறைகளில் பெண்களில் பங்களிப்பும் தலைமைத்துவமும் முன்னேற வேண்டி உள்ளது.

தமிழ்ச் சூழலில் தமிழ் பெண்களின் பங்களிப்பு பொதுவாழ்வில் மிக அரிதாகவே உள்ளது. எழுத்தாளர்களாக, கலைஞர்களாக, சமூக செயற்பாட்டாளர்களாக, சமூகத் தலைவர்களாக என ஒப்பீட்டளவில் பெண்களின் விழுக்காடு மிகச் சிறிதே. குடும்பச் சுமை, சமூக எதிர்பார்ப்புகள் வாய்ப்புகள், சூழல், தெரிவு என பல காரணிகள் இதற்குக் காரணமாக இருக்கலாம்.

தமிழ் விக்கிப்பீடியாவில் தற்போது 50 வரையானோர் தொடர்ச்சியாக பங்களித்து வருகிறார்கள் எனலாம். தற்போது இவர்களில் இருவர் மட்டுமே பெண்கள். இந்த இருவரின் பங்களிப்பு அளப்பரியது. இதுவரை நான்கு பெண்கள் வரையிலேயே குறிப்பிடத்தக்க பங்களிப்ப்சைச் செய்துள்ளார்கள். இவர்களில் மூவர் ஈழத் தமிழர். இருவர் புகலிட நாட்டவர். பெண்களின் விழுக்காடு மொத்த பயன்ர்களில் ஒரு வீதத்தையும் தாண்டாது. இது ஆங்கில மற்றும் பிற விக்கிப்பீடியாக்களைக் காட்டிலும் மிக மோசம் ஆகும். ஆங்கில விக்கிப்பீடியாவில் 15 % வரையில் பெண்களின் பங்களிப்பு இருக்கிறது.

இதற்குப் பல காரணங்கள் இருக்கலாம். ஒன்று விக்கி ஒரு தொழில்நுட்பச் சூழலில் தோன்றிய திட்டம். அந்தத் துறையை ஆண்களே ஆக்கிரமிப்பதால், அதன் பிரதிபலிப்பாக இதைச் சொல்லாம். இந்திய, தமிழ்ச் சூழலில் பெண்கள் பொதுப் பணிகளில் ஈடுபடாமல் இருக்கும் பொதுத் தோரணத்தின் ஒர் எடுத்துக் காட்டாகவும் இதைக் கொள்ளலாம். விக்கி சமூக அல்லது நுட்பக் கட்டமைப்பில் இருக்கும் தடைகள் காரணமாக இருக்கலாம். காரணங்கள் எவையாகினும் நாம் இவற்றை மீறி பெண்களின் பங்களிப்பை ஊக்கப்படுத்துவதும், வரவேற்பதும் முக்கியமாகும்.

அனைவருக்கும் அனைத்துலக பெண்கள் நாள் வாழ்த்துக்கள்.

பன்மொழி ஆற்றலின் பயன்கள்

2011-02-26T11:57:00.000-08:00

தமிழ்நாட்டிலும், புகலிட நாடுகளிலும் வீட்டிலோ, வேலையிலோ, உறவினர்களோடோ, நண்பர்களோடோ, இதர தமிழர்களோடோ தமிழர்கள் தமிழ் பேசுவது அருகி வருகிறது. தமிழில் கல்வி, தாய்மொழிக் கல்வி போய், தற்போது தமிழ் கல்வியே வேண்டாம் என்று தமிழ்நாட்டில் பலர் வேண்டி நிற்கின்றனர். தமிழ் கல்வி ஒன்றுக்கும் உதாவாதது. தமிழ் கல்வி மாணவர்களுக்கு சுமை சேர்க்கும் என்பது பலரின் வாதம். ஆங்கிலமே கல்வியில், வணிகத்தில், உலகமயமாதலில் ஆதிக்கம் செலுத்துவதால் அது மட்டுமே கற்பது, அதிலேயே அறிவுப் புலத்தை உருவாக்குவது போதுமானது என்பது தற்போது வேகமாக தமிழ்ச் சமூகத்தில் முன்னெடுக்கப்படும் கற்பிதம் ஆகும். இது தொலைநோக்கற்ற, குறுகிய, கேடு தரக்கூடிய பார்வை ஆகும்.

முதலில் குழந்தைகள் அல்லது சிறுவர்கள் தாய்மொழி அல்லது பன்மொழிகளைக் காட்டிலும் ஆங்கிலம் கற்பதே அவர்களின் வருங்காலத்துக்கு நல்லது என்ற கருத்து தவறானது. பல சீரிய ஆய்வுகள் குழந்தைகள் இரு மொழிகளைக் கற்பதால் அவர்களின் பல்வேறு ஆற்றல்கள் விருத்தி பெறுவதை எடுத்துக் காட்டி உள்ளன. ஒப்பீட்டளவில் இரு மொழிகளைக் கற்கும் குழந்தைகளின் கவனிப்பு ஆற்றல் மற்றக் குழந்தைகளை விட மேன்மையாக இருக்கிறது. அவர்களின் சிந்திக்கும் ஆற்றலுக்கும் உதவி செய்கிறது. சிந்தனைகளை மொழியில் இருந்து பிரித்து, நுண்புலமாக சிந்திக்க பன்மொழி ஆற்றல் உதவுகிறது. வெவ்வேறு பண்பாட்டு மொழிச் சூழலில் பல விடயங்களைப் பொருத்தி ஆராய பன்மொழி ஆற்றல் உதவுகிறது. இவருக்கு தமிழ் விளங்கும் ஆனா கதைக்க மாட்டார், அல்லது வாசிக்க மாட்டார் போன்ற மொழி ஆற்றலை இங்கு குறிப்பிடவில்லை.

ஒருவருக்கு அவரின் அடையாளம் என்பது முக முக்கியமானது. தமிழர்களைப் பொருத்த வரையில் அவர்களின் அடையாளம் அவர்களின் மொழியோடு பின்னிப் பிணைந்தது. எமது வரலாறு, இலக்கியம், அறிவு எமது மொழியிலேயே பொதிந்து கிடக்கிறது. இந்த அடையாளத்தை ஒருவருக்குத் தருவதில் தமிழ் மொழி அவசிமாகிறது. இரண்டாம் மொழி சிங்களமாக, மலாயாக, ஆங்கிலமாக, இந்தியாக இருக்கலாம், ஆனால் தமிழில் பேச, எழுத, வாசிக்கத் தெரியாமல் தமிழர் என்று சொல்வதில் அர்த்தம் இல்லை. தமிழ், தமிழர் என்று உண்மையாக உழைக்கும் பலர் கூட இந்த அடிப்படையை உணராமல் தமது பிள்ளைகளை அன்னியர் ஆக்குகிறார்கள்.

இன்று ஆங்கிலம் கற்பவர்கள் வணிகத்திற்காகவே பெரும்பாலும் கற்கிறார்கள். ஆனால் பொருளாதார உலகம் வேகமாக மாறி வருகிறது. சீனா, மத்திய கிழக்கு நாடுகள், யப்பான், உருசியா, செருமனி, பிரேசில், எசுபானிய நாடுகள், மலேசியா, இந்தோனேசியா, இந்தியா என வெவ்வேறு மொழிகளின் உலகங்களின் விரிந்து வருகின்றன. எனவே ஆங்கிலத்தைத் தாண்டி சீனம், அரபு, யப்பானிசு, உருசியன், யேர்மன், போர்த்துக்கீசு, எசுபானிசு, இந்தி என பல மொழிகளைக் கற்பதும் தேவையாகிறது. எனவே ஆங்கிலம் மட்டும் என்பது போதுமானது அல்ல.

தமிழ்த் திரைத்துறை, இசைத்துறை, பதிப்புத்துறை, கல்வித்துறை என தமிழ் மொழி சார்ந்த, தமிழ் மக்கள் சார்ந்த பொருளாதாரத்தையும் கவனத்தில் கொள்ள வேண்டும். தமிழ் மொழியை இணைப்பு மொழியாகப் பேணி பல துறைகளில் நாடு கடந்த பொருளாதார வாய்ப்புக்களையும் கவனத்தில் கொள்ள வேண்டும். நாம் ஆங்கில உலகின் உற்பத்திகளை நுகர்ந்தால் தோற்கப் போவது எமது உற்பத்திகளே, எமது பொருளாதாரமே. இன்று மலேசியா, சிங்கப்பூர், இலங்கை, மேற்குநாடுகள் என வலம் வரும் தமிழ்ப் படைப்பாளிகள் ஆங்கிலம் மட்டும் என்ற உலகில் என்ன முக்கியத்துவம் பெறுவார்கள் என்று எண்ணிப் பார்க்க வேண்டும். தமிழ்ப் படங்களோ, நாடகங்களோ, புதினங்களோ மொழிபெயர்க்கப்படுவது கூடுதலாக மலையாளம், தெலுங்கு போன்ற மொழிகளிலேயே. இது இயல்பாக இருக்கும் ஒரு பண்பாட்டுப் பொருளாதார வெளிப்பாடு ஆகும். இதை நாம் ஒருமொழிச் சூழலில் இழந்து விடுவோம்.

கனடாவில் அண்மையில் வெளிவந்த ஆய்வுகள் பன்மொழிப் புலமை உள்ளவர்களுக்கு மறதிநோய் வருவது 4-6 ஆண்டுகள் பின்போடலாம் என்று கூறுகின்றன. மற்றவர்களைக் காட்டிலும் உயர்ந்த அறிதிறனோடு இயங்கக் கூடியதாக உள்ளதாகவும் அவர்கள் கூறுகிறார்கள். உங்களின் அறிதிறனை (cognition) சேமித்து வைக்க பன்மொழி அற்றல் உதவுவாதாக இந்த ஆய்வாளர்கள் கூறுகிறார்கள்.

முடிவாக, பன்மொழி ஆற்றல் ஒருவருக்கு மேன்மையாக சிந்திக்க, கவனிக்க, பல கோணங்களில் விடயங்களை ஆய உதவி செய்கிறது. ஒருவரின் மூளையை, அறிதிறனை கூடிய காலம் பேண உதவுகிறது. உங்களின் அடையாளத்தை, பண்பாட்டை அறிய, அதனால் பலம் பெற உதவுகிறது. மற்றவகளின் பண்பாட்டை, விழுமியங்களை அறிய உதவுகிறது. வேலைத்தளத்தில் உங்கள் ஆற்றல் பட்டியலை விரிவாக்கிக் காட்ட உதவுகிறது. ஒரு சமூகத்தின் பண்பாடுப் பொருளாதாரத்தை தக்க வைக்க உதவுகிறது. இவற்றுக்கு மேலாக வெவ்வேறு மொழிகளில் இலக்கியத்தை, பாட்டுக்களை, கவிதைகளை இரசிக்க உதவுகிறது. தாய்ப் பால் போல தாய்மொழிக் கல்வியும், சத்துணவு போல பன்மொழி அறிவும் எமக்கு இன்றியமையாதவை.

இணைப்புகள்:
Why Speaking More than One Language May Delay Alzheimer's

The Benefits of Multilingualism

English has colonised our languages

Mother tongue or English?

காமிக்சு, ராப், குறும்படம், உறுமி, தமிழ் விக்கிப்பீடியா

2011-02-20T12:53:00.001-08:00

தமிழ் இலக்கியம், திரைத்துறை, ஊடகங்கள், தமிழியல் மாநாடுகள், அரசியல் ஆகியவற்றுக்கு அப்பாலும் ஒரு தமிழ் உலகம் உண்டு. இந்தத் தமிழ் உலகம் இயல்பானது, நிரந்தரம் அற்றது, தன்னார்வலர்களால் பேணப்படுவது. தமிழின் துணைப் பண்பாடுகள் இவை. இவற்றைப் பற்றி இந்த சிறிய சமூகங்கள் சாராதவர்கள் அறிந்திருப்பது அரிது. ஆனால் இவர்களை அறியாமல், இவர்கள் தமிழுக்கு செய்யும் பங்களிப்பு அரியது. இவர்களின் உலகங்களே தமிழ் காமிக்சு, ராப், குறும்படம், உறுமி ஆகியன.

தமிழர்கள் பல நாடுகளில் பரவத் தொடங்கினார்கள். பல மொழிகளை, பண்பாடுகளை, தொழில்நுட்பங்களை எதிர் கொண்டார்கள். இவற்றின் தாக்கங்களால், வெவ்வேறு சூழ்நிலைகளில் வெளிப்பட்ட ஆக்கங்களே இவை. நாட்டுப்புறவியலுக்கு ஒத்த, ஆனல் அதை விட சிறிய ஒரு பரப்பு இவற்றுக்கு உண்டு.

தமிழ் காமிக்சு அல்லது சித்திரக்கதைகள் எனப்படுபவை ஒரு கால கட்டத்தில் மாணவர்களை மாயப் பிடிப்பில் வைத்திருந்த உலகம் ஆகும். 1950 கள் தொடக்கம் தமிழில் வரைகதைகள் உண்டு. 1970 இருந்து 1990 முற்பகுதி மட்டும் தமிழ் வரைகதைகளின் பொற்காலம் எனப்படுகிறது. இக்காலத்தில் லயன் காமிக்சு, ராணி காமிக்சு (1984-1995), வாணுமாமா சித்திரக் கதைகள் உட்பட பல தமிழ் வரைகதை இதழ்கள் வெளிவந்தன. அம்புலிமாமா, பாலமித்திரா போன்ற சிறுவர் இதழ்களிலும் வரைகதைகள் வெளிவந்தன. இந்தக் கதைகள் ஊடாக தமிழ் படித்தவர்கள், வெளி உலகை அறிந்து கொண்டவர்கள், ஆசிரியர்களால் தண்டிக்கப்பட்டவர்கள் என பல ஆயிரம் பேர் உள்ளார்கள். தொலைக்காட்சி, நிகழ்பட விளையாட்டுக்களின் வருகை, ஆங்கில வழிக் கல்வியின்-வாசிப்பின் ஆதிக்கம் தமிழ் காமிக்சு உலகை தகர்த்தன. எனினும் இன்றும் தமிழ் சித்திரக்கதைகள் வெளி வந்து கொண்டுதான் இருக்கின்றன.

1970 அமெரிக்க கறுப்பின மக்களின் இசை ஆக்க வெளிப்பாடாக, குறிப்பாக சமூக அநீதிகளுக்கு எதிரான அவர்களின் குரலாக் எழுந்த ராப் இசை 90 களில் தமிழில் உருவாகத் தொடங்கியது. தமிழ்ப் பாட்டு என்றால் சினிமாப் பாட்டுத்தான் என்றிருந்த சூழ்நிலையில் தமிழ் ராப் இசை அதன் பிடிக்கு சற்று வெளியே உருவானது. சினிமா ஆதிக்கத்தில் இருக்கும் தமிழ்நாட்டில் இது முதன்மையாக வெளிப்படவில்லை. மாற்றாக மலேசியாவிலும் புகலிட நாடுகளில் இது வெளியானது. யோகி பி உடன் நட்சத்ரா, சக்ரசோனிக். சுயித், சைன் என தமிழின் சிறந்த ராப் கலைஞர்களுக்கு என ஒரு தனி வரவேற்பு உள்ளது. இவர்களின் பாடு பொருட்கள் விருந்து இருக்கின்றன. இளைஞர்களை தமிழ் மீது ஈர்த்து வைக்க தமிழ் ராப் இசை ஒரு முக்கிய களம் ஆகும்.

தமிழ் குறும்பட, ஆவணப்பட உலகம் பரந்த தமிழ்ச் சமூகம் இன்னும் அறியாத ஒரு கூறாகவே இருந்து வருகிறது. 90 களில் தொழில்நுட்பத்தின் வளர்ச்சி மிகக் குறைந்த பணச்செலவில், உயர்ந்த தரமான குறும் படங்களையும், ஆவணப் படங்களையும் உருவாகக் தமிழ்ப் படைப்பாளிகளுக்கு வாய்ப்பு வழங்கியது. இணையத்தின் விரிவாக்கம் அந்தப் படைப்புகளை உலகமெங்கும் உள்ள தமிழர்களோடு பகிர வழி செய்தது. இதுவரை பேசப்படாத பல தலைப்புகளில், பல பார்வைகளில், பல மூலைகளில் இருந்து தமிழ் குறும்பட/ஆவணப்பட படைப்பாளிகள் ஆக்கங்களைத் தந்த வண்ணம் உள்ளார்கள். இவர்கள் பல குறும்பட விழாக்களை நடத்துகிறார்கள். இணையத்தில் மட்டும் அல்லாமல், தமிழ் தொலைக்காட்சிகளின் ஒரு முக்கிய கூறாகவும் இந்த குறும்படங்கள்/ஆவணப்படங்கள் அமைந்து வருகின்றன.

தமிழ் நாட்டுப்புறவியலின், தமிழிசையின் ஒரு கூறு உறுமி மேளம் ஆகும். சிறுதெய்வ வழிபாட்டில் உறுமி ஒரு முக்கிய இடம் வகிக்கிறது. ஒருவர் பாட்டுப் பாட, பலர் கூட்டாக உறுமி மேளத்தையும் இதர இசைக் கருவிகளையும் வாசிப்பர். மலேசியாவில் பிறந்து வாழும் இளைஞர்களுக்கு உறுமி மேளம் மீது இருக்கும் ஈடுபாடு அதீதமானது. கூட்டாக உறுமி வாசிப்பது இவர்கள் பலரின் ஈடுபாடாக இருக்கிறது. மலேசியாவில் பல கோயில்களில் உறுமி மேளக் குழுக்கள் உள்ளன. தேசிய உறுமி மேள போட்டி போன்ற போட்டிகளும் நடைபெறுகின்றன. உறுமி மேளத்தின் பாட்டுக்கள் ஊடாக இசையின் ஊடாக இவர்களின் உலகம் தமிழோடு இணைப்புப் பெறுகிறது.

இவ்வாறு தமிழிற்கு பல்வேறு துணைப் பண்பாடுகள் உள்ளன. தமிழ் மொழியும், இசையும், பண்பாடும், அடையாளமும் இந்த சிறு சிறு கூறுகளால் பேணப்படுகிறது. ஆனால் இவற்றைப் பற்றிய போதிய அக்கறையோ, ஆய்வோ பொதுத் தமிழ்ச் சமூகத்திடமோ, கல்வியாளர்களிடமோ இல்லை. எமது இலக்கியங்களை, நாட்டுப்புறவியலை, தொழிற்கலைகளை புறக்கணித்தோமோ, அது போலவே தற்போது தமிழின் நிகழ்கால கூறுகளைப் பற்றியும் எம்மிடம் அக்கறை இல்லை. எனினும் இவற்றைப் பற்றிய தகவல்களைப் பதிவு செய்ய தமிழ் விக்கிப்பீடியா ஒரு நல்ல தளமாக விளங்குகிறது. தகவல்களைப் பதிந்து, ஆய்வுகளுக்கு உதவி, பொதுத் தமிழ்ச் சமூகத்திடம் எடுத்துச் செல்ல விக்கிப்பீடியா ஒரு தளமாக அமையும். இதப் பணியில் இந்த உலகங்களைச் சார்ந்தவர்கள் நேரடியாகப் பங்களித்து உதவிட வேண்டும்.

சென்னை, புதுச்சேரி, திருச்சியில் விக்கிப்பீடியா பட்டறைகள்

2011-02-03T03:41:00.001-08:00

இம்மாதம் சென்னை, புதுச்சேரி, திருச்சி ஆகிய மூன்று இடங்களில் விக்கிப்பீடியா அறிமுகப் பட்டறைகள், கூட்டங்கள் நடைபெற உள்ளன. விவரங்களுக்குக் கீழ்க்காணும் பக்கங்களைக் காண்க:

* பிப்ரவரி 6 - சென்னை
* பிப்ரவரி 20 - திருச்சி
* பிப்ரவரி 20 - புதுச்சேரி.

ஆர்வமுள்ள அனைவரையும் கலந்து கொள்ள அழைக்கிறோம்.

நன்றி.

சென்னையில் விக்கிப்பீடியா பத்தாம் ஆண்டுவிழா - சனவரி 15, 2011

2011-01-10T00:20:00.000-08:00

சென்னையில் விக்கிப்பீடியா பத்தாம் ஆண்டுவிழா - சனவரி 15, 2011

அறிவுத்தளங்கள், அறிவுத்தொடர்ச்சி, சமூக உரையாடல்

2010-12-06T08:34:00.000-08:00

தமிழ் என்றால் இலக்கியம். இலக்கியம் என்றால் சிறுகதை, புதினம், கவிதை, காவியம் என்ற தோற்றப்பாடு தமிழ்ச் சூழலில் உள்ளது. இந்த வரையறையை மீறுவது படைப்பாளிகளுக்கு முடியாத ஒன்றாகவே இருந்து வருகிறது.

சமூகக் கருத்துக்களை எடுத்துரைக்க வந்தவர்களுக்கும் இந்த வடிவங்களுக்குள்ளேயே தள்ளப்படுகின்றார்கள். எடுத்துக்காட்டாக சாதியம், பெண்கள் அடக்குமுறை, மூடநம்பிக்கைகள் போன்ற சமூக நோய்களை அலச முற்பட்ட இடதுசாரி அல்லது பகுத்தறிவுவாதச் சிந்தனையாளர்கள் இந்த வரையறைக்குள் வரும்வரை, தமிழின் இலக்கிய வட்டத்துக்கு அப்பாலேயே வைக்கப்பட்டனர். அப்படி அவர்கள் இத்தகைய இலக்கியம் படைத்தாலும், அந்த படைப்பில் அழகியல் அல்லது நுட்பப் பிழையை தூக்கிவைத்து சிறுமைப்படுத்தப்படுவது வழமை. எனவே தமிழில் அறிவுத்தளங்கள் மொழி இலக்கியம் என்ற வரையறையைத் தாண்டி உருவாக ஒரு வகை மரபுத் தடை உள்ளது.

இந்த மரபில் சிற்றிதழ்கள் ஒரு பெரும் உடைப்பைச் செய்தன. தமிழில் சமூகம் தொடர்பான சீரிய உரையாடல்கள், விவாதங்கள், கலைச்சொல் உருவாக்கம், நடை விருத்தி சிற்றிதழ் தளத்தில் நிகழ்ந்தன. இன்று அரசியல், பொருளாதாரம், சமூகச் சிக்கல்கள், சமூகவியல் கோட்பாடுகள் ஆகியவை பற்றிய கருத்தாடல்கள் தமிழில், துல்லியமாக நடைபெறுகின்றன. குறிப்பாக மேற்கோள்கள் தந்து, தர்க்க முறையான, கோட்பாடுகள் பற்றிய கருத்தாடல்கள் நடைபெறுகின்றன.

ஆனால் இதே போன்ற வளர்ச்சி தமிழில் அறிவியல் தொழில்நுட்ப தளத்தில் இதுவரை நடைபெறவில்லை. எம்மிடம் உள்ள தொழிற்கலைகள் (கப்பற்கலை, தச்சுத் தொழில்நுட்பம், கட்டிக்கலை, வேளாண்மை, மீன் பிடிப்பு), நுட்பங்கள் பற்றிய கருத்தாடலோ, அல்லது தற்போது வளர்ச்சி பெற்று வரும் அறிவியல் தொழில்நுட்பம் பற்றிய கருத்தாடலோ நடைபெறுவதில்லை. ஒரு குறிப்பிடத்தக்க விதிவிலக்கு பண்டைய தொழிற்கலைகளில் பயன்படுத்தப்பட்டு வந்த கலைச்சொற்கள் சில துறைகளுக்குத் தொகுக்கப்பட்டது. இதில் தற்போதுதான் சில முயற்சிகள் காணப்படுகின்றன. பொது மக்களுக்கான துறைசார் இதழ்கள் கணினியல், மருத்துவம், வேளாண்மை, சூழலியல், சட்டம் போன்ற துறைகளில் வெளிவருகின்றன. ஆனால் இயற்பியல், வேதியல், வானியல், உற்பத்தி, தானியங்கியல் போன்ற துறைகளில் எந்த இதழ்களும் வெளிவருவதாக நான் அறிய முடியவில்லை. நிச்சியமாக இவை எதுவும் ஆய்வேடுகள் தரத்தில் இல்லை.

இந்த துறைசார் கருத்தாடல்களுக்கு, இதழ்களுக்கு, ஆய்வேடுகளுக்கு தேவை உள்ளதா என்ற கேள்வி உள்ளது. தமிழர்கள் செறிந்து வாழும் இடங்களில் தமது துறைகள் பற்றி தமது மொழியில் உரையாடல் நிகழ்த்துவது என்பது இயல்பாக இருக்கக் கூடிய விடயம் தான். இவை தவிர இலங்கை, மலேசியா, தமிழ்நாடு போன்ற இடங்களில் அறிவியல் தொழில்நுட்பம் தமிழிலும் கற்பிக்கப்படுகிறது. எனவே தமிழ் மொழி மாணவர்களின் அறிவை வளர்க்க இந்த ஆக்கங்கள் அவசியம். தொழிற்கலைகள், வேளாண்மை, சூழலியல், மீன் பிடிப்பு போன்ற பல துறைகளில் தமிழ் மொழி ஊடாக ஒரு உரையாலை மேற்கொள்ளும் போதும், நாம் எமது பாரம்பரிய அறிவை மீட்டெக்கவும், பயன்படுத்தவும் பேணவும் ஒரு பலமான தளத்தை உருவாக்கிக் கொள்ளலாம்.

அறிவியல் தொழில்நுட்பத் துறைகளுக்கான ஒரு நல்ல தளமாக இணையம் உள்ளது. சமூகம் தொடர்பான உரையால்கள் அறிவியல் தொழில்நுட்பம் துறைகள் பற்றிய உரையாடல்களை, ஆய்வுகளை நிகழ்த்துவதற்கு நல்ல எடுத்துக்காட்டாக உள்ளது. அதன் ஒரு தொடக்க கட்டமே தமிழ் விக்கிப்பீடியா மற்றும் நூலகத் திட்டம். தமிழில் வெளிவந்த அறிவியற் கலைக்களஞ்சியம், மருத்துவக் கலைக்களஞ்சியம், சித்த மருத்துவக் கலைக்களஞ்சியம் போன்ற துறைசார் ஆக்கங்கள் இணையத்துக்கு எடுத்து வருவது ஒரு முக்கிய அடுத்த கட்டம். இதை அடுத்து ஒவ்வொரு முக்கிய துறைசார் களங்களும் கட்டமைக்கப்படவேண்டும்.

இப்படிக் கோருவதால், ஆங்கிலத்தை தவிர்ப்பது என்று அர்த்தமல்ல, அது சாத்தியமும் அல்ல. மாற்றாக இன்று அறிவியல் ஆய்வுகள் கூடிதலாக நடைபெறும் சீனம், யேர்மன், யப்பானிசு போன்ற மொழிகளிலும் குறிப்பிடத்தக்க விழுக்காட்டினர் திறமை பெறுவது அவசியமாகும். விரைவில் மொழிமுறைப் மொழிபெயர்ப்புச் சாத்தியம் ஆகலாம். ஆனால் அது ஒருபோதும் ஒரு சமூக அறிவுத்தளங்களையோ, கருத்தாடலையோ நிகழ்த்தாது. இவை எம்மால் மட்டும் முடிந்த செயற்பாடுகள்.

மேலும் வாசிக்க:
மொழியும் இணையமும்

விக்கி மாரத்தான்

2010-10-27T03:16:00.000-07:00

விக்கி மாரத்தானில் கலந்து கொள்ள வாருங்கள்.

புது உலக மொழிகளின் விக்கிப்பீடியாக்கள்

2010-09-01T19:49:00.000-07:00

இருண்ட காலத்தில் ஆழ்ந்திருந்த ஐரோப்பா 15 ம் நூற்றாண்டில் மறுமலர்ச்சி கண்டது. அறிவியல், தொழில்நுட்பம், வணிகம், கலைகள் என பல துறைகள் வளர்ச்சி பெற்றன. ஐரோப்பிய நாடுகளுக்கிடையே வணிகப் பேட்டி மிகுந்தது. அன்று பல வழிகளில் சிறப்புற்று இருந்த இந்தியாவுக்கும் சீனாவுக்குமான ஒரு கடல் பாதையைத் தேடி கடடோலிய கிறிசுடோபர் கொலம்பசு 1492 ம் ஆண்டு அமெரிக்காவை வந்தடைந்தார். வைக்கிங்சு (Vikings) 500 ஆண்டுகளுக்கு முன்னர் ஒருமுறை வந்து தங்கிச் சென்ற பின்னர் முதன் முறையாக ஐரோப்பியர் இங்கு வந்தனர். அவர்களுக்கு இது ஒரு புது உலகம். விரைவில் எசுபானிய, பேர்த்துக்கீச, ஆங்கில, பிரான்சிய அரசுகள் ஆதரவுடன் நாடுபிடிப்பாளர்கள், நிறுவனங்கள் வட, தென் அமெரிக்காக்களை ஆக்கிரமித்தன.

ஐரோப்பியர் இங்கு வந்து அமெரிக்கா தம்மாலேயே கண்டுபிடிக்கப்பட்டது என்று தவறாக வரலாற்றை எழுதி வைக்க பல நூறு ஆண்டுகளுக்கு முன்னரே இங்கு பல நாடுகள், நாகரிகங்கள் இருந்தன. இன்கா, அசுரெக், மாயா போன்ற நகர மயப்படுத்தப்பட்ட நாகரிங்கள் நடு, தென் அமெரிக்காக்களில் இருந்தன. வட அமெரிக்காவின் கால நிலையை, சூழலை துல்லியமாகப் புரிந்து கொண்டு இயற்கையோ சேர்ந்து வாழ்ந்த பல இனக் குழுக்களின் நாடுகள் இருந்தன. தமது சொந்த அரசியல் பொருளாதார முறைமைகளையும், மொழிகளையும், பண்பாட்டையும், வாழ்வியலையும் இவர்கள் கொண்டிருந்தார்கள்.

ஐரோப்பியரின் வரவு இவர்களைச் சிதைத்தது. இனப்படுகொலையாலும், நோயாலும், தொடர்ச்சியான அடக்குமுறையாலும் பெரும்பான்மை அமெரிக்க முதற்குடிமக்களும், அவர்களின் நாடுகளும் அழிந்து போயின. எஞ்சியோர் ஒதுக்கப்பட்ட இடங்களில் (Indian reserve) வாழ அனுமதிக்கப்பட்டனர். இவர்களுடைய அடையாளத்தையும் ஐரோப்பியர் அதிகாரம் வைத்திருந்த அரசுகள் திட்டமிட்டு அழித்தன. இதனால் இவர்கள் தமது நிலங்களை, வாழ்வியலை, அறிவை, பண்பாட்டை, மொழிகளை இழந்த இனங்களாக ஆக்கப்பட்டனர். அரசியல், சமூக, பண்பாட்டு தளங்களில் தாழ்த்தப்பட்டனர். இவர்கள் அமெரிக்க கண்டங்களின் ஆதித் தமிழர்கள் அல்லது தலித்துக்கள் ஆயினர்.

ஆனால், அவர்கள் தமது உரிமைகளுக்காக தொடர்ந்து போராடினார்கள். இந்த போராட்டங்களின் ஊடாக தமது இயல்புகளை ஓரளவு மீட்டுத்து வருகிறார்கள். அவற்றுள் முக்கிய ஒன்றுத்தான் அவர்களது மொழிகள்.

முதல் ஐரோப்பிய தொடர்பின் போது அமெரிக்க முதற்குடிகள் பல மொழிக் குடும்பங்களைச் சார்ந்த 1500 மேற்பட்ட மொழிகளைப் பேசினர். இன்று 350 வரையான மொழிகள் பேச்சு வழக்கில் உள்ளன. சுமார் 40 மில்லியன் நடு, தென் அமெரிக்கர்கள் (10%) முதற்குடிமக்கள் மொழிகளைப் பேசுகிறார்கள். சுமார் ஒரு மில்லியன் வரையான ஐக்கிய அமெரிக்கா, கனடா வாழ் மக்கள் இந்த மொழிகளைப் பேசுகிறார்கள்.

முதற்குடிமக்கள் மொழிகளில் ஏழு மொழிகள் வரை மட்டுமே ஒரு மில்லியனுக்கு மேற்பட்ட மக்களால் பேசப்படுகின்றன. எந்த மொழியும் 8 மில்லியனுக்கு மேற்பட்ட மக்களால் பேசப்படவில்லை. இன்கா நாகரிகத்தின் மொழியான கெச்சா மொழி இன்று 6-8 மில்லியன் மக்களால் பொலிவியா, பெரு, எக்குவடோர் ஆகிய நாடுகளில் பேசப்படுகிறது. இதே நாகரித்தின் இன்னுமொரு மொழியான அய்மாரா மொழி சுமார் 2 மில்லியன் மக்களால் பேசப்படுகிறது. எசுபானியா ஆக்கிரமிப்பை தீவரமாக எதிர்த்த குவரனி மக்களின் மொழியான குவரனி இன்று ஐந்து மில்லியன் மக்களால் பேசப்படுகிறது. பராகுவேயில் இது கல்வி மொழியாகவும், ஆட்சி மொழியாகவும், அன்றாடம் பயன்படும் மொழியாகவும் மக்களால் பெருமையுடன் பயன்படுத்தப்படுகிறது. மாய நாகரிகத்தின் மொழியான கீச்சி சுமார் ஒரு மில்லியன் மக்களால் பேசப்படுகிறது. அசுரெக் நாகரிகத்தின் மொழியான நாகவற் 1.45 மில்லியன் மக்களால் பேசப்படுகிறது.

பண்டைய நாகரிங்களைச் சார்ந்த மொழிகள் எழுத்துமுறைகளைக் கொண்டிருந்தன. இதில் கணிதம், கட்டிடக்கலை, வானியல் உட்பட பல தரப்பட்ட தகவல்கள் தரப்பட்டுள்ளன. எனினும் பெரும்பான்மையான அமெரிக்க முதற்குடிமக்கள் மொழிகள் அண்மைக் காலத்திலேயே எழுத்து முறையைப் பெற்றன, அல்லது இன்னும் பெறவில்லை. பெரும்பான்மையான அமெரிக்க முதற்குடி மொழிகளின் எழுத்து முறைகள் இலத்தீன் எழுத்துக்களைப் பயன்படுத்துகின்றன.

வரலாற்றில் இனவழிப்புக்கு உள்ளான, இன்று மீண்டும் புத்துயிர் பெற முயலும் அமெரிக்க முதற்குடிமக்களின் மொழிகளின் விக்கிப்பீடியாக்களின் விபரங்கள் கீழே தரப்பட்டுள்ளன. 350 வரையான முதற்குடி மொழிகள் இன்று வழக்கில் உள்ளன. ஆனால், பெரிய முதற்குடி மொழிகள் சிலவற்றுக்கே விக்கிப்பீடியாக்கள் இன்னும் தொடங்கப்படவில்லை, அல்லது பரிசோதனையுல் உள்ளன. ஒரே ஒரு மொழி மட்டுமே 10 000 மேற்பட்ட கட்டுரைகளைக் கொண்டுள்ளது. 4 மொழிகள் மட்டுமே 1000 மேற்பட்ட கட்டுரைகளைக் கொண்டுள்ளன.

அமெரிக்க முதற்குடிமக்கள் பல தடைகளை எதிர் நோக்குகின்றார்கள். தென் அமெரிக்கா ஒரு வளர்ந்து வரும் உலகத்தைச் சார்ந்தது, எனவே இணைய வசதி ஒரு முக்கிய தடையாக உள்ளது. ஒரு சில நாடுகளைத் தவிர மற்ற நாடுகளில் அமெரிக்க முதற்குடி மொழிகள் கல்வி, அரசியல், வணிக மொழிகளாக இல்லை. தமது தாய் மொழியில் பேசத் தெரிந்தாலும், பெரும் விழுக்காட்டினருக்கு எழுதத் தெரியாது. இலக்கிய மரபு இல்லாமை, மொழிகளின் விருத்தி இன்மை போன்றைவையும் தடைகளாக உள்ளன.

தென் அமெரிக்க மொழிகள்
* கெச்சா மொழி - 6-8 மில்லியன் மக்கள் (பெரு, பொலிவியா, எக்குவடோர்) - 15656 கட்டுரைகள்
* பராகுவேயன் குவரனி மொழி - 5 மில்லியன் மக்கள் - (அர்சென்டீனா, பிரேசில்) - 1312 கட்டுரைகள்
* அய்மாரா மொழி - Aymara language - 2.25 மில்லியன் மக்கள் (பெரு, பொலிவியா, சிலி) - 910 கட்டுரைகள்
* K'iche' language - 1 மில்லியன் மக்கள் - (குவாத்தமாலா) - விக்கிப்பீடியா இல்லை
* Yucatec Maya language - 800 000 மக்கள் - (குவாத்தமாலா) - பரிசோதனை விக்கிப்பீடியா
* Q'eqchi' language - 500 000 மக்கள் - (குவாத்தமாலா_ - விக்கிப்பீடியா இல்லை
* Papiamento - 329 002 மக்கள் - (கரிபியன் தீவுகள்) - 842 கட்டுரைகள்
* Wayuu language - 305,000 மக்கள் - (வெனசுவேலா, கொலம்பியா) - பரிசோதனை விக்கிப்பீடியா
* Mapudungun language - 240,000 மக்கள் - (சிலி, அசென்டீனா ) - பரிசோதனை விக்கிப்பீடியா
* Miskito language - 180 000 மக்கள் - விக்கிப்பீடியா இல்லை
* Ticuna language - 40,000 மக்கள் - (பிரேசில்) - விக்கிப்பீடியா இல்லை

வட அமெரிக்க மொழிகள்
* நாகவற் மொழி - 1.45 மில்லியன் மக்கள் - (மெக்சிக்கோ) - 6295 கட்டுரைகள்
* Otomi language - 240,000 - (மெக்சிக்கோ) - பரிசோதனை விக்கிப்பீடியா
* Totonacan languages - 250 000 மக்கள் - (மெக்சிக்கோ) - விக்கிப்பீடியா இல்லை
* நாவகோ மொழி - 170 000 மக்கள் - (ஐக்கிய அமெரிக்கா) - 1424 கட்டுரைகள்
* கிறீ மொழி - 117 000 மக்கள் - (கனடா, ஐக்கிய அமெரிக்கா) - 119 கட்டுரைகள்
* Ojibwe language - 56 531 மக்கள் - (கனடா, ஐக்கிய அமெரிக்கா) - விக்கிப்பீடியா இல்லை
* இனுக்ரிருற் மொழி - 35 000 மக்கள் - (கனடா, கிறீன்லாந்து) - 391 கட்டுரைகள்
* செரியோக்கி மொழி - 22 000 மக்கள் - (ஐக்கிய அமெரிக்கா) - 219 கட்டுரைகள்
* லக்கோட்டா மொழி - 6 000 மக்கள் - (ஐக்கிய அமெரிக்கா) - பரிசோதனை விக்கிப்பீடியா

ஐரோப்பியரின் வருகை முன்பு பெரும் நாகரிகங்களையும், தனித்து இயங்கிய பல நாடுகளையும் இந்த புதிய உலகம் கொண்டிருந்தது. முதலில் ஐரோப்பியர் வந்த போது, அவர்களுக்கு இங்கு வாழக் கற்றுக் தந்தது இவர்களே ஆவார். இவர்களின் சமூகங்களிலும் போர், ஆக்கிரமிப்பு, அடக்குமுறை இருந்தது. ஆனால் ஐரோப்பியரின் வரவு இவர்களைத் சிதைத்தது. இவர்களின் மக்கள் தொகையைச் சரித்தது. இன்று அவர்கள் தங்களின் வாழ்வியல் கூறுகளை மீட்டெடுக்க, பேண மிகவும் சிரத்தை எடுக்கின்றனர். ஆனால் வரலாறு அவர்களின் எதிரியாக இருக்கிறது.

அன்று இவர்க்ளுக்கு நடந்து, தமிழர்களுக்கும் நடந்தது, இன்றும் நடக்கிறது. சுமார் 700 000 தமிழர்கள் தென் ஆபிரிக்காவில் தமது மொழி அறியாமல் உள்ளார்கள். இன்று இலங்கையில் தமது மொழி பேண உரிமை கூறி போராடிய தமிழர்கள் நசுக்கப்பட்டு, அவர்களது அடையாளங்கள் சிதைக்கப்படுகின்றன. உலக மயமாதலில் சிக்கி உள்ளே இருந்தே தொலைக்காட்சிகளும், மோகங்களும் எம்மை சிறிதாய் சிறிதாய் கொல்கின்றன. இலக்கியம் உண்டு என்ற போதையில் நமது மொழிக்கு அறிவியல் கற்றுக் கொடுக்க காலம் பிந்தி விட்டோம். இலக்கியம் உண்டு என்ற போதையில் எமது வாய்மொழிச் சொல்வங்களை நழுவி விட்டுக் கொண்டு இருக்கிறோம். தமிழ் என்று பெருமையாகக் கூறி விட்டு அதைப் பேச வெக்கப்படுகிறோம், அத மொழிக்கும் சமூகத்துக்கும் எம்மால் முடிந்த பங்களிப்பை செய்ய மறுக்கிறோம். மொழி இவ்வளவு முக்கியமா, சிந்திந்துப்போம், செயற்படுவோம்.

உசாத்துணைகள்
* Indigenous_languages_of_the_Americas
* The Indigenous Languages of Latin America

ஆப்பிரிக்க மொழிகளின் விக்கிப்பீடியாக்கள்

2010-08-22T08:33:00.000-07:00

மனித இனத்தின் வரலாறு ஆப்பிரிக்காவிலேயே தொடங்கியது. இன்று ஆப்பிரிக்காவில் உலகின் 15 வீத மக்கள் வாழுகிறார்கள். 54 நாடுகளையும் பல்வேறு இனக்குழுக்களையும் கொண்டுள்ள இந்த கண்டத்தில் 2000 மேற்பட்ட மொழிகள் பேசப்படுகின்றன.

நீண்ட காலமாக அரபிய, ஐரோப்பிய குடியேற்ற ஆதிக்கத்து உட்பட்டு மிகவும் பின் தங்கிய, அரசிய பொருளாதார வளம் அற்ற ஒரு சமூகமாக ஆப்பிரிக்கா உள்ளது. இன்றும் சீனா, மேற்குநாடுகள், அரபு நாடுகளின் சுரண்டிலில் இருந்து ஆப்பிரிக்கா மீளவில்லை. இதனால் ஆப்பிரிக்காவின் பெரும் பகுதி தமது வாழ்க்கை முறைகளையும், பாரம்பரிய அறிவையும், மொழிகளையும் இழந்து நிற்கிறது.

இன்று ஆப்பிரிக்காவில் குடியேற்றவாத பிரெஞ்சு, ஆங்கிலம், டச்சு, அரபு மொழிகளே பல நாடுகளில் ஆட்சி மொழிகளாகவும், வணிக கல்வி மொழிகளாகவும் உள்ளன. ஆப்பிரிக்கர்களின் மொழிகள் மிகவும் நலிந்த நிலையிலேயே உள்ளன. இந்த பின்புலத்திலேயே ஆப்பிரிக்க விக்கிப்பீடியாக்களின் இன்றைய நிலையை நாம் புரிந்து கொள்ள வேண்டும்.

ஆப்பிரிக்காவில் பேசப்படும் 2000 மேற்பட்ட மொழிகளில் 15 வரை மட்டுமே 10 மில்லியனுக்கு மேற்பட்ட மக்களால் பேசப்படுகின்றன. அந்த மொழி விக்கிப்பீடியாக்களின் விபரம் பின்வருமாறு.

* கிசுவாகிலி - (50+ மில்லியன் மக்கள் - கிழக்கு ஆப்பிரிக்கா) - 20, 046 கட்டுரைகள்
* அவுசா - (39 மில்லியன் மக்கள் - நைசர், நைசீரியா) - 154 கட்டுரைகள்
* சுலு - (26 மில்லியன் - தென் ஆப்பிரிக்கா) - 141 கட்டுரைகள்
* அம்காரிக் - (25 மில்லியன் - எதியோப்பியா) - 4509 கட்டுரைகள்
* ஒரொமோ - (25 மில்லியன் மக்கள் - எதியோப்பியா) - 207 கட்டுரைகள்
* யொரூபா - (25 மில்லியன் மக்கள் - நைசீரியா) - 9603 கட்டுரைகள்
* இக்போ - (25 மில்லியன் மக்கள் - நைசீரியா) - 658 கட்டுரைகள்
* அகன் - (19 மில்லியன் மக்கள் - கானா) - 113 கட்டுரைகள்
* சோனா - (17 மில்லியன் ? - சிம்பாப்வே) - 64 கட்டுரைகள்
* சோமாலி (16 மில்லியன் மக்கள் - சோமாலியா) - 1379 கட்டுரைகள்
* கின்யருவாண்டா (~12 மில்லியன் மக்கள் - உருவாண்டா) - 111 கட்டுரைகள்
* மலகாசி (10 மில்லியன் மக்கள் - மடகாசுகர்) - 2452 கட்டுரைகள்
* ஃபுலா - (10+ மில்லியன் - மேற்கு ஆப்பிரிக்கா) - 56 கட்டுரைகள்
* சுவா - (10 மில்லியன் - மலாவி) - 75 கட்டுரைகள்

மேலே உள்ள புள்ளி விபரங்களை நோக்கினால் ஒரே ஒரு ஆப்பிரிக்க மொழி விக்கிப்பீடியா மட்டுமே 20 000 கட்டுரைகளுக்கு மேல் கொண்டுள்ளது என்றும், மற்ற அனைத்தும் 10 000 கட்டுரைகளுக்கு குறையவே என்பதும் தெரியவருகிறது. மேலும் பெரும்பாலனவை 1000 கட்டுரை அளவையே எட்டவில்லை. பெரிய ஆப்பிரிக்க மொழிகளுக்கே இந்த நிலை என்றால், சிறிய ஆப்பிரிக்க மொழிகள் இன்னும் தொடங்கப்படவில்லை, அல்லது மிகக் குறைவான அளவு கட்டுரைகளையே கொண்டிருக்கும்.

ஆப்பிரிக்க மொழிகள் பெரும்பாலனவை அண்மைக் காலத்திலேயே எழுத்துமுறையைப் பெற்றவை. பெரும்பாலனவை இலத்தீன் எழுத்துக்களையே பயன்படுத்துகின்றன. எனவே தொழில்நுட்பம் இங்கு ஒரு தடையாக இல்லை.

ஆனால் ஆப்பிரிக்காவில் இணைய வசதி மிகக் குறைவு. பெரும்பான்மை மக்கள் இன்னும் போதிய கல்வி அறிவைப் பெறவில்லை. இவை இந்த விக்கிப்பீடியாக்களின் வளர்ச்சி ஒரு முக்கிய தடை.

பெரும்பாலான ஆப்பிரிக்க நாடுகளில் ஐரோப்பிய மொழிகளே அலுவல் மொழிகளாக உள்ளன. கல்வி கற்றோர் ஐரோப்பிய மொழி விக்கிப்பீடியாக்களைப் பயன்படுத்தி, அல்லது அவற்றுக்கு பங்களித்து ஆப்பிரிக்க மொழிகளைப் புறக்கணித்து இருக்கலாம்.

ஆப்பிரிக்க மொழிகள் பல எழுதப்பட்ட இலக்கிய மரபு அற்றவை. இதனால் உரைநடை, அல்லது எழுத்து மொழி விருத்தி பெறாமல் இருககலாம். இந்த நிலை விக்கிப்பீடியாவின் வளர்ச்சிக்கு ஒரு தடையாக இருக்கலாம்.

ஆப்பிரிக்க மொழிகளின் இந்த நிலைமை அந்த கண்டத்தின் அரசியல் பொருளாதார நிலைக்கு ஒத்தது. சிறிய, ஆனால் பலம் மிக்க இசுரேல் நாட்டின் எபிரேய மொழியில் ஒரு இலட்சத்துக்கு மேலான கட்டுரைகள் உள்ளன. ஆனால் பல மில்லியன் மக்கள் பேசும் ஆப்பிரிக்க மொழிகளிலேயே ஆயிரம் கட்டுரைகள் வரை கூட இல்லை என்பது இந்தப் புறக் காரணிகளாலேயே. ஆப்பிரிக்க மொழிகளின் நிலை இந்திய மொழிகளுக்கும் ஓரளவு பொருந்தும். இதை விட மிக மோசமான நிலையில் இருப்பவை அமெரிக்க முதற்குடிமக்களின் மொழிகள் ஆகும்.

ஆப்பிரிக்க விக்கிப்பீடியாக்களில் நிலைமை தனித்துவம் மிக்க மொழிகளும், அவை சார்ந்த அறிவும் பண்பாடும் அழிந்து வருகின்றன என்பதை சுட்டுகின்றது. தமிழர்கள் தமிழ் மொழியையும், அது சார்ந்த அறிவையும், பண்பாட்டையும் மேலும் உறுதியுடன் பாதுகாக்க, மேம்படுத்த இது ஒரு எச்சரிக்கையாக அமைகிறது. இது மொத்த மனித இனத்தின் தேவையாகவும் அமைகிறது.

உசாத்துணைகள்:
* http://meta.wikimedia.org/wiki/List_of_Wikipedias
* http://en.wikipedia.org/wiki/Languages_of_Africa

பஞ்சாபி மொழியும், பஞ்சாபி விக்கிப்பீடியாக்களும்

2010-08-16T18:13:00.000-07:00

இந்திய மொழிகளில் இந்தி, வங்காளத்துக்கு அடுத்த படியாக அதிக மக்கள் பேசும் மொழி பஞ்சாபி ஆகும். உலகில் சுமார் 100 மில்லியனுக்கு மேற்பட்ட மக்கள் பஞ்சாபி மொழியைப் பேசுகிறார்கள். பாகிசுத்தானில் 76 மில்லியன் மக்களும், இந்தியாவில் 29 மில்லியன் மக்களும், ஐக்கிய இராச்சியத்தில் 2.3 மில்லியன் மக்களும், கனடாவில் 1.1 மில்லியன் மக்களும் இந்த மொழியைப் பேசுகிறார்கள். மேலும் பல மேற்கு, மத்திய கிழக்கு நாடுகளில் பஞ்சாபி பேசும் மக்கள் வாழுகிறார்கள். இந்தியாவிலும், பாகிசுத்தானிலும் மாநில மொழிகளாக இது உள்ளது. சீக்கிய சமயத்தின், பஞ்சாபி மக்களின் பண்பாட்டின் மொழியாக இது உள்ளது. ஆனால் இந்த மொழி விக்கிப்பீடியாக்களின் நிலை மிக மோசமானது.

கிழக்குப் பஞ்சாபி மொழி சமசுகிருத சொல்வாக்குக்கு உட்பட்டது. இது தேவநாகரி எழுத்து முறையிலும், குருமுகி எழுத்து முறையிலும் எழுதப்படுகிறது. மேற்கு பஞ்சாபியில் அரபு, பாரசீக மொழிகளின் செல்வாக்கு அதிகம். அதனால் மேற்குப் பஞ்சாபி உருது மொழி எழுதப்படும் எழுத்து முறைக்கு ஒத்த எழுத்து முறையில் எழுதப்படுகிறது. இதனால் கிழக்கு பஞ்சாபி விக்கிப்பீடியா, மேற்கு பஞ்சாபி விக்கிப்பீடியா என இரு விக்கிப்பீடியாக்கள் உள்ளன. ஒரு தரப்படுத்தப்பட்ட எழுத்து முறை இல்லாதது பஞ்சாபி மொழியை இரு அல்லது முப்பெரும் தீவுகளாக ஆக்கி உள்ளது. இந்த நிலை தமிழ், மலையாள நிலைக்கு ஒத்தது.

தற்போது கிழக்கு பஞ்சாபி மொழியில் 1923 கட்டுரைகளும், மேற்கு பஞ்சாபி மொழியில் 5390 கட்டுரைகளும் விக்கிப்பீடியாக்களில் உள்ளன. மிகக் குறைந்த நிலை பங்களிப்பையே இரு விக்கிப்பீடியாக்களும் பெறுகின்றன. இதற்கு அரசியல், மொழியியல், சமய காரணங்கள் உள்ளன.

பஞ்சாபி மொழி பல வட்டார வழக்குகளாகவும், பல எழுத்துமுறைகளையும் கொண்டிருப்பது பஞ்சாபி மொழியின் வளங்களைச் சிதறடிக்கிறது. அவர்கள் திறமையாக கூட்டியங்குவதைத் தடுக்கிறது.

பாகிசுத்தானில் அதிகம் பேசப்படும் மொழி பஞ்சாபி என்றாலும், அங்கு சமய அரசியல் காரணங்களால் உருதும், ஆங்கிலமுமே தேசிய மொழிகளாக ஆக்கப்பட்டன. பஞ்சாபி மொழியில் கல்வி பெறுவது பாகிசுத்தானிலும், இந்தியாவிலும் சிரமமானது, அருகி வருகிறது. திரைப்படத்துறையிலும் பஞ்சாபி வலுவாக இல்லை.

இந்திய தரவெடுப்பில் பல இந்து பஞ்சாபிகள் அவர்கள் தாய் மொழி பஞ்சாபி என்றாலும், தாம் இந்தி என்று கூறுகிறார்கள். சீக்கியர்கள் பஞ்சாபியை ஒரு சமய மொழியாக முன்னிறுத்தியதே பஞ்சாபி இந்துக்குக்கள் இப்படிக் கூற ஒரு முக்கிய காரணம். இன்று பஞ்சாபி பேசுபவர்கள் இந்தி மொழி பேசுபவர்களுக்குள் உட்படுத்தப்பட்டு, இந்தியாவில் இந்திக்கு ஆதரவான ஒரு மொழிக் கொள்கையை உருவாக்க உதவிற்று. இதனால் பஞ்சாபி மொழியும் பாதிக்கப்பட்டது.

அரசியலால், சமயத்தால், மொழியியல் போதாமைகளால் சிதறடிக்கப்பட்ட ஒரு மொழியாகவே பஞ்சாபி உள்ளது. அதன் ஒரு வெளிப்பாடே பஞ்சாபி விக்கிப்பீடியாக்கள். ஆனாலும் அங்காக்கே பஞ்சாபி மொழியை புதுப்பிக்க, பாதுக்காக்க, வளர்க்க அமைப்புகள் பாடுபடுகின்றன. இவர்கள் எந்தளவு வெற்றி பெறுகிறார்கள் என்பதற்கு விக்கிப்பீடியாக்கள் அறிகுறியாக அமையும்.

ஆதாரங்கள்
* Language Conflict and National Development: Group Politics and National Language Policy in India
* List of Wikipedias
* Punjabis Without Punjabi
* The Future of Punjabi
* Punjabi: story of a script’s decline

தமிழில் பல்லூடக ஆவணப்படுத்தல்

2010-08-10T18:24:00.000-07:00

தமிழின், தமிழரின், பிறரின் வரலாற்றை, கலைகளை, நுட்பங்களை, அறிவியலை எண்மிய பல்லூடக முறையில் தமிழில் ஆவணப்படுத்திப் பகிர்வது தமிழ்ச் சமூக வளர்ச்சிக்குத் தேவையான முக்கிய செயற்பாடுகளில் ஒன்று. சங்க காலம், சோழ-பாண்டிய பேரசுக் காலங்களை நோக்குகையில் தமிழர்கள் பல் துறைகளில் உயர்ந்த அறிவைப் பெற்றிருந்ததை அறிய முடிகிறது. உலக நாகரிகங்களில் ஒரு முக்கிய ஊற்று தமிழர்களுடையது. ஆனால் தமிழர்கள் வெல்லப்பட்டு அடக்கி வைக்கப்பட்டபோது நாம் எமது அறிவை இழந்தோம். எமது ஆவணப்படுத்தலின், பாதுகாத்தலின் போதாமைகளும் எமது அறிவை நாம் இழக்கக் காரணமாயின. இதனால் நாம் பண்பாட்டு, அரசியல், பொருளாதார முனைகளில் பல பாதிப்புக்களைச் சந்தித்தோம்.

எனினும் பிற பல மொழிகள் போல் அல்லாமல் தமிழுக்கு தொன்று தொட்டே எழுதப்பட்ட இலக்கியங்கள் உண்டு. கல்வெட்டுக்கள், சிலைகள், கட்டிடங்கள், தொல்பொருட்கள் ஆகியவை தமிழர் அறிவியலைச் அறிய உதவும் சான்றுகளாக உள்ளன. வாய் மொழி இலக்கியம், கலைகள், தொழில்கள் தமிழிர் அறிவின் வாழும் ஆதாராங்களாக உள்ளன. இன்று இந்த அறிவு எண்மிய பல்லூடக முறையில் ஆவணப் படுத்தப்படுவது ஒரு முக்கிய தேவையாக உள்ளது.

19 ம் நூற்றாண்டில் ஏட்டில் இருந்தல் தமிழ் இலக்கியங்கள் அச்சுப் பதிக்கப் பட்டமை தமிழரின் மறுமலர்ச்சிக்கு ஒரு வளமாக அமைந்தது. 20 ம் நூற்றாண்டில் பலர் மேற்கொண்ட நாட்டாரியல் ஆய்வுகள் எமது பழமொழிகளை, பாடல்களை, வழக்கங்களை, இன்னும் பல கூறுகளைப் பதிவு செய்து தமிழ்ச் சமூகத்தின் உயர்நாடி ஒன்றைப் பாதுக்காத்தது. ஆனால் இதே போன்ற செயற்பாடுகள் தமிழர் தொழில்நுட்பங்கள், அறிவியல் நோக்கிச் செயற்படுத்தப்படவில்லை. இன்று எமது சூழல், அது சார்ந்த உற்பத்திகள் பற்றி நாம் கொண்டிருந்த இயல்பான அறிவை இழந்து நிற்கிறோம். மீண்டும் மேற்குநாடுகள் வழியே இயற்கை வேளாண்மை, பேண்தகு மீன்பிடிப்பு, மர வேலை, கட்டிடக்கலை போன்ற அறிவுகளை அறிய தள்ளப்பட்டிருக்கிறோம். இனியும் காலம் தாழ்த்தாமல் நாம் எமது அறிவை அவணப் படுத்தல் அவசியமாகும்.

எமது அறிவு மட்டும் அல்லாமல் வேகாமாக மாறும் உலகின் பல்துறை அறிவும் தமிழில் உருவாக்கப்பட வேண்டும். உலகில் பரந்து வாழும் தமிழர்கள் அந்த அந்த நாட்டு புவியியல், பண்பாடு, கலைகள், இலக்கியங்கள் பற்றி மட்டும் அல்லாமல், அங்கு உள்ள சமூக அமைப்புகள், சட்டங்கள், தொழில்நுட்பங்கள் பற்றிய அறிவையும் பகிர வேண்டும். இது எமக்கு இன்று இருக்கும் ஒரு அரிய வாய்ப்பு.

இந்த அறிவுகளை நாம் இணையம் மூலம், பல்லூடக வழிகளில் ஆவணப் படுத்திப் பகிர வேண்டும். இன்று காட்சி ஊடகமே முக்கியம் பெற்று வருகிறது. பல பத்திகளில் சொல்வதை, ஒரு காட்சியில் காட்டி விட முடியும். ஒலிக் கோப்பு (audio), நிகழ்படம் (video), இயங்குபடம் (animation), நிகழ்த்தல் (ppt), படங்கள் (images), தரவுகள் (data), எழுத்து (text) என எண்மிய பல்லூடக முறையில் நாம் ஆவணப் படுத்தி, எளிய முறையில் பகிர வேண்டும்.

இந்த கூட்டறிவு ஆவணப் படுத்தலை, உற்பத்தியை நாம் கூட்டாக, பரவலான முறையில், சேர்ந்தியங்க உதவும் நுட்பங்களைப் பயன்படுத்திச் செய்யலாம். எமது விளைச்சல்களை கூட்டாக உரிமைப் படுத்தி அனைவரும் பயன் பெறலாம்.

இந்த செயற்பாடுகளில் தமிழ் விக்கியூடகங்கள், மதுரைத் திட்டம், நூலகத் திட்டம், தமிழ் மரபு அறக்கட்டளை போன்ற பலர் செயற்படுகிறார்கள். இவற்றில் பல நிறைகளும் குறைகளும் உள்ளன. இவற்றை மேம்படுத்தி, மேலும் பல களங்களை அமைக்க வேண்டியது எமது இன்றைய தேவையாகிறது.

மலையாளம், தமிழ், இந்தி விக்கிப்பீடியாக்களின் இன்றைய நிலை

2010-08-02T11:02:00.000-07:00

இந்திய மொழிகளில் மலையாளம், தமிழ், இந்தி ஆகியவை கட்டுரைகள் எண்ணிக்கை, தரம், பயனர் எண்ணிக்கை, பயனர் பங்களிப்பு ஆகிய மதிப்பீடுகளின் அடிப்படையில் முன்னிலையில் நிற்கின்றன. இவற்றை ஒப்பிட்டு வேறுபடுத்தி கருத்துக் கூறுவதே இந்த பதிவின் நோக்கம்.

தமிழ், மலையாளத்தை விட அதிக கட்டுரைகளைக் கொண்டிருக்கும் தெலுங்கு விக்கிப்பீடியாவின் (45,209) தற்போதைய பங்களிப்பு நிலை, தரம், வளர்ச்சி ஆகியவை நன்றாக இல்லை. தொடக்கத்தில் வேகமாகச் செயற்பட்டு வந்த வங்காள விக்கியும் தற்போது தேக்க நிலையிலேயே உள்ளது. மாராத்தி விக்கியில் 30 000 வரையாக கட்டுரைகள் உள்ளன என்று புள்ளிவிபரம் தெரிவித்தாலும், பல ஒரு வசனம் அல்லது சொல் உள்ள வெற்றுப் பக்கங்கள். குசராத்தி, கன்னடம், பஞ்சாபி உட்பட்ட இந்திய மொழிகள் இன்னும் தொடக்க கட்ட வளர்ச்சிப் பருவத்தையே அடையவில்லை. இந்த பின்புலத்திலேயே மலையாளம், தமிழ், இந்தி ஆகிய மொழிகளின் நிலைகளை நாம் ஆய வேண்டும்.

இன்று தரம், பயனர் பங்களிப்பு ஆகியவற்றின் அடிப்படையில் முன்னிலையில் இருப்பது மலையாள விக்கிப்பீடியா ஆகும். 13, 500 வரையான கட்டுரைகளையே கொண்டிருந்தாலும், தர அடிப்படையில் (கட்டுரைகளின் ஆழம் = 373) மலாயாள விக்கிப்பீடியாவே முதல் நிலையில் உள்ளது. 207 தீவர பங்களிப்பாளர்களையும், 17 நிர்வாகிகளையும் மலையாள விக்கிப்பீடியா கொண்டுள்ளது. மலையாள விக்கியின் தொகுப்புகளின் எண்ணிக்கை 864,594 ஆகும். எனவே ஒரு சராசரி கட்டுரை பல முறை விரிவாக்கப்பட்டு, சரிபார்க்கப்பட்டு தொகுக்கப்படுகிறது. தற்போது 47 பயனர்கள் மிகத் தீவரமாகப் பங்களிப்புச் செய்து வருகிறார்கள்.

இன்று தரம், பயனர் பங்களிப்பு ஆகியவற்றின் அடிப்படையில் இரண்டாம் நிலையில் இருப்பது தமிழ் விக்கிப்பீடியா ஆகும். தமிழ் விக்கிப்பீடியா 23,520 கட்டுரைகளைக் கொண்டிருக்கிறது. குறுங்க் கட்டுரைகளே பெரும்பான்மையாக இருந்தாலும், தனி வரிக் கட்டுரைகளோ அல்லது அதிக தானுந்துக் (bot articles) கட்டுரைகளே தமிழ் விக்கியில் இல்லை. ஒரு குறிப்பிட்ட விழுக்காட்டுக் கட்டுரைகள் நல்ல வளர்ச்சி பெற்ற கட்டுரைகள். பகுப்புமைப்பும், ஒழுங்கமைப்பும் தமிழ் விக்கியில் சிறப்பாக உள்ளது. தமிழ் விக்கியில் 222 தீவர பங்களிப்பாளர்களும், 15 நிர்வாகிகளும் உள்ளார்கள். தமிழ் விக்கியின் தொகுப்புகளின் எண்ணிக்கை 577,558 ஆகும். எனவே ஒரு சராசரி கட்டுரை சில முறைகளே தொகுக்கப்படுகின்றன. தற்போது 45 பயனர்கள் மிகத் தீவரமாகப் பங்களிப்புப் செய்து வருகிறார்கள்.

இன்று கட்டுரைகள் எண்ணிக்கை, பயனர் பங்களிப்பு, எதிர்கால வளர்ச்சிக் குறிகள் அடிப்படையில் இந்திய மொழிகளில் இந்தி மூன்றாம் நிலையில் உள்ளது. 55,729 கட்டுரைகளுடன் இந்திய மொழிகளில் அதிக கட்டுரைகளை இந்தியே கொண்டுள்ளது. எனினும் இவற்றில் பெரும் விழுக்காடு ஒரு வரிக் கட்டுரைகள், அல்லது ஒரே துறை தானுந்துக் (இந்தியாவில் உள்ள இடங்கள்) கட்டுரைகள். 240 தீவர பங்களிப்பாளர்களும், 24 நிர்வாகிகளும் இந்தி விக்கியில் உள்ளார்கள். எனினும் தற்போது 25 பயனர்களே மிகத் தீவரமாகப் பங்களிப்புச் செய்து வருகிறார்கள்.

இந்தி மொழியை சுமார் 350 மில்லியன் மக்கள் தாய் மொழியாக கொண்டுள்ளார்கள். மேலும் நூறு மில்லியனுக்கு மேற்ப்பட்ட மக்கள் தமது இரண்டாம் மொழியாக கொண்டுள்ளார்கள். மொத்த இந்தியாவின் ஒரேயொரு இந்திய அலுவல் மொழி இந்தி ஆகும். எனவே இந்திய மொழிகளில் இந்திக்கே தற்போது அதிக மக்கள், அரச வளங்கள் உள்ளன. எதிர்காலத்தில் அதிக வளர்ச்சி பெறுவதற்கு இந்தி விக்கிப்பீடியாவிற்கு அதிக வாய்ப்புக்கள் உள்ளன. எனினும் அதன் தற்போதைய நிலை மிக மோசமானது. 240 பங்களிப்பாளர்களில் 24 நிர்வாகிகளாகப் பெறுப்பேற்றிருப்பது பொறுப்புப் பரவலாக்கலைக் காட்டுகிறது. அது நல்ல அறிகுறி எனினும், அடிப்படைப் பங்களிப்பாளர்களின் எண்ணிக்கை இன்னும் பல மடங்காக இருக்க வேண்டும்.

36 மில்லியன் மக்களால் பேசப்படும், கேரளாவில் மட்டும் அலுவல் மொழியாக பயன்படுத்தப்படும் மலையாளம் தர, பங்களிப்பு அடிப்படையில் முன்னிற்கு நிற்பது வியக்கத்தக்கது. கேரள மக்கள் 95 % படிப்பறிவு பெற்றுள்ளமை, அவர்களுக்கு தீவர இலக்கியத்தின் மேல் உள்ள ஆர்வம் போன்ற சூழல் காரணிகள் இதை ஓரளவு விளக்கலாம். நாள் தோறும் அதிகம் தொகுக்கப்படும் இந்திய விக்கி மலையாள விக்கியே. அவர்கள் திறமையாக கூட்டாகச் செயற்படுகிறார்கள். நிர்வாப் பொறுப்பும் பரவாலாக உள்ளது.

இந்தி மொழிக்கு அடுத்த படியாக அதிக வளங்களைக் கொண்டுள்ள மொழி தமிழே. நான்கு நாடுகளில் (இந்தியா, இலங்கை, சிங்கப்பூர், மலேசியா) அரச ஆதரவு உண்டு. 66 மில்லியன் மக்கள் தாய் மொழியாக தமிழைப் பேசுகிறார்கள். 74% மேற்பட்ட தமிழ்நாட்டுத் தமிழர்களும், 90% மேற்பட்ட ஈழத் தமிழர்களும் படிப்பறிவு பெற்றவர்கள். இந்த அடிப்படைகளில் தமிழ் விக்கியின் வளர்ச்சி போதாது. குறிப்பாக மலையாள விக்கியுடன் ஒப்பிடும் போதே இந்தக் குறை தெளிவாகத் தெரிகிறது. நாளாந்த தொகுப்புகள், நிர்வாகப் பரவல் ஆகியவற்றில் வளர்ச்சி போதாது.

இன்று கூகிளில் இந்திய மொழிகளில் சொற்களை இட்டால், அதன் முதல் 10 தரவுகளில் விக்கிப்பீடியாக் கட்டுரைகள் இடம் பெறுகின்ற்னா. எனவே விக்கிப்பீடியாக்களின் பெறுமதி கணிசமானது. தற்போது விக்கியூடக அறக்கட்டளை இந்திய விக்கிகளை வளர்ப்பதில் கூடிய அக்கறை காட்டுகிறது. அதை நாம் பயன்படுத்தி மேலும் வளர வேண்டும். எல்லாவற்றுக்கும் மேலாக நாம் அனைவரும் எமக்கு ஈடுபாடுள்ள துறைகளில், எமக்கேற்ற முறையில் (ஆக்கம், திருத்தம், படம் சேர்த்தல், பராமரிப்பு) எங்கிருந்தாலும் பங்களிப்பைச் செய்ய வேண்டும்.

குறிப்புகள்/தரவுகள்:
* மேலே குறிப்பிட்ட தரவுகள் ஆகத்து 2, 2010 நாளில் பெறப்பட்டவை.
* http://meta.wikimedia.org/wiki/List_of_Wikipedias
* மலையாள விக்கித் தரவுகள்

Youths spread awareness of Tamil on the web

2010-06-26T23:30:00.000-07:00

இந்து நாளிதழ் செய்தி: Youths spread awareness of Tamil on the web

தமிழ் விக்கிப்பீடியா கட்டுரைப் போட்டி 2010 முடிவுகள்

2010-06-20T11:36:00.000-07:00

தமிழ் விக்கிப்பீடியா கட்டுரைப் போட்டி 2010 முடிவுகள்

கல்லூரி மாணவர்களுக்கான கட்டுரைப் போட்டி. தமிழ் விக்கிப்பீடியா - தமிழ்நாடு அரசு இணைந்து நடத்துகிறது

2010-03-31T23:06:00.000-07:00

தமிழகக் கல்லூரி மாணவர்களுக்கான கட்டுரைப் போட்டி ஒன்றைத் தமிழ் விக்கிப்பீடியாவும் தமிழ்நாடு அரசும் இணைந்து நடத்துகிறோம்.

விவரங்களுக்கு, கட்டுரைப்போட்டிக்கான வலைவாசல் பக்கத்தில் அறியலாம்.

நன்றி.

தமிழ் விக்கிப்பீடியா விக்கிபீடியாவில் கூகிள் மொழிபெயர்ப்பு கருவி கொண்டு பதிவிடல்

2009-12-27T08:19:00.000-08:00

விக்கிபீடியாவில் ஆங்கில பக்கங்களை தமிழில் மொழிப்பெயர்த்து எழுதுவோர்க்கான பதிவு . தற்போது கூகிள் நிறுவனம் மொழிபெயர்ப்பு செய்வதற்கான ஒரு மென்பொருள் தன்னை வெளியிட்டு உள்ளது . இது பெரும்பாலோனோருக்கு தெரிந்தது தான் . இந்த மொழிபெயர்ப்பு கருவிஇன உதவியுடன் முதலில் தமிழ் விக்கிபீடியாவில் எழுதியவர் திரு.wikitrans . அவ்வாறு இந்த மொழிபெயர்ப்பு கருவியை அனைவரும் பயன்படுத்த வேண்டும் என்பதே இந்த பதிவின் நோக்கம் .

இதனால் நமது பெரும் அளவில் நன்மை உள்ளதாக இருக்கிறது . Google indic transileration என்ற மென்பொருளை போலவே இந்த Google Translator Toolkit என்ற மென்பொருளும் பயன்படுத்துவோர்களின் திருத்தங்களை பதிவு செய்து கொண்டு எது ஏற்றது என்று அறிந்து செயல்படுமாறு உள்ளது . இந்த கருவியை பயன் படுத்துவதால் நமக்கு பின்னர் இதை பயன் படுதுவோர்களுக்கு ஏதுவாக உள்ளது .

இந்த மொழிபெயர்ப்பு கருவி பல நுட்பங்களை கொண்டுள்ளது . அவை ஒவ்வொன்றாக வருமாறு .

முதலில் , இந்த Google Translator Toolkit என்ற மென்பொருளின் முகப்பு பகுதிக்கு செல்ல http://translate.google.com/toolkit/list#translations/active என்ற தளத்திற்கு சென்று உள் நுழைந்து கொள்ள வேண்டும் .

பின்னர் அங்கே upload என்ற பொத்தானை அழுத்த வேண்டும் . பின்வரும் பக்கத்தில் நான்கு tab கள் இருக்கும் . அதில் Wikipedia article என்ற tab யை அழுத்த , வருகின்ற கட்டங்களை நிரப்ப வேண்டும் .

முதல் கட்டத்தில் , நாம் மொழிபெயர்க்கும் கட்டுரையின் பெயர் அல்லது அதன் URL யை பதிவிட வேண்டும் . URL தெரியவில்லை என்றால் . ( ஆங்கில அல்லது பிற மொழி ) விக்கி பீடியா விற்கு சென்று நீங்கள் மொழி பெயர்க்க நினைக்கும் கட்டுரையை தேர்ந்து எடுத்து பின்னர் அந்த URL யை copy செய்து paste செய்ய வேண்டும் .

பின்னர் இரண்டாவது கட்டத்தில் , அந்த கட்டுரையின் தலைப்பை மொழி பெயர்த்து எழுத வேண்டும் .

மூன்றாவது கட்டத்தில் , நீங்கள் தேர்ந்து எடுத்த ( முதல் கட்டத்தில் குறிப்பிட்ட ) கட்டுரை எந்த மொழியென்று அறிந்து , தேர்வு செய்ய வேண்டும் .

நான்காவது கட்டம் , tamil .

( sharing பற்றி பின்னர் காணலாம் ) .

பின்னர் , Upload for Translation என்ற பொத்தானை அழுத்த வேண்டும் .

இதற்கு பின்னர் தான் , நாம் தமிழாக்கம் செய்ய தொடங்க போகிறோம் .

இப்பொழுது நீங்கள் காண்பது மொழிபெயர்ப்பு மேடை . வலது (left) புறத்தில் இருப்பது நீங்கள் தேர்ந்து எடுத்த மொழியின் கட்டுரை . இடது (right) புறத்தில் இருப்பது தமிழ் மொழியில் அரைகுறையாக மொழிபெயர்க்க பட்ட கட்டுரை . நாம் இப்பொழுது முழுமையாக மொழிபெயர்க்க போகிறோம் . நாம் திருத்தங்கள் செய்வதெல்லாம் இடது புறத்தில் தான் . இந்த மேடையில் நாம் முக்கியமாக கவனிக்க வேண்டியது , இடது புறத்தில் மேலே உள்ள ஒரு எண்ணிக்கையை தான் . அது எத்தனை விழுக்காடு மொழி பெயர்க்க பட்டுள்ளது என்பதனை குறிப்பிடுகிறது . பெரும்பாலும் , அனைத்து கட்டுரைகளும் 8 முதல் 12 விழுக்காடு வரை இருக்கும் . இது ஏனென்றால் , தமிழில் கூகிள் இடம் இன்னும் நல்ல அகராதி இல்லை . மேலும் , இதனை தமிழாக்கத்துக்கு பயன்படுத்தும் ஆட்கள் குறைவு . ஆகையால் , நாம் இதனை பயன்படுத்த பயன்படுத்த இந்த விழுக்காடு கூடிக்கொண்டே போகும் . உதாரணமாக , ஆங்கில கட்டுரையான rose என்ற கட்டுரையை upload செய்தீர்கள் ஆனால் , அதில் 68 விழுக்காடு இருக்கும் . இதற்கு காரணம் wikitrans என்பவர் இதனை தமிழாக்கம் செய்துவிட்டார் . இது 80 விழுக்காடில் இருந்து 68 விழுக்காடாக குறைக்க பட்டு உள்ளது . ஏனென்றால் , 12 விழுக்காடுகள் இன்னும் உறுதி செய்ய படவில்லை . இவ்வாறு நாம் தொடர்ந்து பயன்படுத்துகையில் , தமிழ் அகராதியும் , தமிழ் வாக்கிய மொழிபெயர்ப்பும் கூகிள் தானியங்கியால் அறியப்பட்டு அதனை திறம்பட மாற்றிக்கொள்ள உதவுகிறது . இதில் blog யை போலவே கூட்டு சேர்ந்து மொழி பெயர்க்கலாம் . ஒருவர் மொழியர்த்த வாக்கியங்களை , உடனே நாம் பார்த்து கொள்ளலாம் . ஏற்கனவே இந்த வாக்கியத்தை ஒருவர் மொழிப்பெயர்த்திருந்தால் , அதனை இந்த கருவி பரிந்துரைக்கும் . நீங்கள் மொழி பெயர்த்த வாக்கியம் அல்லது சொல் மற்றவர்களால் காண முடியும் . இவ்வாறு நாம் அனைவரும் ஒருவகையில் மொழி பெயர்க்கவும் , மற்றவர்களுக்கு உதவவும் முடியும் .

இதனால் , இன்று gmail , hotmail போன்ற மின்னஞ்சல் களில் வேறு மொழியில் வந்த செய்தியை படிக்க மொழி பெயர்ப்பு கருவி இருக்கிறது அல்லவா ? அதில் தமிழ் மொழியும் இடம் பெரும் . நாம் இணைந்து செயல் படுவதினாலும் , கூகிள் இன் செயல் பாட்டினாலும் தான் இது சாத்தியம் ஆகும் .

பின்னர் Google toolbar , என்ற மென்பொருளை பயன்படுத்தி , எந்த ஒரு இணையத்தளத்திலும் உள்ள எந்த ஒரு சொல்லையும் , தமிழ் மொழியில் பொருள் விளக்கம் அறிந்து கொள்ள முடியும் .

இன்னும் எத்தனையோ பயன் பாடுகள் உள்ளது . எல்லாமே இந்த கருவியை பயன்படுத்தினால் மட்டுமே சாத்தியம் . பின்னர் என்னதான் நாம் முக்கினாலும் , ஆங்கில விக்கி யை பிடிக்க முடியாது . ஆனால் ஆங்கில விக்கியை விட வேகமாக பதிவிட முடியும் . எல்லாமே இந்த Google traslator toolkit தான் உள்ளது .

இப்போதான் நான் தொடங்கி உள்ளேன் . இன்னும் இதன் பயன் பாடுகள் நிறைய உள்ளன . அதற்கு முன் , 90 விழுக்காடுகளுக்கு மேல் மொழி பெயர்த்த பின்னர் என்பதனை பார்ப்போம் . அது ஒரு நொடியில் நடந்து ஏறிவிடும் . மொழியாக்க மேடையில் , இடது புறத்தின் மேலே Share என்ற பொத்தானில் உள்ள Publish to Source Page என்பதை அழுத்தினால் போதும் . தமிழ் விக்கி ப்பீடியாவிற்கு தானே சென்று விடும் .

கருவிகள்

நாம் இப்பொழுது Google Translator Toolkit என்ற மென்பொருளின் கருவிகளை பற்றி தெரிந்து கொள்வோம் .

இந்த மென்பொருளானது பயனர்களுக்கு ஏற்றாற்போல் சில நுட்பமான கருவிகளை தந்தளிக்கின்றது . இதனை பயன்படுத்த நாம் முதலில் இடது புறத்தின் மேலே உள்ள Show Toolkit என்ற பொத்தானை அழுத்தி வைத்திருக்க வேண்டும் . அவ்வாறு அழுத்துகையில் , நமது மொழியாக்க மேடையில் கீழ் புறத்தில் ஒரு கருவிப் பகுதி தோன்றும் . இந்த பகுதியில் நான்கு tab கள் இருக்கும் . அவை ,

1. Translation Search Results

2. Computer Translation

3. Glossary (0)

4. Dictionary

1. Translation Search Results :

இதை பற்றி தெரிந்து கொள்ளவதற்கு முதலில் ஒரு அடிப்படையை தெரிந்து கொள்வது அவசியம் . அதாவது , நான் முன்பே கூறியுள்ள படியே , நாம் இந்த மொழியாக்க மேடையில் திருத்தம் செய்வது எப்பொழுதும் இடது பக்கத்தில் மட்டுமே . வலது பக்கத்தில் திருத்தம் செய்வது இயலாது . மேலும் , அவ்வாறு இடது புறத்தில் திருத்தங்கள் அல்லது மொழிப்பெயர்ப்பு செய்வதாயினும் , அது ஒவ்வொரு வரியாகத்தான் மொழியாக்கம் செய்ய இயலும் . இதன் படி , இடது புறத்தில் நீங்கள் திருத்தம் செய்யும் வரிகளை சுற்றி ஒரு சாளரம் எப்பொழுதும் இருந்து கொண்டே இருக்கும் . அதே போன்று , நீங்கள் மொழியாக்கம் செய்யும் வரிக்கு இணையான ஆங்கில மற்றும் பிறமொழியின் வலது புற வரிகள் மஞ்சள் நிறத்தில் காட்ட பட்டிருக்கும் . இது பயனர்களுக்கு தெரிந்திருக்க வேண்டிய அடிப்படையாகும் . ( தமிழில் எழுத இடது புறத்தின் மேலே உள்ள அ என்ற பொத்தானை அழுத்தி இருக்க வேண்டும் ) .

இப்பொழுது நாம் Translation Search Results என்ற கருவியை பயன்படுத்தும் முறைகளை காண்போம். இது ஒரு தேடல் கருவி . இது தானாகவே தேடிக்கொண்டு காண்பிக்கும் கருவியாகும் . இது , இடது புறத்தில் உள்ள வரிகளில் எந்த வரிகளை நாம் தேர்ந்து எடுத்திருக்கிறோமோ அந்த வரிகளை கொண்டு தேடும் கருவி . இது முன்பு யாரேனும் இதே வாக்கியத்தையோ அல்லது ஒரு சொற்களையோ மொழியாக்கம் செய்திருந்தால் அதனை தேடி கொண்டு வந்து காண்பிக்கும் . நீங்கள் மொழியாக்கம் செய்ததினையும் காண்பிக்கும் . அவ்வாறு கண்டறிந்த தேடல்கள் ஒவ்வொன்றிக்கும் கீழே Use Translation என்ற பொத்தான் இருக்கும் . அந்த மொழியாக்கம் சரியானதாக இருந்தால் அந்த பொத்தானை அழுத்தி அதை பயன்படுத்திக் கொள்ளலாம் . ஒரு சொல்லாக இருந்தால் copy paste செய்து கொள்ளலாம் .

2. Computer Translation

இது தானியங்கியல் மொழிபெயர்க்க படுபவை . இவை கூகிள் வைத்திருக்கும் தானியங்கியால் மொழிபெயர்த்தவை . இது பயனர்கள் மொழி பெயர்த்த எதனையும் சார்ந்திருக்காது .

3. Glossary (0)

இதுதான் நமது களஞ்சியம் . கூகிள் நிறுவனம் பயனர்கள் வசதிக்கேற்ப இந்த Glossary என்ற இணைப்பை உருவாக்கியுள்ளது . இதனால் நாம் ஏதேனும் technical terms பதிவுசெய்து கொள்ளலாம் . இதன் பின்னொட்டாக சுழியம் என்ற எண்ணிக்கை இருக்கும் . இந்த எண்ணிக்கை நமது சொற்க் களஞ்சியத்தில் இருந்து எத்தனை சொற்கள் அல்லது வாக்கியம் பொருந்துகிறது என்பதாகும் . இதனால் நாம் மொழிபெயர்ப்பு செய்திடுகையில் உடனடியாக நாம் குறிப்பினை பார்த்துக்கொள்ளலாம் . நாம் இங்கே நமது wikkionary சேர்த்து வைத்தால் மொழிபெயர்க்கும் பொழுது தமிழ் வார்த்தை தேடல் என்பதை முற்றிலும் தவிர்க்கலாம் . நமது தமிழ் சொற்க் களஞ்சியத்தை .csv கோப்பையாக excel உருவாக்கி சேர்க்கலாம் .

4. Dictionary

இவை கூகிள் அகராதியில் இருந்து பொருந்தும் சொற்களை காண்ப்பிக்கும் பகுதி . இந்த அகராதி தற்போது கூகிள் நிறுவனம் தனி வழியாகவே வெளியிட்டு உள்ளது .

தமிழ் உங்களின் தெரிவு

2009-11-29T09:29:00.000-08:00

தமிழ் மொழியைப் பயன்படுத்துவதும், மேம்படுத்துவதும் ஒவ்வொரு தமிழருக்கும் உள்ள ஒரு தெரிவு, முடிவு. மொழி ஒரு நாட்டின் குடியுருமை போல் அல்ல, பிறந்தால் பெறுவதற்கு. பெற்றோர் தமிழ், அதனால் நான் தமிழ் என்ற மொழி அடையாளம் வலுவானதல்ல. தமிழ் ஒரு கட்டாய மொழியாக எங்கும் இல்லை. தமிழ்நாட்டில் ஆங்கிலத்தில், இலங்கையில் சிங்களத்தில், மலேசியாவில் மலேய மொழியில் ஒருவர் தனது கல்வியைப் பெறலாம். தமிழ் முற்றிலும் உமது தெரிவு.

தமிழ் ஒரு சமுதாய மொழி. ஒரு மூதை நாகரீகத்தின் உயிர்த் துடிப்பு. சிந்தனை ஊற்றுக்களின், கலைகளின் களம். தமிழ் கற்பதால் பொருளியல் நோக்கில் நீங்கள் பெறுவது சிறிதே. சமுதாய, மொழியியல், கருத்து நோக்கில் நீங்கள் நன்மைகள் பெற முடியும். இதே நன்மைகளை நீங்கள் பிற மொழிகளைக் கற்றும் பெற முடியும். என்றாலும் இன்று பெரும்பான்மைத் தமிழர்களின் மொழியாக தமிழ் இன்னும் உள்ளது.

மலேசியாவில் வெளிவரும் தமிழ் ராக் இசை, தமிழ்நாட்டில் நடைபெறும் தமிழ் அறிவியல் கருத்தரங்கம், சிங்கப்பூரில் மேடையேற்றப்படும் தமிழ் நாடகம், மொரிசியசில் நடைபெறும் தமிழ் வகுப்பு, அமெரிக்காவில் நடைபெறும் தமிழ்ச் சங்க மாநாடு, இலண்டனில் வெளியாகும் தமிழ் ராப் இசை, இலங்கையில் ஆக்கப்படும் தமிழ் மின்னூலகம், பிரான்சில் வெளிவந்த அறிவுக்களஞ்சியம், அமீரகத்தில் நடைபெறும் தமிழ் கணினிப் பயிலரங்கம், கனடாவில் நடைபெறும் கலைச்சொல்லாக்கம், யேர்மனியில் நடைபெற்ற தமிழ் இணைய மாநாடு என பல மில்லியன் மக்களின் தெரிவாக தமிழ் உள்ளது.

எனினும் மாறிவரும் பொருளாதார, அரசியல் சூழல் தமிழை இடர் நிலைக்கு தள்ளி வருகிறது. தமிழ் தமிழருக்கு ஒரு தெரிவாக இருக்கும் வாய்ப்பு அருகி வருகிறது. மொழியியல் நோக்கில் தற்காலத் தேவைகளுக்கும், அறிவியல் கருத்துப் பரிமாற்றத்துக்கும் தமிழ் மொழியின் வளர்ச்சி போதாமல் உள்ளது. எல்லாவற்றுக்கும் மேலாக தமிழைத் தேர்ந்து, தமிழில் பேசுவோரை இழிக்கும் கூட்டம் பெருகி வருகிறது. தமிழ் ஒரு காட்டுமிராண்டி மொழி, அடிப்படைவாதிகளின் மொழி என்று அடையாள அரசியலில் சிக்கவைத்து சிதறடிக்கப்படுகிறது.

எமது மொழியை நாம் வளப்படுத்த வேண்டும். விரும்புவோர் எல்லோரும் கற்க வாய்ப்புக்கள் தொடர்ந்து பேணப்பட வேண்டும். உங்களின் தெரிவாகத் தமிழ் இருந்தால், தமிழ் வெல்லும்.

தமிழ் விக்கியின் 20 000 கட்டுரைகள் மைல்கல்

2009-11-22T07:18:00.000-08:00

தமிழ் விக்கிப்பீடியா 20 000 கட்டுரைகளை நவம்பர் 22, 2009 இல் தாண்டியது. இது ஒரு குறிப்பிடத்தக்க வளர்ச்சி. இன்று இணையத்தில் பல்துறைத் தகவல்களைப் பகிரும் பெரும் தமிழ் வலைத்தளம் தமிழ் விக்கிப்பீடியா ஆகும். ஒருங்குறியில் தமிழில் தேடினால் பல குறி சொற்களுக்கு தமிழ் விக்கிப்பீடியாவின் கட்டுரைகள் முதல் தேர்வாக வருகின்றன. இந்திய மொழிகளில் 1.5 கிபைட் மேற்பட்ட கட்டுரைகள் எண்ணிக்கையில் தமிழ் முதலாவதாக உள்ளது. மேலும் தகவல்களுக்கு Regional analysis of South Asian languages and their Wikipedias.

மேற்கூறியது நல்ல வளர்ச்சி எனினும் தமிழின் வளங்களுடன் ஒப்பிடுகையில் போதாது. தமிழ் பேசும் மக்கள் தொகை (70+ மில்லியன்) அடிப்படையில், மொழியியல் (2000 ஆண்டுகளுக்கு மேற்பட்ட இலக்கண, இலக்கிய வளர்ச்சி) நோக்கில் தமிழ் வளங்கள் நிறைந்த மொழி. இப்படிப்பட்ட வளங்கள் குறைந்த பல ஐரோப்பிய, ஆசிய மொழிகளை விட தமிழ் தேக்க நிலையில் உள்ளது. இதற்கு காரணங்கள் என்ன.

தமிழ் விக்கிப்பீடியா இன்னும் பெரும்பான்மைத் தமிழ் இணையச் சமூகத்துக்கோ, அல்லது பொதுத் தமிழ்ச் சமூகத்துக்கோ அறிமுகம் ஆகவில்லை. பெரும்பான்மைத் தமிழ் மக்களுக்கு இணைய இணைப்பு இன்னும் இல்லாமையே முதன்மைக் காரணம் ஆகும். அப்படி இருந்தாலும் தமிழ்க் கணிமை பற்றி அறிந்திராமை இன்னுமொரு காரணம். இந்த ஆண்டு தொடக்கம் முதல் தமிழ் விக்கிப்பீடியாவை அறிமுகம் செய்ய பல செயற்பாடுகளில் நாம் ஈடுபட்டு வருகிறோம்.

தமிழ் விக்கிப்பீடியாவை பஞ்சாபி, வங்காளம், இந்தி போன்ற வளங்கள் நிறைந்த இந்திய மொழிகளுடன் ஒப்பிடுதல் தகும். இந்த ஒப்பிடுதலில் இருந்து தெரிவது என்னவென்றால், அனைத்து இந்திய மொழி விக்கிப்பீடியாக்களும் அதிக வளர்ச்சி அடையாத திட்டங்களாகவே உள்ளன. பஞ்சாபி மொழியில் விக்கிப்பீடியா இன்னும் முறையாக தொடங்கப்படவே இல்லை. வங்காள மொழியில் கடந்த இரண்டு ஆண்டுகளாக தேக்க நிலை நிலவுகிறது. இந்தி தற்போது நன்கு வளர்ச்சி பெற்று வருகிறது, ஆனால் அவர்களின் வளங்களோடு ஒப்பிடுகையில் போதாது. மலையாளம் விக்கி மட்டும் இந்திய மொழிகளில் குறைந்த வளங்களோடு நன்கு வளர்ச்சி பெற்று வருகிறது. அவர்களது தரம் சிறந்தது. ஆனால் தற்போது 11 400 வரையான கட்டுரைகளையே கொண்டுள்ளது.

தமிழ் விக்கிப்பீடியாவை தொடந்து பரந்த உலகளாவிய தமிழ்ச் சமூகத்து அறிமுகப்படுத்த நாம் திட்டமிட்டுள்ளோம். இதற்கு உங்கள் பங்களிப்பையும் நீங்கள் நல்க வேண்டும்.

தமிழ்மணத்துக்கு நன்றி

2009-10-31T23:00:00.000-07:00

2009ஆம் ஆண்டு முழுவதுமே தமிழ் விக்கிப்பீடியா பற்றிய விழிப்புணர்வு பரப்பும் பல்வேறு முயற்சிகளில் ஈடுபட்டு வருகிறோம். தமிழ்மணம் நட்சத்திர வாரத்தின் மூலம் இன்னும் பல புதியவர்களைச் சென்றடைந்திருக்கிறோம். தமிழ்மணம் நட்சத்திர வாரத்தில் இது வரை திட்ட வலைப்பதிவுகள், கூட்டு வலைப்பதிவுகள் இடம்பெற்றுள்ளனவா தெரியாது. இந்த வாய்ப்பை முன்வந்து நல்கிய தமிழ்மணம் நிருவாகத்தினருக்கு எங்கள் நன்றியைத் தெரிவித்துக் கொள்கிறோம்.

தமிழ்மணம் ஒரு திரட்டியாக மட்டுமல்லாது, பல்வேறு தமிழ், தமிழர் நலன் சார் பணிகளிலும் தன்னை ஈடுபடுத்தி வருகிறது. 2005 ஆண்டு முதலே தமிழ் விக்கித் திட்டங்களுக்குத் தமிழ்மணத்தில் தொடுப்புகள் தந்துள்ளார்கள். இரா. செல்வராசு போன்ற தமிழ்மண உறுப்பினர்கள் விக்கிப்பீடியாவில் பங்களிப்பாளர்களாகவும் உள்ளனர். நா. கணேசன் வாய்ப்பு கிடைக்கும் களங்களில் எல்லாம் தமிழ் விக்கிப்பீடியாவை அறிமுகப்படுத்துகிறார். தமிழ்மணம் ஆதரவு அளிக்கும் இணையப் பட்டறைகளில் முனைவர். மு. இளங்கோவன் அவர்கள் தமிழ் விக்கித் திட்டங்களுக்குப் பயிற்சி அளிக்கிறார். சென்னை விக்கிப்பீடியா பயிற்சிப் பட்டறைக்கு, தமிழ்மணம் முகப்பில் அறிவிப்பு இட்டு விளம்பரப்படுத்தி உதவினார்கள்.

இது போல் பல வகைகளிலும் தமிழ்மணம், தமிழ் விக்கிப்பீடியா திட்டங்களுக்கு நல்கியுள்ள ஆதரவுக்கும் தொடரும் பங்களிப்புகளுக்கும் எங்கள் உளமார்ந்த நன்றியைத் தெரிவித்துக் கொள்கிறோம்.

[விக்கிப்பீடியா] விக்கிபீடியாவில் ஒரு சமூக வலையமைப்பு அனுபவம்

2009-10-29T23:00:00.000-07:00

இணைய உலகிலும் தமிழ் இணையச்சூழலிலும் சமூக வலையமைப்புச் சேவைகள் மிகப்பெரிய வெற்றியைப் பெற்றிருக்கின்றன.

Facebook, Twitter போன்றவற்றில் இணையாத இணையத்தமிழர்கள் இல்லையென்று ஆகியிருக்கிறது.

ஆட்கள் இணையச் சமூக வலையமைப்புக்களில் இவ்வளவு ஆர்வம் காட்டுவதற்கான காரணங்கள் பல்வேறு தளங்களில் மிக ஆழமாக ஆய்வு செய்யப்பட்டு வருகிறது. ஏராளம் ஆய்விலக்கியங்களும் இது தொடர்பாகக் கிடைக்கிறது.

மேலோட்டமாகப் பார்த்தால், மற்றவர்களுடன் தொடர்பாடுதல், வாழ்க்கையில் சிறு சிறு சுவாரசியங்களை ஏற்படுத்தல், பலரோடும் எம்மை அறிமுகப்படுத்திக்கொள்ளல், எமது இரசனைகளைத் திறமைகளை பலர் மத்தியில் வெளிப்படுத்தல் போன்றவற்றுக்கான இடமாகச் சமூக வலையமைப்புத்தளங்கள் காணப்படுகின்றமை இவை மீதான தீராத ஆர்வத்துக்கு காரணமாகின்றன.

வலைப்பதிவுகளில், Facebook இல் எல்லாம் இந்த "சமூக வலையமைப்பு அனுபவ"மும் எம்மை ஈர்த்து வைத்திருக்கும் முதன்மைக்காரணி.

மனமகிழ்ச்சியான, ஆரோக்கியமான, பயன்மிக்க "சமூக வலையமைப்பு அனுபவம்" விக்கிபீடியாவிலும் கிடைக்கிறது.

இதனை அனுபவித்துப்பார்த்தவர்களுக்கு அது புரியும்.

விக்கிபீடியாவின் செயற்பாடுகளின் அடிப்படையாக இழையோடும் சனநாயகத்தன்மையும், மற்றவரை மதிக்கும் பண்பும் இந்த விக்கிபீடியாச் சமூக வலையமைப்புக்கு மனமகிழ்ச்சிதரும் தன்மையை வழங்குகிறது.

விக்கிபீடியாவின் பயனர் பேச்சுப்பக்கங்களிலும் ஒவ்வொரு கட்டுரைகளின் உரையாடற்பக்கங்களிலும் ஆலமரத்தடியிலும் விக்கிபீடியர் சமூகம் உரையாடுகிறது.

வெறும் உரையாடல் அல்ல, கூடித்தொழில் செய்துகொண்டு செய்யும் ஆரோக்கியமான பணியொன்றைச்சார்ந்த உரையாடல் அது.

முதற் பயனர் பெயரை உருவாக்கி முதற்கட்டுரை போட்ட உடனே பலகாரத்தட்டுடன் உங்களை வரவேற்பதில் அந்த "சமூக வலையமைப்பு அனுபவம்" தொடங்குகிறது.

நீங்கள் உருவாக்கும் கட்டுரைகள் உங்கள் ஆர்வத்துக்குரிய பரப்பை கட்டாயம் இனம் காட்டும். அந்தப்பரப்பில் ஆர்வமுள்ள மற்றய விக்கிபீடியர்கள் உங்களுடன் தொடர்பாடத்தொடங்குவர். படிப்படியாக அது ஏனைய விக்கிபீடியர்களுடனான தொடர்பாடலாய் விரிந்து புதிய நண்பர்களும் பயன்மிக்க தொடர்புகளுமாய் வியாபகம் கொள்ளும்.

உங்கள் பயனர் பக்கம் உங்கள் ரசனைப்படி நீங்களே வடிவமைத்துக்கொள்ளத்தக்க ஓர் அருமையான profile page. அதன் உரையாடற்பக்கம் நீங்கள் அன்றாடம் ஆர்வத்துடன் பார்க்கத்தூண்டும் மற்றவர்கள் உங்களோடு உரையாடும் "Wall".

அண்மைய மாற்றங்கள் பக்கம் ஒவ்வொரு மணித்தியாலமும் உங்களைத்தன்பக்கம் ஈர்த்துப் பார்க்கத்தூண்டும் சுவாரசியமான Social News Feed.

பங்களிக்கப் பங்களிக்கத்தான் நீங்கள் அந்த அனுபவத்தின் ஆழத்தை நோக்கிச் செல்வீர்கள்.

ஏனைய சமூக வலையமைப்புத் தளங்களில் உங்கள் சொந்த விபரங்களை, ரசனைகளை காட்சிப்படுத்தி உரையாடுவீர்கள்; விக்கிபீடியாவில் உங்களால் உருவாக்கப்படும் கலைக்களஞ்சியக் கட்டுரை ஒன்றை முன்னிறுத்தி உரையாடுவீர்கள்.

இந்த விக்கிப்பீடியா இணையச்சமூக வலையமைப்பின் மூலம் உங்களுக்குக் கிடைக்க ஆரம்பிக்கும் நண்பர்கள் இணையத்தில் உறுதியான பணிகளைச் செய்யும் ஆர்வத்துடன் வந்தவர்களாக இருப்பர்.

நண்பர்களுடனான அரட்டை, பொழுதுபோக்கினூடு நீங்கள் நின்று நிலைக்கக்கூடிய சமூகப்பணி ஒன்றையும் செய்துகொண்டு செல்வதே இங்கே இருக்கும் முதன்மை வேறுபாடு.

உங்கள் கட்டுரை மற்றவர்களால் திருத்தப்பட்டு வளர்த்தெடுக்கப்பட்டுச் செல்வதையும், மற்றவர்களுடைய கட்டுரைகளை நீங்கள் திருத்தி, மேலதிக தகவல்களைத் தேடிச்சேர்த்து அக்கட்டுரை வளர்ந்து செல்வதையும் பார்ப்பது இனிய அனுபவம். இதனை Facebook Farming இற்கு ஒப்பிடலாம்.

இணையத்தில் மட்டுமல்லாது இந்தச்ச்மூக வலையமைப்பு தரையிலும் விரியும் இயல்புள்ளது.

விக்கிபீடியா அறிமுகக்கூட்டங்களை, நிகழ்ச்சிகளைச் சிறியளவில் நடத்துவது.
விக்கிப் பட்டறைகளைச் சேர்ந்து நடத்துவது,

விக்கிபீடியர் சந்திப்புக்களைச் சிறு தேனீர் விருந்துடன் ஒழுங்கமைப்பது,
மற்றவர்களுக்கு விக்கிக்கு பங்களிக்கும் வாய்ப்புக்களை விளக்குவது என்று தரையிலும் மகிழ்ச்சியுடன், மதிப்புடன் சமூகத்தின் வலையமைப்பில் இணையும் வாய்ப்பினையும் விக்கிபீடியா வழங்குகிறது.

பல்வேறு சமூக வலையமைப்புத்தளங்களிலும் மற்றவர்களோடு கலந்து இன்புறுபவர்கள், மாறுபட்ட, வேறான அனுபத்தைத்தரக்கூடிய விக்கிபீடியா எனும் சமூக வலையமைப்பிலும் இணைந்து பாருங்கள்.

[தமிழ் விக்கிப்பீடியா] விக்கிப்பீடியாவின் வரலாறு

2009-10-29T08:00:00.000-07:00

நுபீடியா என்ற இலவச இணைய கலைக் களஞ்சியப் பணியில் பணிபுரிந்த ஜிம்மி வேல்ஸ் மற்றும் லாரி சாங்கர் துவக்கியதுதான் விக்கிப்பீடியா. வேல்ஸ் எவரும் பங்களிக்கக்கூடிய வகையில் கட்டமைக்கப்பட்ட கலைக்களஞ்சியம் உருவாக்கும் இலக்குகளை தீர்மானிக்க,சாங்கர் அந்த இலக்கினை அடைய விக்கி மென்பொருளை பயன்படுத்தும் திட்டத்தை வழிவகுத்தார். "நான் ஒரு பத்தி எழுதி ஒரு கட்டுரையை துவக்க,வல்லுனர்கள் அதனை விரிவாக்கி எனது பத்தியையும் சரியாக்குவர்" எனக் கூறினார் லாரி சாங்கர். இவ்விதமாக சனவரி 15,2001இல் ஆங்கில மொழியில் மட்டும் பதிப்பித்த விக்கிப்பீடியா பிறந்தது.அதன் நடுநாயகமான நடுநிலைநோக்கு கொள்கை மற்றும் பிற கொள்கை வழிகாட்டல்கள் நுபீடியாவில் கடைபிடிக்கப்பட்ட கொள்கைகளை யொட்டி உருவாக்கப்பட்டன.

துவங்கிய ஆண்டின் இறுதியிலேயே 18 மொழிகளில் 20,000 கட்டுரைகளைக் கொண்டிருந்தது. 2002இன் இறுதியில் 26 மொழிகள்,2003இன் இறுதியில் 46 மொழிகள்,2007ஆம் ஆண்டின் இறுதியில் 161 மொழிகள் என வேகமாக பல மொழிகளில் இது ஓர் இயக்கமாக வளர்ந்தது. இணையாக வளர்ந்த நுபீடியாவின் வழங்கிகள் 2003ஆம் ஆண்டு எடுத்துக் கொள்ளப்பட்டு, முழுவதுமாக விக்கிப்பீடியாவில் இணைக்கப்பட்டது.ஆங்கில விக்கிப்பீடியாவில் செப்டம்பர் 9,2007 அன்று 2 மில்லியன் கட்டுரைகளைக் கொண்டு உலகின் கூடுதலான கட்டுரைகளைக் கொண்ட கலைக்களஞ்சியமாக யங் கலைக்களஞ்சியம் 1407 ஆண்டு முதல் 600 ஆண்டுகளாகக் கொண்டிருந்த சாதனையை முறியடித்தது.

விளம்பரங்களும் வணிக நோக்கங்களும் விக்கிப்பீடியாவின் இலக்குகளை கட்டுப்படுத்தாது இருக்கும் வகையில் வேல்ஸ் 2002ஆம் ஆண்டு விக்கிப்பீடியா.ஓர்க் என்ற தளத்திற்கு நகர்த்தி விளம்பரங்கள் எதுவும் இன்றி இயங்க வழிவகுத்தார். விக்கிப்பீடியாவின் கொள்கை தடைவிதிக்கும் முதல் ஆய்வுகளை தடங்கல்களாக கருதிய சிலர் விக்கி இன்ஃபோ தளத்தை துவங்கினர். இதே போன்று அறிஞர் மீளாய்வு, முதல் ஆய்வுகள் அனுமதி மற்றும் பிற வணிக காரணங்களுக்காக சிடிசென்டியம், ஸ்காலர்பீடியா, கன்சர்வபீடியா, கூகிளின் நால் (Knol) போன்றவை உருவாகின.

3 மில்லியன் கட்டுரைகளை ஆகத்து 2009இல் எட்டிய ஆங்கில விக்கிபீடியா 2007 ஆண்டுக்குப் பிறகு சற்றே தனது வேகத்தை இழந்துள்ளது.

தமிழ் விக்கிப்பீடியா

தமிழ் விக்கிப்பீடியா தளம் ஆங்கில இடைமுகத்துடன் இருந்த நிலையில் ஓர் பெயர் தெரிவிக்காத நபரால் செப்டம்பர் 30,2003ஆம் ஆண்டு துவங்கியது. நவம்பர் 2003இல் தமிழ் விக்கிப்பீடியாவின் முன்னோடியாகக் கருதப்படும் மயூரநாதன் தளத்தின் இடைமுகத்தை 95% தமிழாக்கினார்.நவம்பர் 12,2003இல் ஐக்கிய இராச்சியத்தில் வசித்த அமல்சிங் என்ற பயனர் ஆங்கில தலைப்புடன் முதல் தமிழ் கட்டுரையை உள்ளிட்டார்.மயூரநாதன் தொடர்ந்து பணியாற்றி 2760 கட்டுரைகள் வரை உள்ளிட்டுள்ளார்.2004ஆம் ஆண்டு முதல் சற்றே சூடு பிடிக்க துவங்கி மெதுவாக வளரத் தொடங்கியது. தற்போது 19690 கட்டுரைகள் கொண்டுள்ளது.இடைப்பட்ட ஆண்டுகளில் தமிழ் விக்கி அடைந்துள்ள வளர்ச்சியை இணைத்துள்ள வரைபடத்தில் காணலாம்.தமிழ் விக்கி குறித்த முழுமையான ஆய்வினுக்கு சுந்தரின் இந்தக் கட்டுரையைக் காணவும்.

[தமிழ் விக்கிப்பீடியா] தன்னார்வத் தமிழிணையத் திட்டங்களுக்குப் பங்களிப்பு குறைவாக இருப்பது ஏன்?

2009-10-29T02:00:00.000-07:00

தமிழ் இணையத் தன்னார்வலக் கூட்டு முயற்சித் திட்டங்களில் பங்களிப்புகள் குறைவாக இருப்பது ஏன்?

ஒவ்வொரு நாளும் திட்டத்தில் பங்கு கொண்டு ஒரு மணி நேரமாவது செலவிடுபவர்கள், அது குறித்த பெருமளவு சிந்தனைகளைச் சுமந்து திரியும் முனைப்பான பங்களிப்பாளர் எண்ணிக்கை ஒவ்வொரு திட்டத்திலும் விரல் விட்டு எண்ணத்தக்க அளவிலேயே இருக்கிறது.

எட்டு கோடித் தமிழர் இருக்கிற போது ஏன் இந்த ஒற்றைப் படை நிலை?

இந்தக் குறைவான எண்ணிக்கை தமிழ் இணையத் திட்டங்களுக்கு மட்டும் உள்ள நிலை இல்லை. மக்கள் தொகையைக் கணக்கில் கொண்டால், சமூகத்தில் நிகழ்வாழ்க்கையில் மேற்கொள்ளப்படும் பல கூட்டு முயற்சி, தன்னார்வல, இலாபநோக்கற்ற திட்டங்களுக்கும் கூட பங்களிப்பு குறைவே. நிகழ் உலகத்தில் பங்களிப்புக் குறைவுக்கு காரணமாக இருக்கும் பணமின்மை, நேரமின்மை, மனமின்மை, திறனின்மை போன்ற அத்தனைக் காரணங்களும் இணையத்துக்கும் பொருந்தும்.

எட்டு கோடித் தமிழரில் போர்ச் சூழலால் அல்லல்படும் பல இலட்சம் ஈழத் தமிழர்களை விடுவோம்.

அவர்களைத் தவிர்த்து, உணவு, உடை, உறைவிட, பிற இன்றியமையா வாழ்க்கைத் தேவைகள் முடிந்து, நிம்மதியாக வாழும் தமிழர்கள் எத்தனை பேர்?

(இவர்களில் பாதி மக்கள் தொகையான பெண்கள் தொகையைக் கழித்து விடலாம். இது வரை இது போன்ற திட்டங்களில் முனைப்புடன் இயங்கும் பெண் பங்களிப்பாளரைக் கண்டதில்லை. அவர்களை அப்படி பங்களிக்க விடாத சமூகக் காரணிகள் எவ்வளவோ உள)

எஞ்சியவர்களில் முழு நேர கணினி, வேகமான அளவற்ற இணைய இணைப்பு உள்ளோர் எத்தனை பேர்? அலுவலகத்தில் நாள் முழுக்க கணினியைக் காண்பவர்கள் பலர் ஓய்வு நேரத்திலும் கணினி முன் அமர விரும்புவதில்லை. அதையும் பொருட்படுத்தாது வருபவர்களுக்கு, இணையத்தில் நுட்பத் தடையும் சேர்ந்து கொள்கிறது. எடுத்துக்காட்டுக்கு, விக்கிமீடியா திட்டங்களில் பங்களிக்க விரும்புபவர்களுக்கு மீடியாவிக்கி மென்பொருளைப் புரிந்து கொள்வதில் தொடக்கக் காலச் சிரமங்கள் இருக்கின்றன.

அவர்களில் கல்வி கற்ற தமிழார்வமுள்ளோர் எத்தனை? மேற்கண்ட வசதிகளைப் பெற்று இருந்தாலும் பொழுது போக்குக்காக அணுகுபவர்களும் பலர்.

அவர்களில் இத்திட்டங்களுக்குப் பங்களிக்கும் ஓய்வு நேரம், வயது, மனநிலை, வேகம், திறன் வாய்க்கப்பெற்றவர்கள் எத்தனை பேர்?

அப்படி பங்களிப்பவர்களுக்கு உதவியாகத் தமிழிணையத்தில் தமிழில் கிடைக்கும் தகவல் ஆதாரங்கள் எவ்வளவு?

... என்று யோசித்துக் கொண்டே போனால், இத்திட்டங்களுக்கு உள்ள பங்களிப்புக் குறைபாடுகளைப் புரிந்து கொள்ள முடிகிறது.

தமிழ், தமிழிணையத் திட்டங்கள் வளர, தமிழ்ச் சமூகம் வளர வேண்டியது முதற் தேவையாக இருக்கிறது.

தமிழ்நாடு, ஈழத்தில் இருந்து வரும் பங்களிப்புகளை விட பிற மாநிலங்கள், நாடுகளில் நல்ல வாழ்க்கைச் சூழல், உறவுகள் / நட்புகள் குறுக்கிடா ஓய்வு நேரம் வாய்க்கப் பெற்றவர்கள் கூடுதல் பங்களிப்புகளை அளிப்பதைக் காணலாம்.

தொலைநோக்கின்மை

ஒவ்வொரு நாளும் பல ஆயிரம் குழந்தைகள் பசியால், ஊட்டக்குறைவால் இறக்கிறார்கள். ஆனால், ஆழ்துழாய்க் கிணறில் அகப்பட்ட ஒற்றைச் சிறுவனைத் தான் நாள் முழுதும் ஊடகங்கள் கவனிக்கின்றன. அரசுகளும் கவனிக்கின்றன. கண்ணுக்குத் தெரியாமலும் கொஞ்சம் கொஞ்சமாகவும் நிகழும் பிரச்சினையானாலும் சரி பயனாலும் சரி அவை நம்மை ஈர்ப்பதில்லை.

அதே போல் இந்தத் திட்டங்களின் தொலைநோக்குத் தேவையை நாம் உணர்வதில்லை. இன்று இத்திட்டம் முழுமையடையாவிட்டால் பெரிய இழப்பு ஒன்றும் இல்லை என்ற எண்ணம் பலரை அதற்கானப் பங்களிப்பை ஒத்திப் போடச் செய்கிறது. "நாம் செய்யும் சிறு பங்களிப்பா பெரிய வேறுபாட்டை நல்கப் போகிறது" என்று எண்ணச் செய்கிறது.

நான்

"நான்" என்ற உணர்வு அனைவரிடமும் மேலோங்கி இருப்பதும் ஒரு முக்கியத் தடை. வெற்றிகரமான கூட்டு முயற்சித் திட்டங்களின் அடிப்படையே ஒருவரின் பங்களிப்பை இன்னொருவர் எந்த வகையிலும் மாற்றி அமைக்கலாம் எனபதும் அம்மாற்றங்கள் நன்னோக்கிலேயே இருக்கும் என்ற புரிதலும் எதிர்ப்பார்பும் தான். ஆனால், தான் தந்த ஒன்றை எப்படி மாற்றலாம், குறை கண்டுபிடிக்கலாம் என்று எண்ணுவோரும், எந்த விதத்திலும் தங்கள் பங்களிப்பு குறித்து உரையாடி மேம்படுத்திக் கொள்ள முனையாதோரும் உளர்.

மாற்றங்களை அனுமதிப்பவர்களும் தங்கள் பெயர் ஏதாவது ஒரு வகையில் பெரிதாகக் காட்சிப்படுத்தப்பட வேண்டும் என்று எண்ணுகிறார்கள். ஆயிரக்கணக்கானோர் சேர்ந்து பங்களிக்க வேண்டிய திட்டங்களில் இது சாத்தியமில்லை என்பது ஒவ்வொரு பங்களிப்பாளரும் தங்கள் உழைப்புக்கு ஏற்ற பாராட்டு கிடைக்காமல் போவதாக எண்ணலாம்.

தொல்லைத் தலைவர்

ஒரு திட்டத்தை முன்னின்று தொடங்கிச் செய்பவரோ, திட்டத்தில் முன்னணி பங்களிப்பாளராக இருக்கும் ஒருவரோ திட்டத்தைத் தன்னோடு தொடர்புப் படுத்தி ஒட்டு மொத்தப் பெயரையும் தட்டிச் செல்ல முனைவதும், ஊக்கமுடன் வரும் புதியவர்களைப் புறக்கணிப்பதும் உண்டு. மிகவும் முக்கியமான திட்டங்களில் இந்தச் செயற்பாடு இருந்தால், அது இன்னொரு புதிய திட்டத்துக்கு வித்திட்டு பங்களிப்பைச் சிதறச் செய்யும். முக்கியமில்லாத திட்டங்களில் மற்றவர்கள் பங்களிக்காமல் அமைதியாக இருந்து விடுவார்கள்.

திட்டத்தின் தனித்துவம், தேவை

இணையத்தில் ஒரு கட்டற்ற கலைக்களஞ்சியத்துக்கு இருந்த தேவை ஒரு அகரமுதலி, செய்திச் சேவைக்கு இருக்கவில்லை. அதன் காரணமாகவே உலக அளவிலேயே கூட விக்கிப்பீடியா வெற்றி பெற்ற அளவு அதன் மற்ற திட்டங்கள் வெற்றி பெறவில்லை. ஆக, ஒரு திட்டம் தனித்துவமானதும், உடனடித் தேவை மிக்கதாகவும், அத்தேவையைத் தீர்க்கப் புகுந்த முதல் திட்டமாகவும் இருத்தல் அவசியம்.

திட்டத்தின் அளிப்புரிமை

திட்டத்தின் அளிப்புரிமை விதிகளும் முக்கியமானவை. தன்னுடைய ஆக்கங்களை எந்தத் தடையுமின்றி பிறருக்கு நல்காமல் தன்னுடைய இருப்பைத் தக்க வைப்பதில் மட்டும் அது முனையுமானால், தங்களுடைய உழைப்பு, திறன், அறிவை எந்த ஊதியமும் இல்லாமல் நல்கக் கூடியவர்களை அத்திட்டத்தால் ஈர்த்துக் கொள்ள இயலாது.

திட்டத்தின் வணிகப் பெறுமதி

திறமூல, கட்டற்ற இயக்கங்கள் இலவசமாகவே கிடைக்கும் என்றாலும் அவை வணிக முயற்சிகளைப் பெரும்பாலும் தடை செய்வதில்லை. லினக்சு, வேர்ட்பிரெசு இலவசமாகக் கிடைத்தாலும் அவற்றைச் சுற்றி பணம் ஈட்டும் பெறும் வாய்ப்புகள் உள. இதுவரை தமிழில்அத்தகைய கணிமைத் திட்டங்கள் குறைவாகவே இருக்கின்றன. இருந்தாலும் பொருள் ஈட்டும் வாய்ப்பு குறைவாகவே உள்ளது.

தமிழர் பண்பு

தமிழர்கள் ஒன்று கூடி எந்த ஒரு கூட்டு முயற்சியிலும் ஒத்துழைப்பது குறைவு என்றும் சிலர் கருதுகின்றனர். பார்க்க - தமிழ் இணையத்தில் கூட்டுச் செயற்பாடுகள்.

**

எல்லாம் அமைந்தும் இணையத் திட்டங்களுக்குப் பங்களிக்காதவர்கள் தன்னலக்காரர்களா?

எல்லாரையும் அப்படிச் சொல்ல இயலாது.

சிலருக்கு, உதவி செய்ய எல்லாம் அமைந்தும், பசி, பிணி, கல்வியின்மை என்று ஒவ்வொரு நாட்டிலும் உயிர் போகும் ஏகப்பட்ட பிரச்சினைகள் இருப்பதால் இதை விட முக்கியமானப் பிரச்சினைகளுக்கு தங்கள் உழைப்பைத் தந்திருக்கலாம்.

சரி, அப்ப இணையத் திட்டங்களுக்குப் பங்களிப்பவர்கள் பொதுநலக்காரர்களா?

அப்படியும் சொல்ல இயலாது :) கொஞ்சம் பெரிய வட்டத்தில் தன்னலக்காரர்கள் என்று கொள்ளலாம். இத்திட்டங்களில் பங்களிப்பவர்களால் பொது நலன் இருந்தாலும் அதில் தன்னலமும் இருக்கிறது. என் வீடு, என் உறவு என்பதில் இருந்து என் மொழி, என் பண்பாடு, என் இனம் என்ற அடுத்த கட்ட தன்னலத்துக்கு நகர்கிறார்கள். அதன் அடுத்த கட்டமாக என் நாடு, என் உலகம் என்று நகரலாம். நானே தமிழ் விக்கிப்பீடியாவுக்குப் பங்களிக்கும் அளவுக்கு ஆங்கில விக்கிப்பீடியாவுக்குப் பங்களிப்பதில்லை.

பொது நலம் என்ற ஒரே காரணத்துக்காக நாம் இத்திட்டங்களில் ஈடுபடுவதில்லை. ஒரு பொது நலனுக்கு உதவுவதில் நம்முடைய தனிப்பட்ட நலனும் உள்ளடங்கி இருக்க வேண்டும். (நான் நேரம் ஒதுக்கி சில விக்கிப்பீடியா கட்டுரைகள் எழுதினால் எனக்குத் தேவைப்படும் கட்டுரைகளையும் யாராவது எழுதித் தருவார்கள் என்ற எதிர்ப்பார்ப்பு உண்டு!!).

இன்னொன்று, இந்த பொதுத் திட்டங்களில் ஈடுபடுவது ஒரு வித விளையாட்டு, பொழுதுபோக்கு போன்று மனதுக்கு மகிழ்ச்சியைத் தருவதாகவும் இருப்பதும் அத்திட்டத்தில் இருந்து ஒருவர் பெற்றுக் கொள்ளும் பயனே. இந்த மனமகிழ்ச்சி என்னும் தன்னலம் இல்லாமல் ஒருவர் இவற்றில் ஈடுபாடு காட்ட இயலாது. எனவே, ஒருவருக்கு அக்கறை இருந்தாலும், இந்த ஈடுபாட்டின் மூலம் அவருக்கு மகிழ்ச்சி வரவில்லை என்றால், அவரைக் குற்றம் சொல்ல இயலாது.

சரி, அப்ப இந்தத் திட்டங்களை வளர்ப்பது எப்படி?

ஆர்வம் உள்ள பங்களிப்பாளர்கள் அயராது அன்றாடமோ வாரம் சில மணி நேரமோ தங்கள் இயலுகைக்கு ஏற்பவும் திட்டத்தின் தேவைக்கு ஏற்பவும் உழைக்க வேண்டும்.

இயன்ற அளவு எல்லா களங்களிலும் திட்டம் குறித்து பரப்புரை செய்ய வேண்டும். ஆனால், ஒரே ஆட்களிடம் திரும்பத் திரும்பச் சொல்வதிலோ இறைஞ்சுவதிலோ பயன் இருப்பதில்லை என்று கண்டு கொண்டிருக்கிறேன். ஒருவருக்கு ஒரு திட்டம் குறித்த இயல்பான ஆர்வம் இருக்கும் எனில், அவர் முதன்முறை அறிந்த உடன் தானாகவே வந்து விடுவார். நம் அழைப்புக்காக மட்டுமே வருபவர்கள் துவக்க உற்சாகத்தை விரைவிலேயே தொலைத்து விடுவார்கள்.

திட்டத்தின் பயன், திட்டம் குறித்த தகவல் கிடைக்கும் பயனர்கள் கொஞ்சம் கொஞ்சமாகப் பங்களிக்கத் தொடங்குவார்கள். ஏனெனில், நாம் பெற்றதில் ஒரு பகுதியையாவது திரும்பத் தர வேண்டும் என நினைப்பது நம்முள் உள்ள இயல்பு.

அவ்வளவு சீக்கிரம் திட்டத்துக்குத் தகுந்த முனைப்பான பங்களிப்பாளர்கள் கிடைக்காமல் போகலாம். ஆனால், அப்படி கிடைக்கையில் அவர்கள் பல சாதாரண பங்களிப்பாளர்களை விட பல மடங்கு பங்களிப்பார்கள் என்பது என் அனுபவம்.

**

இக்கட்டுரை மீள்பதிப்பாக இடப்படுகிறது. முதற்பதிப்புக்கான மறுமொழிகளைப் பார்க்க:

தன்னார்வத் தமிழிணையத் திட்டங்களுக்குப் பங்களிப்பு குறைவாக இருப்பது ஏன்?

[தமிழ் விக்கிப்பீடியா] விக்கிப்பீடியா - கூட்டுழைப்பு - திறந்த புலமைச்சொத்து (திருத்திய மீள்பதிவு)

2009-10-28T21:00:00.000-07:00

கற்பனை செய்து பாருங்கள்.

ஒரு கலைக்களஞ்சியத்தைத் திறந்த நிலையில் உருவாக்க முடியுமா?

திறந்த கலைக்களஞ்சியம் எப்படி இருக்கும்?

அது முற்றிலும் இலவசமாக இருக்கும். யார் வேண்டுமானாலும் எப்போது வேண்டுமானாலும் அதனைப் பயன்படுத்த முடியும். எவரும் அதனைத் தம்மோடு வைத்துக்கொள்ள முடியும். கலைக்களஞ்சியம் கொண்டிருக்கும் கட்டுரைகளை விட அதிகமான தகவல்கள் தமக்கு தெரிந்திருந்தால் அத்தகவல்களை எவரும் அக்கலைக்களஞ்சியத்தில் சேர்த்துவிடமுடியும். தகவற்பிழைகள் ஏதுமிருந்தால் எந்தக் கட்டுப்பாடுகளுமின்றி அவற்றை திருத்திவிட முடியும். எவரும் தமக்கு தெரிந்த விடயங்கள் தொடர்பாக எந்த அளவிலாயினும் கட்டுரைகளை அந்த கலைக்களஞ்சியத்தில் புதிதாக உருவாக்க முடியும். அங்கே இருக்கும் பிற கட்டுரைகளை எந்த கட்டுப்பாடுகளும் இல்லாமல் எதற்கும் பயன்படுத்தமுடியும். அப்படியே நகலெடுத்துத் தன்னுடைய புத்தகம் ஒன்றில் சேர்த்துக்கொள்ள முடியும். யாரும் கேள்வி கேட்க மாட்டார்கள். அங்கேயுள்ள கட்டுரைகளை எல்லாம் தொகுத்துப் புத்தகமடித்து விற்க முடியும். எந்தக் காப்புரிமைச் சிக்கலும் எழாது. கலைக்களஞ்சியத்தில் புதிதாகச் செய்யப்படும் திறந்த நிலை மாற்றங்களைக் கண்காணித்து தகாதனவற்றை எவரும் நீக்கிவிடவும் முடியும்.

இப்படி ஒரு கலைக்களஞ்சியம் சாத்தியமா?

சரி, இப்படி ஒரு கலைக்களஞ்சியம் கட்டாயம் இருக்கவேண்டுமா?

ஒரு புகழ் பெற்ற நிறுவனம் ஏராளமான அறிஞர்களைப் பயன்படுத்தி கலைக்களஞ்சியம் ஒன்றினை உருவாக்குகிறது என்று வைத்துக்கொள்வோம். அதனைப் பயன்படுத்தப்போகும் பயனர்களான நீங்கள் கைகள் கட்டப்பட்ட நிலையிலேயே அதனை அணுக அனுமதிக்கப்படுவீர்கள்.

ஒன்று நீங்கள் அதனை விலைகொடுத்தே வாங்க வேண்டும். அங்கே உள்ள கட்டுரைகளையோ அதன் பகுதிகளையோ எக்காரணம் கொண்டும் நீங்கள் வேறு தேவைகளுக்குப் பயன்படுத்தமுடியாது. காப்புரிமைச் சட்டங்களின் கீழ் நீங்கள் சிறைக்குச் செல்லும் வாய்ப்புள்ளது. வேண்டுமென்றே செய்யப்பட்ட, தவறுதலாக செய்யப்பட்ட தகவற் தவறுகளை நீங்கள் உடனடியாக திருத்திவிட முடியாது. கலைக்களஞ்சியம் கொண்டிருக்கும் தகவல்கள் ஒரு சிலருக்கு சார்பாக இருக்கிறது என்று உரிமையோடு வாதிட்டு கட்டுரைகளை திருத்திவிட முடியாது. உங்களுக்கு தெரிந்த பல்வேறு விடயங்கள் தொடர்பான கட்டுரைகளை அதில் நீங்கள் உடனடியாக சுதந்திரமாகச் சேர்க்கமுடியாது.

எப்போதும் உங்கள் கைகள் கட்டப்பட்டே இருக்கும். காப்புரிமை எனும் சங்கிலி எப்போதும் உங்களைப் பிணைத்தே இருக்கும்.

இந்த கட்டுத்தளைகளை அறுத்து, புலமைச்சொத்துக்களைத் திறந்த நிலையில், கட்டற்ற நிலையில் வைத்திருக்கவேண்டும். பகிர்வதற்கான சுதந்திரம் வேண்டும், கூட்டுழைப்புக்கான வழிதிறக்கவேண்டும் என்று கோரும் ஒரு புதிய போக்கு இணைய வெளியில், மின்வெளியில் ஏற்பட்டிருக்கிறது.

"தனியுரிமை" என்பது அநீதி, பொதுமக்கள் உரிமையாக புலமைச்சொத்துக்கள் இருப்பதே மனித குலம் முன்னோக்கி நகர்வதற்கான வழி என்று இந்த "கட்டறுப்பு" இயக்கம் உரத்துச்சொல்கிறது.

இணைய உள்ளடக்கங்கள் மட்டுமல்ல, மென்பொருட்கள், திரைப்படங்கள், புத்தகங்கள், கலைப்பணிகள் அனைத்துமே "திறந்த" நிலையில் பொதுமக்கள் உரிமையாக இருக்கவேண்டும். அவை அனைத்தும் மனித குலத்தின் சொத்துக்களாக, வியாபகத்துடன் இருக்கவேண்டுமே அல்லாமல், தனிமனிதர்களின் குறுகிய உரிமை கோரல்களுக்குள் அகப்பட்டுப்போய்விடக்கூடாது என்று இந்த எதிர்ப்பியக்கத்தை ஆதரிக்கும் அனைவரும் விரும்புகின்றனர்.

இந்தப் புதிய புரட்சிகரமான சிந்தனைப்போக்கு மென்பொருள் தொழிற்றுறையிலேயே முதலில் தோன்றியது. மக்கள் உடைமையாக, கூட்டுழைப்பாக மென்பொருட்கள் திறந்த நிலையில் உருவாக்கப்படவேண்டும், பகிரப்படவேண்டும் என்று ஆரம்பித்து இன்று எல்லா வகையான புலமைச்சொத்துக்களினதும் திறந்த நிலையை வலியுறுத்துகிறது. புலமைச்சொத்துக்களை குறுக்கி முடக்கும் "காப்புரிமை" ஒப்பந்தங்களைக் காட்டமாக எதிர்க்கிறது. காப்புரிமைக்கு மாற்றாக புலமைச்சொத்துக்களை உருவாக்கும் மனிதர்களது உழைப்பினையும் உரிமையையும் காத்து, அதனை பயன்படுத்தும் மனித குலத்தின் சுதந்திரத்தையும் காக்கும் "அளிப்புரிமை" யினை முன்வைக்கின்றது. சட்டரீதியான அளிப்புரிமை ஒப்பந்தங்களும் உருவாக்கப்பட்டுள்ளன.

புலமைச்சொத்துக்களின் திறந்த நிலையை, கூட்டுழைப்பினை, கட்டற்ற பகிர்தலை முன்னிறுத்தும் இயக்கம், அந்த இயக்கத்தின் சிந்தனைகளை அடிப்படையாகக்கொண்ட "திறந்த" புலமைச்சொத்து உருவாக்கம் இன்றைய உலக ஒழுங்கில் சாத்தியப்படுமா? அல்லது இதெல்லாம் வெறும் "அழகிய கனவுகள்" தானா?

இந்த நெற்றி சுருக்கும் சந்தேகங்களை எல்லாம் தமது வெற்றிகளால் சுட்டெரித்துக்கொண்டு அதி வேகமாய் வளர்ந்துகொண்டிருக்கிறது "திறந்த மூல" இயக்கம். பெரும் நிறுவனங்களின் ஆதிக்கத்தையெல்லாம் அடித்து உடைத்தவாறு எல்லாத்துறைகளிலும் திறந்த முயற்சிகள் வெற்றிபெற்றுக்கொண்டு வருகின்றன.

இந்த மகத்தான வெற்றியின் மிகச்சிறந்த எடுத்துக்காட்டாக இருப்பதுதான் திறந்த கலைக்களஞ்சியமான "விக்கிபீடியா".

ஆங்கிலதில் மட்டுமல்லாது, உலகமொழிகளில் பெரும்பாலானவற்றில் இந்த கூட்டுழைப்பில் உருவாகும் கலைக்களஞ்சியம் வெற்றிகரமாக வளர்ந்துவருகிறது.

ஏறத்தாழ 19,600 கட்டுரைகளோடு தமிழ் விக்கிபீடியாவும் இணையத்தில் வளர்கிறது.

ஆங்கில விக்கிபீடியாவோ, இன்று உலகின் ஆகக்கூடிய கட்டுரைகளைக் கொண்டிருக்கும் கலைக்களஞ்சியமாக, நுணுக்கமாக செவ்வை பார்க்கப்பட்டு பார்த்துப்பார்த்து வளர்த்தெடுக்கப்படும் கலைக்களஞ்சியங்களுக்குச் சமமான நிலையில் பல்கலைக்கழகங்களிலும் பாடசாலைகளிலும் மாணவர்களுக்குப் பரிந்துரைக்கப்படுகிறது.

எவரும் வந்து எதையும் தொகுத்து, அழித்து மாற்றக்கூடிய நிலையில் இருக்கும் இந்த கட்டுப்பாடுகள் எதுவுமற்ற கலைக்களஞ்சியம் எப்படி இவ்வளவு பெரிய வெற்றியை பெற்றது?

இதற்கு ஒரு சாதாரண விக்கிபீடியா பயனரின் செயற்பாடுகளைக் கூர்ந்து கவனிப்பதன்மூலம் பதில்களை பெற்றுக்கொள்ளலாம்.

எனது ஊரைப்பற்றிய சில தகவல்கள் தேவைப்படுவதால் நான் விக்கிபீடியா கலைக்களஞ்சியத்தை இணைய வெளியில் ta.wikipedia.org என்ற முகவரியில் அணுகுகிறேன். "திருக்கோணமலை" என்று தேடி திருக்கோணமலை தொடர்பான கட்டுரையை வந்தடைகிறேன். ஏற்கனவே பலர் சேர்ந்து உருவாக்கி வைத்திருக்கும் அந்த கட்டுரையிலிருந்து எனக்கு தேவையான தகவல்களை பெற்றுக்கொள்ளுகிறேன்.

அப்போதுதான் என் கவனத்தில் படுகிறது அகிலேசபிள்ளை, தி. த கனகசுந்தரம்பிள்ளை, தி. த. சரவணமுத்துப்பிள்ளை போன்றவர்கள் திருக்கோணமலையில் தான் பிறந்துவளர்ந்தவர்கள் என்ற தகவல் "திருக்கோணமலை இலக்கிய வரலாறு" என்ற தலைப்பின் கீழ் விடுபட்டுப்போயிருக்கிறது.

உடனடியாக அந்தக் கட்டுரையின் மேற்பகுதியிலிருக்கும் "தொகு" என்ற விசையினை அழுத்தி கட்டுரையில் தேவையான வரிகளைத் தட்டெழுதிச் சேர்த்துவிடுகிறேன். கீழே உள்ள "சேமிக்கவும்" என்ற விசையினை அழுத்தியவுடன் நான் புதிதாக சேர்த்த வரிகளுடன் கட்டுரை தற்போது காட்சியளிக்கிறது. இனி இந்தகட்டுரையைப் பார்க்கும் ஒவ்வொருவருக்கும் இந்த வரிகள் தென்படும்.

இந்தத் தொகுப்பினைச் செய்வதற்கு எனக்கு எந்த பயனர் கணக்கும் தேவை இல்லை. எந்த விதமான சிறப்பு அனுமதியும் தேவையில்லை. எவர் வேண்டுமானாலும் இதனைச் செய்யலாம்.

மறுநாள் நான் செய்த மாற்றங்கள் கட்டுரையில் இருக்கிறதா என்று பார்க்க ஆசையாயிருக்கவே திருக்கோணமலை கட்டுரையை மறுபடி பார்வையிடுகிறேன். அங்கே நான் செய்த மாற்றங்கள் அப்படியே இருக்கிறது. அத்தோடு தி. த. கனகசுந்தரம்பிள்ளைக்கு து.க என்று எழுத்துப்பிழை விட்டிருந்தேன். அந்த எழுதுப்பிழை சரியாக்கப்பட்டு து, தி ஆக மாற்றப்பட்டிருந்தது . இந்த திருத்தத்தை யார் சேர்த்தார்கள்? என்னைப்போல இந்த கட்டுரையைப் பார்வையிட வந்த மற்றவர்கள் தான்.

இந்த விடயம் எனக்கு நம்பிக்கையூட்டவே பயனர் கணக்கு ஒன்றினை உருவாக்கலாம் என்ற முடிவுக்கு வருகிறேன். எனது பெயரில் புதிய பயனர் கணக்கை உருவாக்கியாகிவிட்டது. இனி எனது கடவுச்சொல்லை பயன்படுத்தி புகுபதிகை செய்துகொண்ட பின் நான் செய்யும் மாற்றங்கள் யாவும் என்பெயரில் மற்ற பயனர்களுக்கு அறிவிக்கப்படும்.

அண்மைய மாற்றங்கள் பக்கத்துக்குச் சென்று அண்மையில் யார்யார் என்ன கட்டுரைகளை உருவாக்கியிருக்கிறார்கள், திருத்தியிருக்கிறார்கள் பார்க்கலாம் என்று கவனித்தால், மேமன்கவி, டொமினிக் ஜீவா தொடர்பான கட்டுரை ஒன்றை அண்மையில் உருவாக்கியிருப்பது தெரிந்தது. அந்த தலைப்பைச் சொடுக்கி கட்டுரைக்கு போனால் அங்கே டொமினிக் ஜீவா தொடர்பான சிறிய கட்டுரை ஆக்கப்பட்டிருக்கிறது. அங்கே மல்லிகை என்ற சொல் சிவப்பு நிற எழுத்தில் இருந்தது. அதை சொடுக்கினால், மல்லிகை என்ற தலைப்பில் கட்டுரை எதுவும் உருவாக்கப்படவில்லை. இந்த தலைப்பில் கட்டுரை உருவாக்க விரும்பினால் தட்டெழுதிச் சேமிக்கவும் என்பது போன்ற அறிவித்தல் வந்தது. சரி மல்லிகைக்கு கட்டுரை எல்லாம் எழுதப்போகிறோமே, மல்லிகை பற்றி இரண்டு வரி போட்டால் என்ன என்ற நினைவில் எனக்கு தெரிந்த அளவில் மல்லிகை பற்றிய இரண்டு வரிகளை அந்த தலைப்பில் சேர்த்துச் சேமித்துவிட்டு வருகிறேன்.

அடுத்த நாள் நான் புகுபதிகை செய்யும்போது எனது பேச்சுப்பக்கத்தில் மேமன் கவி எனக்கு நன்றி சொல்லி இருப்பதோடு, மற்றப் பயனர்கள் பலரும் மல்லிகை பற்றிய பெரிய கட்டுரை ஒன்றினையே வளர்த்தெடுத்துவிட்டிருக்கின்றனர். பல புதிய நட்புக்களும் இந்த கட்டுரை ஊடாகக் கிடைக்கிறது.

இவ்வாறு தான் விக்கிபீடியா இயங்குகிறது.

சாதாராண மனிதர்கள் பலர் கூடி ஒரு பெரும் தகவற் களஞ்சியத்தையே உருவாக்குகிறார்கள். ஒவ்வொரு மனிதரிடத்தும் ஏதாவது ஒரு விடயம் தொடர்பான அறிவு இருக்கும். கூட்டுழைப்பாக, ஒரு பெரும் சமுதாயமாக இந்த தனி மனிதர்கள் இணையும்போது இந்த கூட்டு மதிநுட்பம் அதி சக்திவாய்ந்ததாக மாறுகிறது.

கூட்டுழைப்பும், சமுதாய செயற்பாடுகளும் தான் இந்த மனித இனத்தை முன்னோக்கி நகர்த்தும். குறுகிய இலாப நோக்கம் கொண்ட வட்டங்கள் அல்ல.

சரி திறந்ததோ என்னவோ, எவரோ ஒருவரின் கலைக்களஞ்சிய வலைத்தளத்துக்கு நாம் ஏன் பங்களிக்க வேண்டும்? இப்போது திறந்து வைத்துவிட்டு பின்னொரு நாளில் எல்லாவற்றையும் வாரிச்சுருட்டிக்கொண்டு போய்விட மாட்டார்களா?

இது நிகழ்வதற்கான சாத்தியப்பாடுகள் பின்வரும் காரணிகளால் அற்றுப்போகிறது.

ஒன்று, விக்கிபீடியா எந்த தனிமனிதருக்கோ, நிறுவனத்துக்கோ சொந்தமானதல்ல. "விக்கிமீடியா" எனப்படும் நிர்வாக குழுவே இவ்வலைத்தளத்தைப் பராமரிக்கிறது. இந்நிர்வாகக்குழு சாதாரண விக்கிபீடியா பயனர்களிடமிருந்து தேர்ந்தெடுக்கப்படும் ஆட்களைக் கொண்டது. இக்குழு இலாபநோக்கற்ற நிறுவனமாக பதிவுசெய்யப்பட்டிருப்பதோடு (அமெரிக்க சட்டங்களுக்கமைவாக) நன்கொடைகளுக்கான வரிவிலக்குச் சலுகையையும் பெற்றுக்கொண்டுள்ளது. எக்காரணம் கொண்டும் விக்கிபீடியாவில் விளம்பரங்களோ, வியாபார வடிவங்களோ உள்ளடக்கப்பட முடியாது.

அனைத்து மொழி விக்கிபீடியா வலைத்தளங்களுக்குமான வழங்கிகள், பராமரிப்பு செலவுகள் யாவும் நன்கொடைகள் மூலமே சமாளிக்கப்படுகின்றன. முன்மொழிவு வழிமொழிவு வாக்களிப்பு முறையில் நிர்வாகிகள் காலத்துக்குகாலம் தேர்ந்தெடுக்கப்படுகின்றனர்.

இரண்டு, விக்கிபீடியா இயங்கும் மென்பொருளான மீடியாவிக்கி எனப்படும் உள்ளடக்க முகாமைத்துவத் தொகுதியின் (CMS) அனைத்து நிரல்களும் திறந்த மூலம். விக்கிபீடியாவைப்போலவே இந்த மென்பொருளின் நிரலாக்கமும் நிகழ்கிறது. மென்பொருள் திறந்திருப்பதால் மறைமுகமான எந்த செயற்பாட்டையும் இந்த மென்பொருள் செய்ய முடியாது.

மூன்று, விக்கிபீடியாவின் உள்ளடக்கம் Creative Commons (Atribution Share alike) உரிமம் மூலம் சட்டரீதியாக பாதுகாக்கப்படுகிறது.

இந்த ஒப்பந்தமானது காப்புரிமை ஒப்பந்தங்கள் செய்யும் சுயநல கட்டுப்பாடுகளை களைந்து, புலமைச்சொத்து மீதான பொதுமக்களின் உரிமைகளை சட்டரீதியாக பாதுகாப்பதற்கென உருவாக்கப்பட்ட உரிம ஒப்பந்தமாகும். அதாவது அளிப்புரிமை.

சுருக்கமாக கூறுவதானால், திறந்த நிலை உள்ளடக்கங்களை எவரும் எதற்கும் பயன்படுத்தலாம் ஆனால், அந்த உள்ளடக்கங்களை மூடி வைக்க முடியாது. பகிரும் போது நீங்கள் எவருக்கெல்லாம் இதனைக்கொடுக்கிறீர்களோ அவர்களுக்கும் நீங்கள் இதே சுதந்திரத்தினை வழங்கியாகவேண்டும்.

இவ்வாறானதொரு சட்டப்பாதுகாப்பு இந்த உள்ளடக்கங்களுக்கு உண்டு. அதனால் பொதுமக்கள் உருவாக்கும் இந்த உள்ளடக்கங்கள் யாவும் பொதுமக்களுக்கு மட்டுமே சொந்தம். யாரும் உரிமைகோர வாய்ப்பில்லாமல் போய்விடுகிறது. விக்கிமீடியா நிர்வாகக்குழுவினர் இந்தச் சட்ட விடயங்களைக் கவனித்து வேண்டிய நடவடிக்கைகளை மேற்கொள்கின்றனர்.

இதன்காரணத்தினாலேதான் இந்த விக்கிபீடியாவினை நாம் ஒவ்வொருவரும் எமதாக உணரமுடிகிறது. எவருக்கோ வேலைசெய்கிறோம் என்ற எண்ணம் தோன்றுவதற்கு மாறாக, எல்லோரும் எனக்காக வேலை செய்கிறார்கள் என்ற எண்ணம் மேலோங்குகிறது. அதனால் பொறுப்புணர்வும் மனமகிழ்ச்சியும் அதிகரிக்கிறது

சரி, திறந்த நிலையில் இருக்கும் இந்த கட்டுரைகளில் தவறான விடயங்களை யாரும் புகுத்திவிட்டால்? கட்டுரைகளை விசமத்தனமாக அழித்துவிட்டால்? வன்செயல்புரிந்தால்?

இந்த சவால், தத்துவரீதியாகவும் தொழிநுட்ப ரீதியாகவும் எதிர்கொள்ளப்படுகிறது.

சுற்றியிருக்கும் எல்லோருக்கும் சொந்தமான ஒரு திறந்த வீட்டில் களவுகள் நிகழமுடியாதல்லவா? இந்தத் தத்துவமே இங்கும் செயற்படுகிறது. எல்லா விக்கிபீடியா பயனர்களும் தமது சொந்த கலைக்களஞ்சியமான விக்கிபிடீயாவில் அக்கறையாய் இருக்கிறார்கள். அண்மைய மாற்றங்கள் பக்கத்துக்கு சென்று ஒவ்வொரு நாளும் என்ன மாற்றம் நிகழ்கிறது என்று பார்த்துக்கொண்டிருக்கிறார்கள். எவரும் இந்த பக்கத்தை பார்வை இடலாம். ஒவ்வொரு மாற்றங்களும் ஆயிரக்கணக்கான, கோடிக்கணக்கான பயனர்களால் அவதானிக்கப்படுகிறது.

எக்காரணம் கொண்டும் நான் உருவாக்கிய கட்டுரைகளில் தீச்செயல்கள் நிகழ நான் அனுமதிக்கமாட்டேன். எந்த சிறு செயல் விக்கிபீடியாவில் நிகழ்ந்தாலும் அது அடுத்த கணமே அனைத்து பயனர்களின் பார்வைக்கும் வந்துவிடும். இது தான் திறந்த நிலையின் பாதுகாப்பு. உலகில் தீயவர்கள் மிகச்சிலரே. அவர்கள் மிக இலகுவாக மாட்டுப்பட்டுவிடுவார்கள். இவ்வாறான விக்கிபீடியா குற்றங்கள் புரியப்பட்டால் அவை உடனடியாக களையப்பட்டுவிடும்.

தொழிநுட்பரீதியாக இந்தச் சவால் பல வழிகளால் எதிர்கொள்ளப்படுகிறது. அழிக்கப்பட்ட கட்டுரை ஒன்றினை மீட்டெடுக்கும் வசதி. ஒவ்வொரு மாற்றங்களும் எந்த IP முகவரியிலிருந்து செய்யப்படுகிறது என்பதைக் கண்டறிந்து குறித்த முகவரியை விக்கிபீடியா தொகுத்தலிலிருந்து தடை செய்யும் வசதி. கட்டுரைகளைத் தற்காலிகமாக பூட்டிவைக்கும் வசதி போன்றன உண்டு.
அத்தோடு ஒவ்வொரு மொழி விக்கிபீடியாவிற்கும் அதற்கென நிர்வாகிகள், அதிகாரிகள் உள்ளிட்ட கண்காணிப்பாளர்கள் உள்ளனர். இவர்கள் சாதாரண விக்கிபீடியா பயனர்களிடமிருந்து அவரவர் இயலுகை, அக்கறை போன்றனவற்றின் வாயிலாக தேர்ந்தெடுக்கப்படுபவர்கள். இவர்கள் இத்தகு பராமரிப்பு வேலைகளில் ஈடுபடுகின்றனர். விக்கிபீடியாவுக்கென்று ஒழுக்கக்கோவையும் உண்டு.

இந்த சமுதாய உழைப்பு மின்வெளியில் மட்டுமல்ல, மெய் உலக நடவடிக்கைகளுக்கும் மிகச்சிறந்த முன்மாதிரி.

இந்தத் தத்துவ அடிப்படையில் விக்கிபீடியாவை ஒத்த பல சகோதர செயற்றிட்டங்களும் உள்ளன. திறந்த அகரமுதலியான விக்சனரி, திறந்த புத்தகங்கள் எழுதுவதற்கான விக்கிபுத்தகங்கள், திறந்த செய்திவழங்கலுக்கான விக்கிசெய்திகள் போன்ற அவற்றுள் சில

இந்தத் திறந்த கலைக்களஞ்சியத்தைத் தமிழர்கள் தங்கள் அறிவினைச் சேகரித்துவைக்கும் மையப்படுத்தப்பட்ட களஞ்சியமாக கருதுவதில் என்ன தடை இருக்கமுடியும்?

தேசமற்ற, நிலமற்ற, பாதுகாப்புக்கும் உயிர்வாழ்வதற்குமான உரிமையற்ற இந்த இனம் பேரினவாதத்தால் எரித்துவிடமுடியாத மின்வெளியைத்தவிர வேறெந்த இடத்தைத் தமது தகவல்களைச் சேமிக்க பயன்படுத்தமுடியும். தனியுரிமை சுயநலத்துக்கு மாற்றாக இவ்வாறான திறந்த உன்னதமான இடத்தினைத்தானே தமிழ்ச்சமுதாயம் தனது அறிவுக்களஞ்சியமாக தெரிவுசெய்துகொள்ளும்?

தமிழ் விக்கிபீடியா அதிவேகமாக வளர்கிறது. உலகமெங்கும் பரந்திருக்கும் தமிழர்களின் இணையமூலமான கூட்டுழைப்பில் ஆயிரக்கணக்கான கட்டுரைகளைத் தொட்டு வளர்கிறது. தன்னைப்பற்றிய எல்லாத்தகவல்களையும் இந்த கலைகளஞ்சியத்தில் ஆவணப்படுத்திக்கொள்ள இந்த இனம் ஆரம்பித்துவிட்டது. இந்தத் தகவல்கள் அனைத்தும் பொதுமக்களுக்குச் சொந்தம். ஒவ்வொருவரும் தமதாக உணரக்கூடிய உள்ளடக்கங்கள். எவரும் எந்த் கட்டுப்பாடுகளையும் விதிக்க முடியாது.

எல்லாத்துறையினரும் இந்த கலைக்களஞ்சிய உருவாக்கத்தில் பங்கெடுத்துக்கொண்டால்மட்டுமே பன்முகத்தன்மைகொண்ட சிறந்த அறிவுக்களஞ்சியமாக இது உருவாகும். நாம் சார்ந்த தகவல்கள் இங்கே ஆவணப்படுத்தப்படாமல் விடுபட்டுப்போக அனுமதிக்கலாகாது. படங்களை, ஒலிவடிவங்களை, ஒளிப்படங்களைக் கூட அளிப்புரிமை அடிப்படையில் இங்கே சேமித்துவைக்கமுடியும்

ஒரு பெரும் விக்கிபீடியர் சமுதாயத்தை நாம் எங்கள் இடங்களில் உருவாக்கிக்கொள்வதன்மூலம் இதனை சாத்தியப்படுத்தலாம். அருகிலிருக்கும் விக்கிபீடியா பற்றி தெரிந்த ஒருவரை அணுகி, அவரது உதவியோடு பயனர் கணக்கொன்றை ஆரம்பித்து தகவல்களைத் தொகுக்க ஆரம்பிக்கலாம். சிறு தேனீர் விருந்துகளுடன் விக்கிபீடியர்கள் சந்தித்துக் கருத்துக்களைப் பரிமாறிக்கொள்ளலாம். தொழிநுட்பரீதியாக இவற்றை செய்ய முடியாமலிருப்பவர்களுக்கு மற்றவர்கள் உதவலாம்.

எம்மைப்பற்றிய எல்லாத்தகவல்களையும் பாதுகாப்பாக, அடுத்த தலைமுறைக்கு கொண்டு சென்று சேர்ப்பதற்கு இதுவே மிக ஆரோக்கியமான வினைத்திறன் மிக்க வழி.

"From each according to her/his abilities, to each according to her/his needs" - Karl Marx

தமிழ்த் தாத்தா, தமிழ் விக்கி, தமிழ் பதிவர்

2009-10-28T07:46:00.000-07:00

பல்வேறு தாக்குதல்களுக்கும், அழிப்பு வேலைகளுக்கும் இடையே தமிழ் தழைத்தோங்கி 21-ம் நூற்றாண்டு வரை வந்து விட்டது. மெல்லத் தமிழ் இனிச் சாகும் என்ற கூற்று சென்ற நூற்றாண்டுடன் மறைந்துவிட்டது என்றே கூறலாம்.

இந்த நூற்றாண்டில் உலகெங்கும் பரவி வேரோடி வாழும் தமிழ்ச் சமூகம் தங்கள் தாய்மொழிக்குத் தன்னளவிலான தொண்டினைப் புரிந்து கொண்டுதான் இருக்கிறது. கணினியின் வரவுக்குப் பிறகு எல்லாம் ஆங்கில மயமாகத்தான் இருக்கும் என்ற எதிர்பார்ப்பு இருந்திருக்கலாம். ஆனால் அதிலும் தங்களது மொழியின் வளத்தைக் கொண்டு செல்ல ஏராளமான தனி நபர்கள் தங்கள் நேரம், பொருள், உழைப்பு எனச் செலவிட்டு இன்று தமிழை இணையத்தில் ஏற்றி உலகெங்கும் விரவிக் கிடக்குமாறு செய்துவிட்டனர்.

மற்ற மொழிகளுக்கு அழிவு ஏற்படும் நேரத்தில் மட்டுமே தமிழுக்கும் அவ்வாறு நிகழ வாய்ப்புண்டு. இல்லையேல் இனி தமிழை அதன் வளத்தை அழிப்பது என்பது இயலாத செயலாகிவிடும். அந்த அளவுக்கு இணையத்தில் ஏராளமான தகவல்கள், பழந்தமிழ் இலக்கியங்கள், தற்கால இலக்கியச் செல்வங்கள் குவிக்கப்பட்டு வருகின்றன. இந்தத் தரவுகள், தகவல்கள் போதுமானவையா என்று கேட்டால் யானைப் பசிக்கு சோளப் பொரி என்றுதான் கூற வேண்டும்.

மதுரைத் திட்டம், நூலகம் திட்டம் போன்றவற்றில் இலக்கியச் செல்வங்கள் சேர்க்கப்பட்டு வருகின்றன. இவை எவராலும் எடுத்துப் பயன்படுத்தும் வகையில் அமைக்கப்பட்டுள்ளன. ஆனால் ஆங்கிலத்தில் உள்ள தேர்ந்த கட்டுரைகள் தமிழிலும் கிடைக்க வேண்டுமானால் அதை நாம் தமிழில் மொழி பெயர்க்க வேண்டும். அல்லது அதே போன்ற கட்டுரைகளை தமிழில் எழுத வேண்டும். அப்படி எழுதினாலும் அது ஒருவரின் வலைத் தளத்திலோ, வலைப்பதிவிலோ மட்டும்தான் வைக்கப்படும். ஒரு பொதுவான அமைப்பு இருந்தால் ஒரு நூலகம் போல யார் வேண்டுமானாலும் எப்போது வேண்டுமானாலும் பயன்படுத்தலாம் என்றிருந்தால் அதன் வீச்சு எவ்வாறிருக்கும் என்று எண்ணிப் பாருங்கள். அப்படி ஒரு பொது அமைப்புதான் விக்கிப் பீடியா.

ஆங்கில விக்கிப்பீடியாவில் இன்று 30 லட்சம் கட்டுரைகள் உள்ளன. சில மொழிகளில் லட்சத்துக்கும் மேலான கட்டுரைகள் காணக் கிடைக்கின்றன. இந்திய மொழிகளில் இந்தி, தெலுங்கு, வங்கம் போன்றவற்றில் 35 ஆயிரத்துக்கும் மேலான கட்டுரைகள் உள்ளன. ஆனால் தமிழ் விக்கிப்பீடியாவில் ஏறத்தாழ 20 ஆயிரம் கட்டுரைகளே உள்ளன. உள்ளடக்கத்தில் தமிழில்தான் சிறந்த கட்டுரைகள் உள்ளன என்று கூறப்படுகிறது. இந்த தகவல் மற்ற மொழியினருடன் போட்டியிடுவதற்கு அல்ல. ஆனால், நாம் செய்ய வேண்டியவை இன்னும் ஏராளம் உள்ளன என்பதை உணர்த்துவதற்கு இது தேவையான ஒன்றுதான்.

விக்கிப்பீடியாவில் யார் வேண்டுமானாலும் எழுதலாம், திருத்தலாம், தொகுக்கலாம். இதில் எழுதினால் நம் பெயர் வருமா என்பதே பெரும்பாலானோர் கேள்வி. பெயர் வராது. ஆனால் தொகுத்தல் வரலாற்றில் நாம் செய்யும் ஓரெழுத்துத் திருத்தம் கூட நம் பயனர் பெயரில் (user login) பதிவாகிவிடும். இது மீண்டும் அழிக்கப்பட முடியாதது. எனவே நம் முத்திரை அதிலிருக்கும்.

என்ன பயன் என்ற அடுத்த கேள்வி. சற்றே பின்னோக்கி எண்ணிப் பாருங்கள். எத்தனை முயற்சி செய்து, எவ்வளவு கடினமாக உழைத்து தனியொருவர் ஏராளமான பழந்தமிழ் இலக்கியங்களைப் பதிப்பித்தார். அவர் சென்ற இடங்களில் எல்லாம் ஓலைச் சுவடிகளை கேட்டுப் பெற்றார். எத்தனை பேர் அதை கொடுக்க மறுத்து போகிப் பண்டிகையில் தீயிலிட்டுக் கொளுத்தினர். அதையும் மீறி கிடைத்தவையே தமிழில் படித்து முடிக்க முடியாத அளவிற்கு குவிந்து கிடக்கிறது. இதற்கெல்லாம் பிரதிபலன் பார்த்தா அவர் செயல்பட்டார். அவரை தமிழ்கூறும் நல்லுலகு தமிழ்த் தாத்தா உ.வே.சாமிநாதய்யர் என்று அழைக்கிறது. இன்னும் அழைக்கும். இங்கு அவர் பின்புலம் பற்றி விவாதிக்காமல் அவர்தம் தமிழ்த் தொண்டு பற்றி மட்டும் சிந்திப்போம்.

எண்ணிப் பார்த்தால் அவருக்கு எம்.பி, எம்.எல்.ஏ சீட்டோ, மந்திரிப் பதவியோ, சொத்துகளோ இத் தமிழ்த் தொண்டால் கிடைத்துவிடவில்லை. ஆனால் அவரை இன்றும் நினைவு கூர்கிறோம்.

அந்த அளவுக்கு சிரத்தை எடுத்து நாம் செய்ய வேண்டிய தேவையில்லை. ஆனால் எளிதில் கிடைக்கும் கலைச் செல்வங்களை தமிழில் மொழி பெயர்த்தோ, அல்லது தமிழிலேயே கிடைக்கும் செல்வங்களை பொது இடமான விக்கியில் சேர்ப்பதன் மூலம் தமிழுக்கு நாமும் தொண்டாற்றியவர்கள் ஆவோம். வெறும் தமிழ் தமிழ் என்று கூச்சலிட்டுக் கொண்டிருப்பதால் யாருக்கும் பயன் இல்லை.

தமிழ் விக்கிப்பீடியாவை ஏராளமானோர் பயன்படுத்துகின்றனர். சான்றாக, புதுக்கோட்டையில் உள்ள ஒரு அரசுப்பள்ளியில் 8-ம் வகுப்பு படிக்கும் மாணவர்கள் இணையத்தைப் பயன்படுத்தி தமிழ் விக்கிப் பீடியாவில் தகவல் பெற்று பாடக் குறிப்புகள் எழுதுகிறார்கள். எவ்வளவு மகிழ்ச்சியான செய்தி. ஆனால் மேலும் அதிகமான மாணவர்கள், உயர் வகுப்பு, கல்லூரி, பல்கலைக்கழக மாணவர்கள் அதைப் பயன்படுத்தும் விதத்தில் கட்டுரைகள் குவிந்துள்ளனவா என்றால், இப்போதைக்கு இல்லை. அதற்கான வளர்ச்சிப் பாதையில் விக்கிப்பீடியா சென்று கொண்டிருக்கிறது எனலாம்.

ஒரு சிறுகட்டுரையைக் கூட நம்மால் எழுத முடியும். நம் ஊர், உறவு முறைகள், சடங்குகள், பண்பாடு, மரம் , செடி, கொடி என்று எதைப்பற்றி வேண்டுமானாலும் விக்கியின் கொள்கைகளுக்கு ஏற்ப எழுதலாம். இது ஒரு இணையக் கலைக்களஞ்சியம். விருப்பு வெறுப்பின்றி நடுநிலையுடன் எதைப் பற்றியும் எழுத முடியும்.

இன்றைக்கு 6 ஆயிரம் தமிழ் பதிவர்கள் உள்ளனர். இவர்களில் அன்றாடம் பதிவு எழுதுவோர் 10 சதம் என்று எடுத்துக் கொண்டாலும் 600 பேர் இருக்கிறார்கள். இதில் நேரமும், வாய்ப்பும், வசதியும் கொண்டவர்கள் 300 பேர் என்று கொண்டால், அவர்கள் நாளொன்றுக்கு ஒரு கட்டுரை எழுதினால் கூட போதும். இதற்கு அரை மணி நேரமே செலவாகும்.

தங்களுக்குப் பிடித்த எத்துறை என்றாலும் எழுதலாம். எத்தடையும் இல்லை. மேலும் தகவல் பெற தமிழ்விக்கிப்பீடியா வலைப்பதிவை அணுகலாம். விக்கிப்பீடியா ஆலமரத்தடியை அணுகலாம். ஆக, ஒரு நாளுக்கு 300 கட்டுரை எனில் ஒரு மாதத்துக்கு 9 ஆயிரம் கட்டுரை. ஓராண்டுக்கு 72 ஆயிரம் கட்டுரை. ஏதோ காமெடி போலத் தோன்றும். வெகு சிலரின் பங்களிப்பு மூலமே இது வரை 20 ஆயிரம் கட்டுரைகள் தமிழ் விக்கிப்பீடியாவில் எழுதப்பட்டுள்ளன. அதைப் பயன்படுத்தும் ஒரு இளைய தலைமுறையும் புதுக்கோட்டை அருகே அடையாளம் காணப்பட்டுவிட்டது. எனவே ஒன்றுபட்டால் உண்டு வாழ்வு என்பது தமிழ் விக்கிப்பீடியாவுக்கும் பொருந்தும்.

சென்றிடுவீர் எட்டுத் திக்கும் கலைச் செல்வங்கள் யாவும் கொணர்ந்திங்கு சேர்ப்பீர் என்றார்.

எட்டுத் திக்கும் சென்றுவிட்டீர்கள்.... கலைச் செல்வங்கள் யாவையும் எப்போது கொணர்ந்து சேர்ப்பீர்கள்?

விக்கிமேனியா 2009

2009-10-28T02:00:00.000-07:00

உலக விக்கிப்பீடியர்கள் ஒவ்வொரு ஆண்டும் கூடி, விக்கிப்பீடியாவின் செயற்பாடுகளையும் வருங்காலத் திட்டங்களையும் அலசுகின்றனர். இதனை விக்கிமேனியா மாநாடு என்கின்றனர்.

2009 விக்கிமேனியா மாநாடு, அருச்சென்டினா நாட்டில் ஆகத்து 26-28, 2009 நாட்களின் நடைபெற்றது.

தமிழ் விக்கிப்பீடியா சார்பாக, தமிழ் விக்கிப்பீடியா பங்களிப்பாளர் சுந்தர் கலந்து கொண்டு, தமிழ் விக்கிப்பீடியா - ஓர் ஆய்வு என்ற கட்டுரையை வாசித்தார்.

காண்க: சுந்தர் விக்கிமேனியாவில் கட்டுரை வாசிக்கும் நிகழ்படம்

விக்கிப்பீடியா அமைப்பு, வளர்ந்து வரும் நாட்டு மொழி விக்கிப்பீடியாக்கள், குறிப்பாக மக்கள் தொகை மிகுந்த இந்திய மொழி விக்கிப்பீடியாக்கள் வளர்ச்சி குறித்து மிகுந்த அக்கறை கொண்டுள்ளது. இந்த மாநாட்டின் மூலம், இம்மொழிகளில் ஒன்றான தமிழ் மொழி விக்கித் திட்டங்களின் வளர்ச்சி குறித்து சரியான புரிதலை முன் வைக்க முடிந்தது. இம்மாநாட்டுக்கு வந்திருந்த பிற மொழி விக்கிப்பீடியர்கள், விக்கி நுட்பியலாளர்களுடனான தொடர்புகள் தமிழ் விக்கிப்பீடியா வளர்ச்சிக்கு உதவும்.

பதிவர்கள் தமிழ்விக்கிப்பீடியாவுக்கு எப்படிப் பங்களிக்கலாம்?

2009-10-27T23:00:00.000-07:00

தமிழில் வலைபதியும் ஆயிரத்திற்கும் மேற்பட்ட தமிழர்கள் நாளுக்குப் பத்து நிமிடங்கள் தமிழ் விக்கிக்குப் பங்களிப்பதன் மூலம் தமிழ் விக்கியில் பெருமளவு முன்னேறத்தை ஏற்படுத்தலாம். அத்தகைய சில யோசனைகள் இக்கட்டுரையில் கொடுக்கப்பட்டுள்ளன.

நாளுக்கு ஏதேனும் ஒரு கட்டுரையைப் படித்து அவற்றில் எழுத்துப் பிழைகளைத் திருத்தலாம். கருத்துப் பிழைகளை கட்டுரையின் பேச்சுப் பக்கத்தில் சுட்டிக்காட்டலாம். பதிவர்களில் கிட்டத்தட்ட தமிழகத்தின் ஈழத்தின் எல்லாப் பகுதிகளைச் சேர்ந்தவர்களும் உள்ளனர்.இவர்கள் தங்கள் ஊர், சுற்றியுள்ள பகுதிகள், அங்குள்ள குறிப்பிடத்தக்க இடங்கள், குறிப்பிடத்தக்க நிகழ்வுகளைப் பற்றி விக்கியில் சேர்க்கலாம் (புதிய கட்டுரைகள் எனில் 3-5 வரி என்பது கூட நல்ல தொடக்கம்). ஏற்கனவே கட்டுரை இருப்பின் ஓரிரு வரிகள் புதிதாகச் சேர்க்கலாம். தாங்கள் எழுதும் வலைப்பதிவுகளில் வரும் ஊர், பொருள் முதலானவற்றிற்கு விக்கி இணைப்புத் தரலாம். தாங்கள் இணையத்தில் படித்த நல்ல கட்டுரைகளை வெளி இணைப்பாக பொருத்தமான விக்கி கட்டுரைகளில் தரலாம்.

பல விக்கி கட்டுரைகளின் பேச்சுப்பக்கத்தில் கட்டுரை தொடர்பான கருத்துகள், சொற்பயன்பாடு, எழுத்துப் பயன்பாடு முதலிய உரையாடல்கள் நடைபெறும். அவற்றைப் படித்து கருத்துக்களைப் பரிமாறலாம்.தாங்கள் தமிழில் இருக்க வேண்டும் என நினைக்கும் தங்களுக்குப் பிடித்த தலைப்புகள், மக்களுக்குப் பயன்படும் என நினைக்கும் தலைப்புகளைப் பட்டியல் இடலாம் (கட்டுரை எழுதவியலா விட்டால்). இதனால் மற்ற கட்டுரையாளர்கள் இக்கட்டுரைகளை உருவாக்க வாய்ப்புகள் உள்ளன. தமிழ் விக்கியின் பயன்பாடு மிகும். புகைப்படம் எடுப்பவர்கள் எனில் தங்கள் ஊர் சார்ந்த புகைப்படங்கள், தங்கள் ஊரில் உள்ள சிறப்பு இடங்கள், பொருட்களைப் பற்றிய படங்களையும் இணைக்கலாம். துறைசார் வல்லுனர்கள் விக்கித்திட்டங்கள் எனப்படும் ஒரு குறிப்பிட்ட துறைசார்ந்த கட்டுரைகளை மேம்படுத்தலாம்.

கட்டுரையாக்கம் தவிர்த்த மற்ற பணிகள்.

கட்டுரைகளுக்குப் பொருத்தமான தொடுப்புகளைச் சேர்த்தல்.
வலைப்பதிவுகளில் புழக்கமாக உள்ள சொற்களை விக்சனரியில் சேர்த்தல்.
பகுப்பு:தமிழ் விக்கிப்பீடியா திட்டங்கள்
நிரலாக்கம் (தமிழ் தட்டச்சை விக்கியில் ஏதுவாக்கல்)
தமிழ் விக்கிப்பீடியா பயிற்சிப் பட்டறைகள் ஒழுங்கமைத்து நடத்துதல்
அனுமதி பெறப்பட்ட பிறரின் கட்டுரைகளைப் பதிவேற்றல்
வேறு ஏதேனும் யோசனைகள் இருப்பின் இந்தப் பக்கத்தில் சேர்க்கலாம் :)

தமிழ் விக்கிப்பீடியாவைக் காட்டிலும் செயல்பாடு குறைவான மற்ற விக்கித்தளங்கள் உள்ளன. இவற்றிலும் பதிவர்களுக்கு ஆர்வம் இருக்கலாம். விக்கிமீடியாவின் மற்ற திட்டங்களில் பங்களித்தல்:
* விக்சனரி - விக்சனரியில் தற்போது ஏறத்தாழ ஒரு இலட்சம் சொற்கள் உள்ளன. புதிய சொற்களைச் சேர்த்தல், இருக்கும் சொற்களை தமது எழுத்துக்களில் பயன்படுத்தல், தம் கட்டுரைகளில் உள்ள சில அரிய சொற்களுக்கு விகசனரி இணைப்புக் கொடுத்தல் ஆகியன எளிதாக செய்யக்கூடியவை.

* விக்கி மேற்கோள்கள் - தங்களுக்குப் பிடித்த அறிஞர்களின் மேற்கோள்களைத் தமிழில் தரலாம்.

* விக்கி செய்திகள் - தற்போது தமிழ் விக்கியின் செயல்பாடு ஒரே ஒரு விக்கிப்பீடியா பயனரின் தொடர் உழைப்பினால் சீராக வளர்ந்து வருகிறது. வலைப்பதிவர்கள் தாங்கள் முக்கியத்துவம் வாய்ந்த செய்திகளை நம்பத்தகுத்த மூலங்களின் துணையோடு உருவாக்கலாம்.

* விக்கி நூல்கள் - இதில் தமிழ் விக்கிப்பீடியாவை விட எழுத்துநடைக்கு கூடிய சுதந்திரம் உண்டு.தாங்கள் விரும்பும் தலைப்புகளில், தாங்கள் தேர்ச்சி பெற்ற துறைகளில் புதிய நூல்களை ஆக்கலாம்.

* விக்கி மூலங்கள் - காப்புரிமையற்ற பிறரது ஆக்கங்கள் இங்கு இடம்பெறத் தக்கவை. எடுத்துக்காட்டாக சங்க இலக்கியங்கள் இதில் சேர்க்கப் படலாம். காப்புரிமையற்ற தலைவர்களின் உரைகள்,கட்டுரைகளும் சேர்க்கலாம்.

இவற்றைத் தவிர வேறு யோசனைகள் இருப்பின் தெரியப்படுத்துங்கள். பயன் பெருகும்.

ஊடகங்களில் விக்கிப்பீடியாவின் பயன்பாடு

2009-10-27T16:13:00.000-07:00

பல ஆயிரம் செலவழித்து வாங்கப்படும் கலைக் களஞ்சியங்கள் பள்ளி, கல்லூரி, பல்கலைக்கழகம், பொது நூலகங்களில் கேட்பாரற்றுக் கிடக்கின்றன. அதைப் பயன்படுத்தும் அளவிற்கு மாணவர்களுக்கு விழிப்புணர்வு இல்லை என்ற காரணம் கூறினாலும் எளிதில் பயன்படுத்த யாரும் அனுமதிப்பதில்லை என்பதும் காரணம்.

அப்படி பயன்படுத்தினாலும் கலைக்களஞ்சியக் கட்டுரையைத் தேடி எடுப்பதற்குள் ஏற்படும் அயர்ச்சி ஒரு புறம், கட்டுரையின் அளவு, தரவுகள், படங்கள், மேற்கொண்டு தேடுவதற்கான ஆதாரத் தகவல்கள் இல்லாமை, ஒன்றுக்கு மேற்பட்டோர் ஒரே தகவலைப் பெறுதல் சாத்தியமின்மை போன்றவை மறு புறம். ஒரு அச்சு வடிவ கலைக் களஞ்சியத்தின் நன்மை அல்லாத கூறுகள் இவை. ஆனால் விக்கிப்பீடியாவைப் பொருத்தவரை, தகவல்களை, கட்டுரைகளை ஒரு சிறிய தேடுதல் மூலம் பெற முடிகிறது. மேலும், அந்தத் தகவல்கள் பெற்ற வழி, மேற்கொண்டு தரவுகள் தேடும் வழி போன்றவையும் எடுத்துக் கூறப்படுகிறது. கணினியுடன் இணைய இணைப்பு மட்டும் இருந்தால் போதுமானது. பிறகு உலகம் நம் கையில் வந்து விடுகிறது.

இவ்வளவு நாட்களாக தகவல்களைத் தேடி நுலகங்களில் அலைந்தது போய் இன்று நூலகம், கலைக் களஞ்சியம் ஆகியவை நம் மடி மீது தவழ்கிறது. ஊடகங்களில் தகவல் தேடும் செயல்பாடு எந்த அளவிற்கு உள்ளது என்பதை ஒரு பத்திரிகையாளராக எனக்குத் தெரிந்த அளவில் கூறுகிறேன்.

தமிழ் ஊடகங்களைப் பொருத்தவரை முதன்மை இதழில் (main issue) செய்திகளுக்கே முக்கியத்துவம் வழங்கப்படுகிறது. குறிப்பாக நாளிதழ்கள். அன்றாடச் செய்திகளை முடிந்தவரை அன்றைக்கே அளித்துவிட வேண்டும் என்று துரிதமாகச் செயல்பட வேண்டியுள்ளது. செய்திகள் பெறும் வழி செய்தியாளர்கள் மூலம் நடைபெறுகிறது. எனவே விக்கியின் பயன்பாடு இதில் குறைவு எனலாம்.

ஒரு கட்டுரை எழுதும் போது விக்கியின் பயன்பாடு மிக அதிகம் ஆகும். காட்டாக, சீனாவில் தயாரிக்கப்படும் பொம்மையில் காரீயம் கலந்திருப்பதால் அது குழந்தைகளுக்கு ஆபத்து அளிக்கும் என்று அமெரிக்காவில் தடை செய்யப்பட்டது. இதை உற்பத்தி செய்தவர் (மேட்டல் நிறுவனம்) அதிர்ச்சியில் தற்கொலை செய்து கொண்டார். ஆனால் அதற்கு முன் தனது 5000 ஊழியர்களுக்கும் ஊதியம், இதர நிலுவைகளை அளித்துவிட்டார் என்றொரு செய்தி. இதைக் கருத்திற் கொண்டு அந்நிறுவனம் யாது? அதன் உற்பத்தி என்ன? இரு நாடுகளிடையான பொருளியல் சண்டைக் காரணிகள் எவை என்ற தகவல்களை சேகரித்து நான் பணியாற்றும் தினமணி நாளேட்டில் 2007-ஆம் ஆண்டு "பொம்மலாட்டம்" என்ற தலைப்பில் தலையங்கப் பக்க கட்டுரை வரைந்தேன். அதற்கான தரவுகளை ஆங்கில விக்கிப்பீடியாவில் இருந்தே பெற்றேன்.

இலவச இணைப்புகளில், சான்றாக, தீபாவளி, பொங்கல் சிறப்பிதழ் ஆகியவற்றில் சமூக, பண்பாடு, பண்டிகை குறித்த கட்டுரைகளுக்குத் தேவைப்படும் தகவல்கள் விக்கியில் இருந்து பெறுகிறேன். அதிலும் சிற்சிலவே. ஏனெனில் குறிப்பிட்ட தலைப்பில் தேடும் போது கட்டுரைக்குத் தேவையான கருத்துச் செறிவுகளுடன் தகவல்கள் கிடைப்பது கடினம். அதே நேரம் ஒரு நாளிதழுக்குத் தேவைப்படாத தகவல்கள் மிகுதியாகக் கிடைக்கும். எனவே அந்தச் சூழல் பொருத்து விக்கியைப் பயன்படுத்துகிறோம். (மற்றவர்கள் எப்படி என்று தெரியவில்லை.)

கூகிள் தேடுபொறியில் ஏராளமான தகவல்கள் கிடைத்தாலும் அதை தேடி எடுப்பது கடற்கரை மணலில் ஊசியைத் தேடுவது போல. ஆனால் விக்கியில் இருந்தால் தொடுப்புகள் மூலமாக எளிதில் சென்றடைய முடிகிறது. இது என்னளவிலான அனுபவம்.

தமிழ் விக்கியைப் பொருத்தவரை அதில் உள்ள கட்டுரைகளின் எண்ணிக்கை குறைவாக இருப்பதால் பயன்படுத்தப்படும் விகிதமும் குறைவே. சொல்லப்போனால் பத்திரிகையாளர்களுக்கு இன்னும் அதைப் பயன்படுத்த வேண்டும் என்ற எண்ணம், விழிப்புணர்வு ஏற்படவில்லை என்றே சொல்லலாம். கணினி அறிமுகமின்மை, பயன்பாட்டு வசதியின்மை போன்றவற்றையும் கூற வேண்டும்.

ஆங்கிலப் பத்திரிகை நண்பர்களிடம் கேட்டவரை அவர்கள் கூறியது:- விக்கிப்பீடியாவைப் பயன்படுத்துகிறோம். செய்திகளைப் பொருத்தவரை பயன்பாடு குறைவே. கட்டுரைக்கு மிக பயனுள்ளதாக உள்ளது. ஆனால் அதில் உள்ள தகவல்கள், தரவுகள் எந்த அளவு அதிகாரப் பூர்வமான ஆதாரம் கொண்டவை என்பதை உறுதி செய்ய முடிவதில்லை என்றொரு கருத்து நிலவுகிறது. ஏனெனில் அதிலேயே சில கட்டுரைகளில் ஆதாரம் தேவை என வெளியிடப்படுகிறது. ஆனால் விக்கியைப் பயன்படுத்தி பழைய தரவுகள் பெறுவதில் மிகவும் பயனுள்ளதாக உள்ளது. சான்றாக, ஒரு நாட்டின் முதல் அதிபர், பிரதமர், குடியரசுத் தலைவர், முதல் நோபல் பரிசு பெற்றவர், விளையாட்டு தொடர்பான போட்டிகள் குறித்த தரவுகள் போன்றவை ஒரு கட்டுரையின் இடையே தேவைப்பட்டால் விக்கியை கேட்பதாகக் கூறுகிறார்கள்.

வார இதழ்களில் எவ்வாறு பயன்படுத்துகிறார்கள் என்பதை அதைப் படிக்கும் போதே புரிகிறது. ஏனெனில் வார இதழ் உள்ளடக்கங்களைப் பொருத்தவரை விக்கியின் தேவை குறைவுதான். ஆனால் கலைக்கதிர் போன்ற அறிவியல் இதழ்கள், சுற்றுச்சூழல் இதழ்கள் ஆகியவற்றில் அதிக பயனளிக்கக் கூடும்.

பதிவுகளுக்கும் த.வி கட்டுரைக்கும் உள்ள வேறுபாடுகள்

2009-10-27T08:00:00.000-07:00

தமிழ் பதிவர்கள் இப்புவியின் பல பகுதிகளிலுருந்தும் பல்வேறு துறைகளில் பதிவுகள் இட்டுவருகையில் கட்டற்ற கலைக்களஞ்சியமான தமிழ் விக்கிப்பீடியாவிற்கு அவர்களது பங்காற்றல் இருக்குமானால் அதன் செறிவும் வளர்ச்சியும் போற்றத் தக்கதாக இருக்கும். கணினியில் தமிழை படிக்கவும் எழுதவும் நன்கு அறிந்த தமிழ்பதிவர்கள் விக்கிப்பூடியா பங்காற்றலில் எதிர்கொள்ளும் சில வேற்றுமைகளை சக பதிவர் என்ற முறையில் இங்கு பட்டியலிட முயல்கிறேன்.

நடை:முதலாவதாக நாம் காணும் வேற்றுமை எழுதும் நடையிலாகும். பதிவுகளில் முன்னிற்பவருடன் உரையாடும் முன்னிலையில் எழுதலாம்; த.வியில் படர்க்கையில் பாடபுத்தக நடையில் எழுதப்பட வேண்டியுள்ளது. காட்டாக,"மயிலாப்பூரில் கபாலி கோவில் போயிருப்பீங்க,அங்க.." என்பதை த.வியில் "[[சென்னை]], [[மைலாப்பூர்|மைலாப்பூரில்]] அமைந்திருக்கும் கபாலீசுவரர் கோவிலில்.." என்று எழுத வேண்டி யுள்ளது.

தவிர தேவையற்ற வருணனைகள்,மரியாதை மொழிகள் மற்றும் பட்டப்பெயர்கள் தவிர்க்கப் பட வேண்டும். "துள்ளி விளையாடும் கயல்கள் நிறைந்த துங்கபத்ரா நதிக்கரையில் பூஞ்சோலைகளுக்கிடையே அமைந்த அழகிய சாரதா தேவி கோவில்" என்றில்லாமல் "[[கர்நாடகா ]] மாநிலத்தில் [[சிருங்கேரி]] யில் துங்கபத்ரா ஆற்றின் கரையில் சாரதாதேவி கோவில் அமைந்துள்ளது"என்று எழுதுதல் வேண்டும்.வேண்டுமானால் அழகான சூழலில் என்று சேர்க்கலாம். விக்கிப்பீடியாவின் நடை கையேட்டை ஒருமுறை பார்த்துக் கொள்ளுங்கள்.

உசாத்துணைகளும் சான்றுகளும்:விக்கிப்பீடியாவின் அடித்தளமே சரிபார்க்கக்கூடிய தரவுகளை பின்னணியாகக் கொண்ட கட்டுரைகளே. இக்கட்டுரைகள் பலரால் உருவாக்கப் படுவதால் தனிப்பட்டவர்களின் நம்பிக்கைகளும் சார்புகளும் கட்டுரையில் இடம் பெறுவதைத் தவிர்க்க எந்தவொரு உண்மைக்கும் சான்று கொடுத்தல் இன்றியமையாயதது. இந்திய அரசு நிருவாக அமைப்புகளின் திறனில் முதலாவதாக (கடைசியில்) தமிழகம் திகழ்கிறது என்று எழுதினால் பதிவுகளில் சான்று கொடுப்பதில்லை.ஆனால் விக்கியில் <ரெஃப்> மீயுரை ஆணைகளுக்கிடையே இந்த நாளன்று வெளியிட்ட இந்திய உள்துறை அறிக்கை எண்.. என்ற சான்றினை அளிக்க வேண்டும்;அல்லது செய்தி வந்த நம்பத்தகுந்த பதிப்புகளின் விவரம் வேண்டும்.
உணர்ச்சி வயப்படும் பதிவர்கள் இந்த சான்று தேவை என்ற குறிப்பினால் பாதிக்கப்படுவதையும் பார்க்கலாம். வாக்கு கொடுத்தல் என்பது இந்திய கலாசாரத்தில் மிகவும் புனிதமாகக் கருதப்படுவதால் தங்கள் வாக்கிற்கு சான்று கோருதல் தங்களுக்கு இழைக்கப்பட்ட கொடுமையாக கருதுவோரும் உண்டு. ஆங்கில விக்கிப்பீடியர்களுக்கு சூரியன் கிழக்கில் உதிக்கிறான் என்பதற்கும் சான்று இணைப்பது இயல்பாக உள்ளது.

வடிவமைப்பு:பதிவுகள் எண்ணவோட்டதின் ஒழுக்கோடு எழுதப்படுபவை.ஆயின்,விக்கி கட்டுரைகளில் முகவுரை (சுருக்கம்), ஆரம்ப காலத்திலிருந்து கால ஓட்டத்துடன் இயைந்த வளர்ச்சி,தாக்கங்கள்,சாதனைகள் என பல்வேறு பத்திகளாக பிரிக்கப்படுதல் முதன்மையான தேவையாகும். பல கட்டுரைகளில் தகவற்பெட்டி வார்ப்புரு ஒன்றில் சுருக்கமான தகவல்களை அளிக்க வேண்டும். கட்டுரையின் இறுதியில் தொடர்புடைய இணைப்புகள்,மேலும் அறியக்கூடிய உசாத்துணைகள் இவற்றை வெளியிடுதல் கட்டுரையை வளப்படுத்தும்.இந்த விக்கிப்பீடியா பக்கம் உங்களுக்கு உதவும்.

உரிமை இல்லாமை:விக்கிப்பீடியா கட்டுரைகள் அனைத்தும் குனூ தளையறு ஆவண உரிமத்தின் கீழ் அளிக்கப்படுவன. எளிய மொழியில் இக்கட்டுரைகளை யாரும் நகலெடுக்கவோ,மாற்றவோ இயலும். விக்கிப்பீடியாவின் எந்தப் பயனரும், பதியாத வருனருட்பட, கட்டுரைகளில் தவறுகளை திருத்தவோ, செம்மையுறச் செய்யவோ இயலும். இந்நதிலையில் பதிவுகளில் தமது ஆக்கங்களுக்கு முழு பொறுப்பேற்றிருந்த பதிவர்கள், அவ்வாறின்றி தங்கள் விக்கி ஆக்கங்கள் பலவாறு மாற்றமடையும்போது வருந்துவதும் உண்டு. பலரும் ஒருங்கிணைந்து ஆற்றும் பணியிது என்பதை எண்ணத்தில் கொள்ள மறந்தவர்கள் இவர்கள். அதே நேரம்,ஒவ்வொரு கட்டுரைக்கும் உள்ள உரையாடல் கீற்றில் (tab), மாற்றங்கள் விவாதிக்கப்பட்டு பெரும்பாலனவர்களின் கருத்து ஏற்கப்படுகிறது.

பின்னோட்டம் இல்லாமை:பதிவர்களின் முதன்மையான மற்றொரு மனத்தடங்கல் தாம் எழுதியவை குறித்த பின்னூட்டம் இல்லாமை. பதிவுலகில் தமது எழுத்தின் தாக்கத்தினைக் குறித்த மறுமொழிகளை உடனுக்குடன் அறிந்து கொள்ள முடிந்தவர்கள், விக்கியில் சிறப்பான ஒரு ஆக்கத்தை அளித்தும் அது குறித்த எந்த பின்வினையும் இன்றி உற்சாகம் இழக்கிறார்கள். சக விக்கிப்பீடியர் அவரது பயனர் பக்கத்தில் பாராட்டி உற்சாகப்படுத்தினாலும், படிப்பவர் எதிர்வினை யின்றி வெறுமையாக உணர்கிறார்கள். பயனை எதிர்நோக்காது தமிழன்னைக்கு செய்யும் வழிபாடாக கொள்ளுதல் வேண்டும்.

காப்புரிமையற்ற படிமங்களை இணைத்தல்:கட்டுரையை வளப்படுத்த படிமங்கள் அவசியம். பதிவுகளுக்கு இணையத்தில் கிடைக்கும் எந்த படிமத்தையும் இணைக்கிறோம். ஆனால் விக்கிப்பீடியா தளத்தில் இணைக்கப்படும் படிமங்கள் காப்புரிமை அற்றவையாக இருக்க வேண்டும். பொதுவாக நாமே எடுத்த,வரைந்த,ஆக்கிய படிமங்களுக்கு அளிப்புரிமை அளித்தல் எளிது. இணையத்தில் இருந்து எடுத்ததாயின் அதன் காப்புரிமை குறித்து அறிந்து,வேண்டுமாயின் உரிமையாளரிடம் ஒப்புதல் பெற்று இணைத்திட வேண்டும். இதற்கான விதிமுறைகள் சற்றே கடினமாக உள்ளது.

விக்கி மென்பொருள் இயக்கம்:பெரும்பான்மையான தமிழ் பதிவர்களுக்கு இது ஒரு தடையாக இல்லாதபோதும் ஒருசிலருக்கு இதுவும் ஒரு தடையாக உள்ளது. இதனை போக்குவதற்கு பல விக்கிப்பீடியா உதவிப்பக்கங்கள் எழுதப்பட்டுள்ளன.

தமிழில் விக்கிப்பீடியா

2009-10-27T02:00:00.000-07:00

உலகின் பெரும்பாலான வரி வடிவம் உடைய மொழிகளில் விக்கிப்பீடியா உள்ளது. விக்கிப்பீடியா முதலில் தொடங்கப்பட்ட ஆங்கிலத்தில் அதிக அளவாக முப்பது இலட்சத்திற்கும் மேற்பட்ட கட்டுரைகள் உள்ளன. ஒரு இலட்சத்திற்கும் மேற்பட்ட கட்டுரைகள் உடைய மொழிகள் 28.

இந்திய மொழிகளில் தமிழ், தெலுங்கு, இந்தி, வங்காளம், மலையாளம், உருது, மராத்தி, நேபாளி, குஜராத்தி, பிஸ்னுபிரியா மணிப்புரி ஆகிய மொழிகளில் 10,000 க்கும் மேற்பட்ட கட்டுரைகள் உள்ளன. குறிப்பாக சொல்வதென்றால் தமிழில் 19,600 க்கும் மேற்பட்ட கட்டுரைகள் உள்ளன. விரைவில் 20,000 எண்ணிக்கையை தொடும்.

நாம் இணையத்தில் தேடும் பொழுது விக்கிப்பீடியாவில் அந்த தலைப்பு இருந்தால் தேடலில் நமக்கு அது சிக்கும். ஆங்கிலத்தில் ஏகப்பட்ட இணையதளங்கள் உள்ளதால் நிறைய தகவல்கள் நமக்கு கிடைக்கின்றன. தமிழில் தேடினால் குறைவாகவே கிடைக்கின்றன. காரணம் தமிழில், இணையத்தில் உள்ள உள்ளடக்கங்கள் மிகக்குறைவு. செய்தித்தாள்கள் தமிழிலில் இணையத்தில் கிடைப்பதாலும் வலைப்பதிவுகள் காரணமாகவும் தேடல்களில் சில சிக்குகின்றன.

தமிழின் இந்த நிலை போகவேண்டுமானால் இணையத்தில் தமிழ் உள்ளடக்கம் அதிகம் கிடைக்க வேண்டும். இது கைகூட துறை சார்ந்த தமிழ் இணையம் வளரவேண்டும். இது கைகூடுமா என்று தெரியவில்லை. ஆனால் தமிழ் விக்கிப்பீடியா அந்த சிறந்த வாய்ப்பை வழங்குகிறது.

தமிழ் விக்கிப்பீடியா என்பது தமிழில் உள்ள இணைய கலைக்களஞ்சியம் என்பது தெரியும். இதன் சிறப்பு எல்லோரும் பங்களிக்கலாம் என்பதே. இதில் உள்ள கட்டுரைகள் காப்புரிமை விலக்கம் பெற்றவை, எனவே எல்லோரும் இதை தடையின்றி பயன்படுத்தலாம். பலதரப்பட்ட கட்டுரைகளை, பல துறைசார் கட்டுரைகளை தமிழ் விக்கிப்பீடியாவில் எழுதும் போது அவை தமிழில் தேடுபவருக்கு கிடைக்கும்.

அவினாசிலிங்க செட்டியார் தலைமையிலான தமிழ் வளர்ச்சிக் கழகம் பெரியசாமி தூரன் அவர்களை ஆசிரியராக கொண்டு 10 தொகுதிகள் உடைய கலைக்களஞ்சியமத்தை உண்டாக்கியது. ஒவ்வொரு தொகுதியும் 750 பக்கங்களை கொண்டிருந்தன. முதல் தொகுதி 1954ம் ஆண்டு வெளிவந்தது. தமிழ் பல்கலைக்கழகம் அறிவியற் கலைக்களஞ்சியத்தை வெளியிட்டு உள்ளது. இந்த அரிய முயற்சி பெரும்பாலோருக்கு சரியாக சென்றடையவில்லை. அதற்கு பல காரணங்கள் இருக்கலாம்.

இணைய இணைப்பு உடைய எல்லோராலும் தமிழ் விக்கிப்பீடியாவை பயன்படுத்த முடியும், பங்களிக்க முடியும். இணைய தேடல்களில் தேடல் தொடர்பான கட்டுரை தமிழ் விக்கிப்பீடியாவில் இருந்தால் தேடல் முடிவுகளில் இது முதலில் சிக்கும். தமிழ் கூறும் நல்லுலககுக்கு நம்மாலான தொண்டாக தமிழ் விக்கிப்பீடியாவில் சில கட்டுரைகளை எழுதுவோம்.

அறிவியல் தமிழின் தேக்க நிலை

2009-10-26T23:00:00.000-07:00

அறிவியல் தமிழ் ஒரு தேக்க நிலையில் தொடர்ந்து இருந்து வருகிறது. துறைசார் இதழ்கள், ஆய்வேடுகள் தமிழில் அரிது அல்லது இல்லை. அறிவியல், தொழில்நுட்பம், மருத்துவம் போன்ற துறைகளில் உயர் கல்வி தமிழில் இல்லை. இலக்கியத்தில், சமயத்தில், அரசியலில் தமிழ் மொழி பயன்படுத்தப்படுவது போன்று, இதர துறைகளில் தமிழ் மொழி பயன்படுத்தப்படுவது இல்லை.

இது கடந்த சில நூற்றாண்டுகளின் அறிவியல் புரட்சிக்கு தமிழ் ஈடு கொடுக்காதது மட்டுமல்ல, தமிழ் மொழி வரலாற்றிலேயே அறிவியல் படைப்புகளுக்கு முக்கியத்துவம் தரப்பட வில்லை. இதைப் பற்றி அறிவியல் நம்பி தமிழில் அறிவியல் கலைச்சொற்களின் தேவையும் வளர்ச்சியும் என்ற கட்டுரையில் பின்வருமாறு கூறுகிறார்.

வால்மீகியின் பேரிதிகாசத்தை தமிழில் தந்து தாய் மொழிக்குப் பெரும்புகழ் தேடித்தந்தான் கம்பன். ஆனால் சாணக்கியனின் அர்த்த சாஸ்த்திரத்தையோ, ஆரியபட்டாவின் வான சாஸ்திரத்தையோ, அவன் கணிதவியலையோ தமிழுக்குக் கொண்டுவர யாருக்கும் தோன்றவில்லை. காவிரிப்பூம்படினத்தின் அதிஅற்புத அழகையும் துறைமுகத்தில் வந்து நிற்கும் விதவிதமான வடிவங்கள் கொண்ட கப்பல்களையும், துறைமுக அதிகாரிகள் சுங்கம் வசூலிக்கும் தோற்றத்தையும் கண் முன்னே கொண்டு வந்து நிறுத்திய பட்டினப்பாலை, அதன் மறுபக்கமான பெரும் மரக்கலங்களைப் படைத்த கரங்களின் திறமையையோ, அக்கலங்களைச் செலுத்திக் கடலை வென்ற தோள்களின் ஆற்றலையோ பற்றி விளக்கும் குறிப்புகள் ஏதும் இல்லை.

இதைப் பற்றி விமர்சகர் கா. சிவத்தம்பி தமிழ் இலக்கிய வரலாறு என்னும் நூலில் பின்வருமாறு கூறுகிறார்:

தமிழில் அறிவியல் நூல்களின் வளர்ச்சி பற்றி இலக்கியத்தின் வரலாற்று நூல் ஒன்றிலாவது எதுவும் இல்லை. அதை நாம் செய்யாத வரையில், தமிழிலக்கிய வரலாறு தமிழர்களின் சிந்தனை வரலாற்றைச் சுட்டுவதாகவே அமைய முடியாது.

இதே கருத்தை பொறியியலாளர் சி. ஜெயபாரதன் விடுதலை இந்தியாவில் விஞ்ஞானத் தமிழ் வளர்ச்சி என்ற கட்டுரையில் பின்வருமாறு கூறுகிறார்:

கடந்த ஐநூறு ஆண்டுகளாக இலக்கியங்கள் வளர்ந்து காவியங்கள் பெருகினாலும், தமிழகத்தில் விஞ்ஞானத் துறைகள் தலை தூக்கியதாகவோ, தமிழ்மொழியில் சிறப்பான விஞ்ஞான நூல்கள் படைக்கப் பட்டதாகவோ அறிகுறிகள் எவையும் காணப்பட வில்லை..

இந்த அறிஞர்களின் கூற்று அறிவியல் தமிழின் தேக்க நிலையைத் தெளிவாகக் காட்டுகிறது.

அறிவியல் தமிழ் பற்றிய கருத்தாடலில், முதலில் அறிவியல் தமிழ் தேவையா என்ற கேள்வி முன்வைக்கப்படுகிறது. தமிழ்நாட்டில் 74% மட்டுமே படிப்பறிவு உள்ளவர்கள். இதில் பெரும்பான்மையானவர்கள் தமிழில் அடிப்படைக் கல்வியைப் பெறுகிறார்கள். இலங்கையில் பெரும்பான்மைத் தமிழ் மாணவர்கள் பல்கலைக்கழகம் வரை தமிழ்வழிக் கல்வியே பெறுகின்றார்கள். பலகலைக்கழகத்திலும் கலை, வேளாண்மை, சமூகவியல் போன்ற இயல்கள் தமிழில் உள்ளன. மலேசியாவில் பெரும்பான்மைத் தமிழ் மாணவர்கள் அடிப்படைக் கல்வியைத் தமிழில் பெறுகின்றார்கள். சிங்கப்பூரில் தமிழ் ஒரு பாடமாக எல்லா மட்டங்களில் உள்ளது. இவ்வாறு தமிழ் கல்வி மொழியாக உள்ளது. அறிவியல், தொழில்நுட்பம், மருத்துவம் ஆகிய துறைகள் பற்றி இந்த மாணவர்கள் அறிய வேண்டும் ஆயின் அத்துறைசார் தகவல்கள் தமிழ் மொழியில் இருக்க வேண்டியது அவசியமாகும். மொழியியல், சமூகவியல் நோக்கில் இத்துறைகளில் தமிழ் மொழி வளர்ச்சி அடையாவிடின் அது பயன் இழந்து வெகு விரைவில் இறந்து போகும்.

அறிவியல் தமிழ் முக்கியம் என்று தெரிகிறது. அது தேக்க நிலையில் இருப்பது தெரிகிறது. ஏன் இந்த நிலை?

"அறிவியல் மற்றும் தொழில்நுட்ப சொற்கள் தமிழில் குறைவே. காரணம் அவற்றை புழங்கும் சூழல் இங்கு இல்லை." என்று எழுத்தாள் ஜெயமோகன் தமிழ் நவீன பயன்பாட்டுக்கு உதவுகிறதா? என்ற கட்டுரையில் குறிப்பிடுகிறார். அறிவியல், தொழில்நுட்ப சொற்கள் ஆங்கில மொழியோடு ஒப்பு நோக்குகையில் குறைவே. ஆனால் பல இலட்ச சொற்கள் உள்ளன. விக்சனரியில் தற்போது ஒரு இலட்சம் சொற்கள் உள்ளன. ஆனால் அவற்றை புழங்கும் சூழல் இல்லை என்பது மிகச் சரியே. இதற்கு சமூகவியல், மொழியியல் காரணங்கள் உள்ளன.

அண்மைக் காலம் வரை தமிழ்ச் சமூகம் படிப்பறிவு குறைந்த சமூகமாகவே இருந்து வந்திருக்கிறது. இன்றும் தமிழ்நாட்டில் 74% மட்டுமே படிப்பறிவு பெற்றவர்கள். பொதுச் சமூகத்தில் அறிவியல் நோக்கிய ஈடுபாடு மிகக் குறைவானதே. எனவே அறிவியல் தமிழில் புழங்க வேண்டியதற்கான தேவை எளவில்லை. இச்சூழல் அறிவியல் துணுக்குகள் நூறு போன்று மிக மோலாட்டமான படைப்புகளுக்கு மட்டுமே வழிவகுத்தது.

தமிழ்ச் சமூகத்தின் ஒரு சிறுபான்மையினர் இத்துறைகளில் சிறப்பு பெற்றவர்கள். நடைமுறையில் தமிழ் மொழி மூலம் இத்துறைகளைக் கற்றவர்களும் உண்டு. எனினும் பெரும்பாலனவர்கள் இத்துறையைகளை ஆங்கிலத்திலேயே கற்றுப் பயன்படுத்துகிறவர்கள். இவர்களுக்குள் தமிழ் மொழி தகவல் பரிமாற்றம் சிறிய அளவிலேயே உண்டு.

மொழியியல் நோக்கில் அறிவியல் தமிழிழுக்கு பல தடைகள் உண்டு. பல இலட்சம் சொற்கள் உருவாக்கப்பட்டாலும், அவற்றை கருத்துச் சூழலில் பயன்படுத்தும் எடுத்துக்காட்டுக்கள் அரிதாகவே இருக்கின்றன. அறிவியல் தமிழை நெறிப்படுத்த எந்த நடவடிக்கைகளும் எடுக்கப்படவில்லை. எ.கா தமிழ்நாடு, இலங்கை போன்ற நாடுகளில் உருவாக்கப்படும் கலைச்சொற்கள் இடையே உள்ள வேறுபாடுகள். அறிவியல் எழுத்து, நுட்ப எழுத்து பற்றிய அறியாமை.

நாம் செம்மொழித் தமிழுக்கு எவ்வளவு முக்கியத்துவம் தருகிறோமோ, அதை விட முக்கியத்துவம் அறிவியல் தமிழுக்கு தர வேண்டும். வளங்களை ஒதுக்கி, திட்டங்கள் நிறைவேற்றப்பட வேண்டும். இல்லை பாதிப்பு தமிழ் மொழிக்கும் தமிழ்ச் சமூகத்துக்குமே.

வலைப்பதியும் தமிழ் விக்கிப்பீடியர்கள்

2009-10-25T21:00:00.000-07:00

வலைப்பதியும் தமிழ் விக்கிப்பீடியர்கள் பட்டியல்:

1. சந்தோஷ்குரு
2. ரவி
3. சிவக்குமார்
4. சந்திரவதனா
5. பாலச்சந்தர் முருகானந்தம்
6. குறும்பன்
7. மயூரன்
8. மயூரேசன்
9. கலை
10. மோகன்தாஸ்
11. செல்வராஜ்
12. தெரன்சு
13. புருனோ
14. kanags
15. சத்தியா
16. நற்கீரன்
17. மணியன்
18. ரகுநாதன்
19. பெ.நாயகி

சிலர் பதிவுகளில் ஒரு பெயரிலும் விக்கியில் ஒரு பெயரிலும் எழுதலாம். சிலர் வலைப்பதிவர்கள் தாம் என்று நாங்கள் அறியாமலே இருக்கலாம். நீங்களும் ஒரு வலைப்பதியும் விக்கிப்பீடியரா? தயவு செய்து, யாருடைய பெயராவது விடுபட்டிருந்தால் தங்கள் விக்கி பயனர் பெயர், வலைப்பதிவு முகவரி விவரங்களை வலைப்பதியும் தமிழ் விக்கிப்பீடியர்கள் பக்கத்தில் நீங்களே சேர்த்து விடுங்கள்.

ஆர்வமுள்ள வலைப்பதிவர்கள், இந்தப் பட்டியலில் உள்ள தங்கள் வலைப்பதிவு நண்பர்களைத் தொடர்பு கொண்டு விக்கிப்பீடியா குறித்த தங்கள் ஐயங்களைத் தீர்த்துக் கொள்ளலாம் என்று எதிர்பார்க்கிறோம். நன்றி.

தமிழக அரசு நடுநிலைப்பள்ளியில் தமிழ் விக்கிப்பீடியா பயன்பாடு

2009-10-25T20:00:00.000-07:00

தமிழ்நாட்டில் உள்ள புதுக்கோட்டை மாவட்டம், அறந்தாங்கி - > பேராவூரணி செல்லும் வழியில் உள்ள மாங்குடி ஊராட்சி ஒன்றிய தமிழக அரசு நடுநிலைப்பள்ளியில் மாணவர்களும் ஆசிரியர்களும் தமிழ் விக்கிப்பீடியா பயன்படுத்துகிறார்கள். இது குறித்து பள்ளியின் தலைமை ஆசிரியர் திரு. சோதிமணி அவர்களைத் தொடர்பு கொண்டு பேசினோம்.அறிந்து கொண்டவை:

* தமிழ் விக்கிப்பீடியாவை 6, 7, 8ஆம் வகுப்பு தமிழ் வழிய மாணவர்கள் பயன்படுத்துகிறார்கள்.

* ஒரு நாளைக்கு ஒரு பாட வேளை நேரம் இதற்காக ஒதுக்கப்படுகிறது. வீட்டுப் பாடம், கட்டுரைப் போட்டிகள், பேச்சுப் போட்டிகள் போன்ற தேவைகள் இருந்தால் பகல் உணவு வேளை, மாலை பள்ளி விட்ட பிறகும் கூடுதல் நேரம் எடுத்துப் பயன்படுத்துகிறார்கள்.

* கட்டுரைகள் 99% வீதம் புரிந்து கொள்ளத்தக்கதாகவே உள்ளன.

* மாணவர்கள் மட்டுமல்லாது ஆசிரியர்களும் பயன்படுத்திப் பல தகவல்களைத் தெரிந்து கொள்ளத் தக்கதாக இருக்கிறது.

* புதுக்கோட்டை மாவட்டம் (அதாவது உள்ளூர் தகவல்கள்), தமிழ்நாடு, இந்தியா குறித்த செய்திகள் கூடுதலாக இருந்தால் நன்றாக இருக்கும்.

* எடுத்துக்காட்டுப் பயன்பாடுகள்: "நாட்டுக்குழைத்த தலைவர்கள்" என்று போட்டி வைத்தால் மாணவர்களே காமராசர், நேரு என்று தேடி அக்கட்டுரைகளை அச்சிட்டு எடுத்துப் பயன்படுத்துகிறார்கள். "காவிரி தன் வரலாறு கூறுதல்" என்று தலைப்பு வைத்தால் காவிரி ஆற்றுக் கட்டுரைக்குள் புகுந்து குடகு, பூம்புகார் என்று ஒன்றுக்குள் ஒன்றாக தொடர் கட்டுரைகளைப் படிக்கிறார்கள். விக்கி வரவுக்கு முன் பாடநூல் அல்லது நூலக நூலில் உள்ள ஒரே மாதிரியான கட்டுரைகளையே எல்லாரும் படித்ததாகவும் தற்போது பாட நூலுக்கு வெளியேயும் பல்வேறு தலைப்புகளிலும் படித்துப் படைப்பூக்கத்துடன் செயல்படுவதாகவும் தெரிவித்தார். குறிப்பாக, இது வரை 20 வரிகள் எழுதிக் கொண்டிருந்தவர்கள் 60 வரிகள் உள்ள அளவுக்கு தகவல் சேர்த்து எழுதுகிறார்கள் (இது விரிவான கட்டுரைகள் எழுத வேண்டிய தேவையை உணர்த்துகிறது)

* தமிழ் விக்சனரியையும் பயன்படுத்துகிறார்கள்.

ஆக மொத்தம் விக்கி மிகவும் பயனுள்ளதாக இருப்பதாகவும் இன்னும் மென்மேலும் விக்கியை வளர்த்து எடுக்குமாறும் கேட்டுக் கொண்டார்.

இது போன்று பள்ளிகளில் தமிழ் விக்கிப்பீடியா பயன்படத் தொடங்கி உள்ளது மேலும் முனைந்து பங்களிக்க ஊக்கமாக இருக்கும். திரு. சோதிமணி அவர்களைப் போல் முன்மாதிரியாகத் திகழும் நல்லாசிரியர்களுக்கு எங்கள் நெஞ்சார்ந்த நன்றியையும் வாழ்த்துகளையும் தெரிவித்துக் கொள்கிறோம்.

பார்க்க: பள்ளிகளில் தமிழ் விக்கிப்பீடியா பயன்பாடு குறித்த தமிழ் விக்கிப்பீடியா உரையாடல்.

இச்செய்தியை நேரில் கண்டு எழுதிய லக்கிலுக்குக்கும் பதிப்பித்த புதிய தலைமுறை இதழுக்கும் எங்கள் நன்றியைத் தெரிவித்துக் கொள்கிறோம்.

தமிழ் விக்கிப்பீடியா உதவிப்பக்கங்கள்

2009-10-25T08:00:00.000-07:00

விக்கிப்பீடியா அனைவரும் பங்கேற்று மேம்படுத்தக் கூடிய கட்டற்ற கலைக்களஞ்சியம் ஆகும். தமிழ் விக்கிப்பீடியாவினை பயன்படுத்தவும் , விக்கிப்பீடியாவிற்கு எப்படி கட்டுரைகள் எழுதுவது, விக்கிப்பீடியா சமூகத்தில் எப்படி பங்குகொள்வது போன்ற வினாக்களுக்கான விடையை தந்திடும் வகையில் பல உதவிப் பக்கங்கள் எழுதப்பட்டுள்ளன.

தமிழ் இடைமுகம் காணமுடியாதவர்களுக்கு இங்கு வழிகாட்டப்படுகிறது. அடிக்கடி கேட்கப்படும் கேள்விகள் மற்றும் கேள்விகள் பக்கங்களில் தமிழில் தட்டச்சுவது எப்படி என்றும் புதிய கட்டுரையாக்கம் குறித்தும் எழுப்பப்படும் கேள்விகளுக்கு விடை காணலாம்.

தமிழ் விக்கிப்பீடியா மீடியாவிக்கி என்ற மென்பொருளை அடிப்படையாகக்கொண்டு இயங்குவது.உரையை வடிவமைப்பதற்கு உரிய ஆணைகள் வழமையான உலாவியில் பயன்படுத்தப்படும் மீயுரை குறிகள் போலன்றி சற்றே மாறுபடுகின்றன.காட்டாக, தடித்த எழுத்துகளுக்கு,மீயுரையில் &lt b &gt அச்சொற்றொடரின் &lt /b &gt இருபுறமும் பயன்படுத்தினால் இங்கு ''' என்னும் குறிகளுக்குள் அவை இடப்பட வேண்டும். இத்தகைய அடிப்படை ஆணைகளுக்கான உதவியை இங்கு பெறலாம்.தவிர இந்த நினைவுக் குறித்தாளும் உதவும்.இந்த மீடியாவிக்கி மென்பொருளைப் பற்றி நீங்கள் அறிய விரும்பினால் ஆங்கிலத்திலுள்ள இந்த கட்டுரை உதவும்.

விக்கிப்பீடியா:உதவி பக்கத்தில் (முதற்பக்கத்தில் உள்ள இடது வழிகாட்டிபட்டையில் உள்ள உதவி இணைப்பு மூலம் நீங்கள் சென்றடையலாம்) பயனர்களுக்கு எழக்கூடிய பல ஐயங்களுக்கு விளக்கம் அளிக்கக்கூடிய உதவிப்பக்கங்கள் மற்றும் பல்லூடக பயிற்சிகள் பட்டியலிடப்பட்டுள்ளன.

பொதுவாக தொழில்முறை கட்டுரைகளை தமிழாக்கம் செய்யும்போது ஆங்கிலச்சொற்களுக்கீடான தமிழ்சொற்களைத் தேடுவது இயல்பு. தமிழ் அகரமுதலி,கலைச்சொல் ஒத்தாசை மற்றும் கலைச்சொல் செயல்பாடுகள் ஒருங்கிணைவு, கலைச்சொல் கையேடு என இவை உங்கள் தமிழாக்கத்திற்கு துணை புரியும்.தவிர,தமிழ் விக்கிப்பீடியா ஓர் கலைக்களஞ்சியமாதலால்,இங்கு பயிலும் நடை குறித்த கையேடுகள் பட்டியலை சமுதாய வலைவாசலில் காணலாம்.விக்கிப்பீடியாவின் உள்ளடக்கம் நடுநிலைநோக்கோடு,தகுந்த சரிபார்க்கத் தக்க சான்றுகளுடன்,முழுமையும் காப்புரிமை அற்ற ஆக்கங்களுடன் அமைக்கப்பட வேண்டும்.இதற்கான வழிகாட்டல்களை இங்கு காணலாம்.இத்தகைய வழிகாட்டலைப் பின்பற்றிய கட்டுரையொன்றை ஆக்கிட விருப்பம்,ஆனால் எதைப்பற்றி எழுதுவது என்று சிந்திக்கிறீர்களா ? எவ்வாறு பங்களிக்கலாம் என இங்கு காண்க. இனி உங்கள் பங்களிப்பை துவங்க இந்த பயிற்சிப்பக்கங்கள் சரியான இடம்.

இவை எதிலும் உங்களுக்குரிய ஐயம் தீர்க்கப்படவில்லையாயின்,ஒத்தாசை பக்கம்,மற்றும் உசாத்துணை பக்கங்களில் தேடலாம்;மற்றும் வினா எழுப்பலாம்.ஆலமரத்தடி என பெயரிடப்பட்டுள்ள சமூக விவாதமேடையில் யோசனைகள் மற்றும் விளக்கங்களை விவாதிக்கலாம்.இவற்றையும் மீறி,தன்னார்வலர்களால் கட்டப்படும் இந்த கூட்டு முயற்சியில் நீங்கள் பங்மேற்றிட,ஒவ்வொரு விக்கிப்பீடியரும் உதவிட ஆர்வத்துடன் உள்ளனர்.

விக்கித் திட்டம் உயிரியல்

2009-10-17T09:08:00.000-07:00

தமிழ் விக்கிப்பீடியாவில் துறைசார் கட்டுரைகளை ஒருங்கிணைத்த முறையில் உருவாக்க விக்கித் திட்டங்கள் உதவுகின்றன. ஒரு துறையின் துணைத் துறைகள், கருத்துருக்கள், கலைச்சொற்கள் போன்றவற்றில் குவியப்படுத்தப்பட்ட கவனம் தந்து அந்தத் துறைக்கு தேவையான கட்டுரைகளையும், இதர உள்ளடக்கங்களையும் உருவாக்க இத்திட்டங்கள் உதவுகின்றன. ஒரு துறையில் கணிசமான தமிழ் விக்கிப்பீடியர்கள் சேரும் போது இத்தகைய திட்டங்கள் முன்னெடுக்கப்படுகின்றன. அந்த வரிசையில் அண்மையில் விக்கித் திட்டம் உயிரியல் தொடங்கப்பட்டது. கலை, மகிழ்நன், கார்த்திக், தகவல் உழவன் போன்ற துறைசார் வல்லுனர்களின் கூட்டு முயற்சியாக இத்திட்டம் தொடங்கப்பட்டது.

உயிரியலின் முக்கிய பிரிவுகளாக உயிரணுவியல், மூலக்கூற்று உயிரியல், மரபியல், படிவளர்ச்சி உயிரியல், உயிரின வகைப்பாடு, நுண்ணுயிரியல், தாவரவியல், விலங்கியல், சூழலியல், உடலியங்கியல், உடற்கூற்றியல், உடல் வளர்ச்சியியல், வேளாண்மை, மருத்துவம், உயிர்த் தொழில்நுட்பவியல் ஆகியவை தற்போது அடையாளம் காணப்பட்டுள்ளன. இத்துறையில் உள்ள தமிழ் உசாத்துணைகள் பட்டியல் இடப்பட்டு வருகின்றன. இத்துறையில் எழுதப்பட வேண்டிய கட்டுரைகளின் தலைப்புக்கள் பட்டியலிடப்பட்டு, முக்கியத்துவம் அடிப்படையில் தொகுக்கப்படுகின்றன.

துறைசார் வல்லுனர்கள் மட்டும் இன்றி யாரும் இத்திட்டத்தில் பல வழிகளில் பங்களிக்க முடியும். பல்லாயிரக்கணக்கில் இருக்கும் உயிரினங்கள், நோய்கள் போன்றவற்றைப் பற்றி எழுத முடியும். படங்கள் சேக்க முடியும். மெய்ப்பு பாத்து, சொல் திருத்தி, எளிமைப் படுத்தி உதவ முடியும்.

மேலும் விபரங்களுக்கு: விக்கித் திட்டம் உயிரியல்

ரொறன்ரோ தமிழ் தகவல் தொழில்நுட்பக் கருத்தரங்கு

2009-09-29T17:13:00.000-07:00

தமிழர்கள் மத்தியில் கணினிப்பாவனையை ஊக்குவிக்கும் நோக்கிலும் கணினியில் தமிழ் பாவனையை இலகுபடுத்தும் நோக்கிலும் எதிர்வரும் ஒக்டோபர் மாதம் 4ஆம் திகதி (04/10/2009)பிற்பகல் 4மணிக்கு கனடா கந்தசாமி கோவில் மண்டபத்தில் கருத்தரங்கும் அறிமுக நிகழ்வும் நடைபெற உள்ளது.

இந்த நிகழ்வில்,
* தமிழ் விக்கிபீடியா
* உத்தமம் - தமிழ் இணைய மாநாடு 2009
* வலைப்பூ Blogs
* தமிழ் மென்பொருள்கள்
ஆகிய தலைப்புகளில் கருத்தரங்கும்,
* ’புத்தகம்’ இணையத்தளம் – ஈழத்தமிழர்களுக்கான சர்வதேச புத்தகக்கடை
* தமிழ் தட்டச்சு சேவை
போன்றவற்றின் அறிமுக நிகழ்வும்,
*பரிசு அட்டை – புத்தகம் இணையம்
*தமிழ் மென்பொருள்கள்

ஆகியவற்றின் விற்பனையும் இடம்பெறவுள்ளது.

இது தொடர்பான மேலதிக விபரங்களுக்கு 416 273 5811 என்ற இலக்கத்துடன் தொடர்புகொள்ளலாம்.

அனைவரையும் அன்புடன் அழைக்கிறோம்.

அன்புடன்
புலம்பெயர் தமிழர் உலகம்.

வலைப்பதிவர்கள் விக்கிப்பீடியாவுக்கு ஆற்றக்கூடிய பங்களிப்புகள்

2009-06-08T09:52:00.000-07:00

தமிழ் வலைப்பதிவர்கள் விக்கிப்பீடியாவுக்கு ஆற்றக்கூடிய பங்களிப்புகளை விளக்கி சென்னையில் சூன் 13, 2009 அன்று ஒரு கூட்டம் நடைபெறுகிறது.

நாள்: சூன் 13, 2009 சனிக்கிழமை மாலை 6 மணி.
இடம்: கிழக்குப் பதிப்பகம் மொட்டை மாடி
முகவரி: New Horizon media, எண்.33/15, எல்டாம்ஸ் ரோடு, ஆழ்வார்ப்பேட்டை, சென்னை - 600 018

விவரங்களுக்கு விக்கிப்பீடியாவுக்கு வலைப்பதிவர்கள் ஆற்றக்கூடிய பங்களிப்புகள் பார்க்கவும்.

அனைத்து தமிழ் வலைப்பதிவர்கள், தமிழ் விக்கிப்பீடியர்களை வரவேற்கிறோம்.

நிகழ்வு குறித்து அறிவிக்க உதவிய தமிழ்மணம், திரட்டி, சங்கமம் நிருவாகத்தினருக்கு எங்கள் நன்றியைத் தெரிவித்துக் கொள்கிறோம்.

சென்னை தமிழ் விக்கிப்பீடியா பட்டறை - சூன் 14, 2009

2009-06-02T22:16:00.000-07:00

சென்னை தமிழ் விக்கிப்பீடியா பட்டறை - சூன் 14, 2009

பங்களிக்க இருக்கும் தடைகள்

2009-02-23T09:49:00.000-08:00

தமிழ் விக்கிப்பீடியாவில் பங்களிப்பதற்கு இணைய வசதி, தமிழ் எழுத்துரு, தமிழ் தட்டச்சு, விக்கி நுட்பம், எழுத்துத் திறன், தமிழ் விக்கி நடை, கலைச்சொற்கள், விக்கி கொள்கைகள் ஆகியவை தடையாக அறியப்படுகின்றன.

இணைப்பு வசதி பற்றி நாம் செய்யக்கூடியது ஏதும் இல்லை. இணைய மையங்களில் தமிழை படிக்க எழுத வசதி செய்வது பற்றியும் நாம் பெரிதாக எதுவும் செய்ய முடியாது. இவை தொடர்பாக உத்தமம் போன்ற அமைப்புகளே உரிய நடவடிக்கைகள் எடுக்க வேண்டும். தமிழ் தட்டச்சு, விக்கி நுட்பம் பற்றி எமது பயிற்சிப் பட்டறைகளில் நாம் விரிவாக பயிற்சி வழங்குகிறோம். இணையம் ஊடாக எம்மை தொடர்பு கொண்டால், நாம் இயன்றவரை உதவுவோம்.

தமிழில் எழுத்து திறன் என்பது தொடர் பயிற்சியின் மூலம் மேம்படுத்தவல்ல ஒரு திறன். தமிழ் விக்கிப்பீடியா அதற்கு ஒரு நல்ல களம். நீங்கள் எழுதிய கட்டுரையை பிறம் மேம்படுத்தும் போது, மாற்றங்களை அவதானித்து கற்றுக்கொள்ளலாம்.

தமிழ் விக்கி நடை இதழிய எழுத்து நடையே. படர்க்கையில், நல்ல தமிழில் எழுத வேண்டும். வரையறை முதல் வசனத்தில் அல்லது பந்தியில் தருவது மட்டுமே சற்று மாறுபட்ட வேண்டுகோள். வரையறைத் தருவதால், எழுதுபவர் தாம் என்ன சொல்ல வருகிறோம் எனபது பற்றி துல்லியமாக சிந்திக்க தூண்டப்படுகிறார். அதை விட ஒன்றைப் பற்றிய வரையறை கலைக்களஞ்சிய கட்டுரை வாசகரின் ஒர் அடிப்படை எதிர்பாப்பு ஆகும்.

தமிழ் கலைச்சொற்கள் தெரியவில்லை என்பது ஒரு தடையாக முன்வைக்கப்படுகிறது. சில ஆண்டுகளுக்கு முன்பு இது நியாமான குற்றச்சாட்டாக இருந்தது. ஆனால் இன்று 103 000 கலைச்சொற்கள் விக்சனரியில் உள்ளன. மேலும் கலைச்சொற் பரிந்துரைகளை அனுபவம் பெற்ற பயனர்களிடம் கேட்டுப் பெற்றுக் கொள்ளலாம். அப்படியும் தெரியவிட்டால் ஆங்கில கலைச்சொற்களைப் கட்டுரையில் பயன்படுத்தலாம். பின்னர் சரியான கலைச்சொற்களை கட்டுரையாளரோ, பிற பயனர்களோ இணைக்கலாம்.

விக்கி கொள்கைகள் சற்று இறுக்கமாக இருக்கின்றது என்பது சிலரின் கருத்து. எமது கொள்கைகள் அனேகமானவை ஆங்கில விக்கியில் இருந்து பெறப்பட்டவையே. இவற்றில் முக்கியமானவை: நடுநிலைமை (Neutral Point of View), மெய்யறிதன்மை (Variability), இணக்க முடிவு, காப்புரிமையை மீறாதிருத்தல் ஆகியவையாம். இவை தவிர இயன்றவரை எளிய தமிழில் எழுதுதல் ஒரு கொள்கை ஆகும். இவை தமிழ் விக்கிப்பீடியாவின் தொலைநோக்குக்கு இணங்க முன்வைக்கப்பட்ட கொள்கைகள். இக்கொள்கைகளில் மாற்றம் தேவை என்றால் உங்கள் பரிந்துரைகளைக் கேக்க நாம் எப்போதும் தயாராக உள்ளோம்.

இத்தடைகளை மீறி பல பத்துப் பயனர்கள் பங்களிக்கின்றனர். உங்களையும் பங்களிக்க அழைக்கிறோம்.

17 000 கட்டுரைகளைத் தாண்டி

2009-02-23T09:46:00.000-08:00

தற்போது தமிழ் விக்கிப்பீடியா 17 000 கட்டுரைகள் மைல்கல்லை எட்டியுள்ளது. கடந்த நவம்பர் நடுப்பகுதியில் 16 000 கட்டுரைகளை எட்டியது. ஏறத்தாழ 3 மாதங்களில் பெரிதும் சிறுதுமான 1000 கட்டுரைகள் எழுதப்பட்டுள்ளன. சராசரியாக மாதம் 333 கட்டுரைகள் எழுதப்படுகின்றன. நாள் ஒன்றுக்கு 12-14 கட்டுரைகள் எழுதப்படுகின்றன. எமது தொடக்க ஆண்டுகளில் இருந்து இது குறிப்பிடத்தக்க முன்னேற்றம். எனினும் நாம் இன்னும் நெடுந் தூரம் செல்ல வேண்டும். இந்த ஆண்டு இறுதிக்குள் கட்டுரை ஆக்கத்தை 20 ஆக உயர்த்துவது எமது நோக்கு.

இந்த ஆண்டு நாம் தமிழ் விக்கிப்பீடியாவை பரந்த சமூகத்துக்கு அறிமுகப்படுத்த பயிற்சிப் பட்டறைகளை முன்னெடுக்கிறோம். சனவரி 18 இல் சென்னையிலும், சனவரி 31 பெங்களூரிலும் இப் பட்டறைகளை நடந்தன. பட்டறைகளை தொடர்ந்து நடத்த திட்டமிள்ளோம். இதன் மூலம் மேலும் பல பயனர்களை தமிழ் விக்கிப்பீடியா பெறும் என்று எதிர்பாக்கிறோம்.

இணையத்தில் இந்திய மொழிகள்

2009-02-06T07:43:00.000-08:00

உலகில் ஆறில் ஒரு மனிதர் இந்தியாவில் வாழ்கின்றார். இந்தியா ஒரு பல்லின பல்மொழி நாடு. 22 மொழிகள் அங்கிகரிக்கப்பட்ட மொழிகளாகவும், இந்தி தேசிய மொழியாகவும் உள்ளது. ஆங்கிலம் இணைப்பு மொழியாக செயற்படுகிறது.

மரபு வழி ஊடகங்களில் இந்திய மொழிகள் முக்கிய பங்கு வகிக்கின்றன. பத்திரிகைகள், இதழ்கள், தொலைக்காட்சி, திரைப்படம் ஆகியவை பெரும்பான்மையாக இந்திய மொழிகளிலேயே உள்ளன. இது இன்றும் இந்திய மொழிகள் பெரும்பான்மை இந்திய மக்களின் அன்றாட தேவைகளுக்கு அவசியம் என்பதை உணர்த்துகிறது. ஆனால் இணையத்தில் இந்த நிலை தலைமாறாக உள்ளது. இணையத்தில் இந்திய மொழிகள் தேக்க நிலையிலேயே உள்ளன.

சுமார் 162 000 000 வலைத்தளங்கள் தற்போது உள்ளன. இவற்றுள் ஆக 1250 மட்டுமே மொத்தமாக இந்திய மொழிகளில் உள்ளன என்று Internet and Mobile Association of India வெளியிட்ட அறிக்கை கூறுகிறது. 1 000 000 000 மக்களைக் கொண்ட இந்தியாவில் 60 000 000 இணையப் பயனர்கள் இருக்கிறார்கள். ஒப்பீட்டளவில் இது ஒரு தேங்கிய நிலைப்பாடே. மிகவும் மெதுவான வளர்ச்சிக்கு இணையம் இன்னும் பிற மொழியில் பெரிதும் இருப்பதும் ஒரு முக்கிய காரணமாகும்.

இணையத்தில் உள்ள இந்திய மொழி உள்ளடக்கத்தில் 19 % வீதம் தமிழில் உள்ளது. இந்திய மொழிகளுக்கிடையே ஒப்பீட்டளவில் இது சிறந்த நிலைதான். ஆனால் முன்னேற நிறைய இடம் உள்ளது. இது பற்றி மேலும் அடுத்த பதிவில் கூறப்படும்.