பயிற்றுநரைப் பயிற்றுவிப்போம் 2019

மே 31 முதல் ஜூன் 2 2019 வரை நிகழ்ந்த பயிற்றுநர் பயிற்றுவிப்போம் நிகழ்ச்சி விசாகப்பட்டினத்தில் திட்டமிட்டபடி நிகழ்ந்தது. அதில் தமிழ் விக்கிப்பீடியா சார்பாக அபிராமி நாராயணன் மற்றும் நீச்சல்காரன் கலந்து கொண்டனர். அதில் விவாதிக்கப்பட்ட மற்றும் முக்கியத் தகவல்கள் இப்பதிவில் பகிரப்படுகின்றன.

எந்தத் தலைப்பாக இருந்தாலும் குறிப்பிடத்தக்கமை உள்ளதை உறுதி செய்து கொள்ளவேண்டும். ஒரு தலைப்பின் குறிப்பிடத்தக்கமை ஒவ்வொரு சமூகத்திற்குச் சமூகம் மாறுவதால் அவற்றை அச்சமூகம் விவாதித்து முடிவிற்கு வரலாம். அதுவரை ஆங்கில வழிகாட்டலைப் பின்பற்றலாம்

விக்கி நிகழ்வுகள் இருவகையாகப் பிரிக்கலாம். ஆன்லைன் விக்கி நிகழ்வு என்பது இணையம்வழியாக மட்டும் கலந்து கொண்டு நடத்தப்படும் வேங்கைத் திட்டம், தொடர்தொகுப்பு போன்றவை. ஆப்லைன் விக்கி நிகழ்வு என்பது நேரடியாக சந்தித்து நடத்தப்படும் கூடல், பயிற்சிப்பட்டறை போன்றவையாகும். இவ்வாறு எந்த விக்கி நிகழ்வை நடத்தினாலும் அதன் வெற்றி கட்டுரை எண்ணிக்கையில் இல்லை, அதன் பின்னர் புதியவர்களால் உருவாகும் சமூக வளர்ச்சியே முக்கியம்.

எந்தக் கட்டுரைகளை எழுதலாம், பிரச்சாரமாக இல்லாமல் எப்படி எழுதுவது, நடுநிலைமையுடன் எழுதுதல், நம்பத்தகுந்த மேற்கோள்கள் எவை போன்று விவாதிக்கப்பட்டன. விக்கிப்பீடியா என்பது உண்மைகளையும் எண்ணிக்கைகளையும் மட்டுமே சொல்ல வேண்டும் அதற்கேற்ற கருத்துக்களைக்(interpretation) கொடுக்கக்கூடாது.

ஒரு பயிற்சிக்குச் செல்லும் முன்னர் பயிற்றுநர் என்பவர் விக்கியின் இடைமுகத்தைப் பற்றி நன்கு தெரிந்திருந்தால் மட்டும் போதாது அதன் கொள்கைகளையும் நன்கு தெரிந்திருக்க வேண்டும். பலரது அனுபவங்களை [https://meta.wikimedia.org/wiki/Learning_patterns இங்கே] காணலாம்.

கீழ்க்கண்ட கருவிகள் மூலம் தேவைப்படும் கட்டுரைகளை உருவாக்கலாம்
http://recommend.wmflabs.org/
https://trends.google.com/trends/
https://stats.wikimedia.org/v2/#/all-projects

GLAM திட்டத்தின் மூலம் ஆவணங்களை மின்னிலக்கமாகவோ, பகிர்ந்துகொள்ளவோ உதவி கோரலாம்
CIS-A2K அமைப்பின் மூலம் இந்திய அளவில் நிகழும் விக்கி நிகழ்வுகளுக்கு ஆதரவைக் கோரலாம்

தொடர்பாடல்:
விக்கியின் நிகழ்வுகளைத் தொடர்ந்து கவனிக்க ஆலமரத்தடியைக் கவனிப்பதன் மூலமோ [https://lists.wikimedia.org/mailman/listinfo மின்னஞ்சல்] சந்தாதாரராகப் பதிவுசெய்வதன் மூலமோ தொடர்ந்து விக்கி தொடர்பான செய்திகளை அறிந்து கொள்ளலாம்.
இரண்டாம்பட்சமாக விக்கியின் சமூகத்தளக் குழுக்களில் இணைந்தும் கவனிக்கலாம்

பயனுள்ள கருவிகள்
http://wikipedia.ramselehof.de/wikiblame.php
https://xtools.wmflabs.org/about
https://petscan.wmflabs.org/

பயனுள்ள சிறப்புப்பக்கங்கள்
https://meta.wikimedia.org/wiki/Special:UrlShortener
https://en.wikipedia.org/wiki/Special:CreateAccount
https://ta.wikipedia.org/wiki/Special:SpecialPages


மேலும் அறிய
https://meta.wikimedia.org/wiki/CIS-A2K/Events/Train_the_Trainer_Program/2019
https://etherpad.wikimedia.org/p/ttt2019
https://commons.wikimedia.org/wiki/Category:TTT_2019

மருந்துகள் பற்றிய தகவல்கள் ஏன் இந்திய மொழிகளில் இல்லை

ஒரு மருந்து விற்பனைக்கு வர முன், அந்த மருந்தை உற்பத்தி செய்யும் நிறுவனம் பெருந்தொகையான ஆவணப்படுத்தல் பணிகளைச் செய்ய வேண்டும்.  மருந்து தொடர்பான ஆய்வுகள், மருந்து கட்டுப்பாட்டு நிறுவனங்களுக்கு (Drug Regulatory Organizations, எ.கா US FDA, Health Canada) அனுப்ப வேண்டிய சமர்ப்பித்தல்கள் (Submissions), மருத்துவர்களுக்கு, நுகர்வோருக்கு வழங்கப்பட வேண்டிய ஆவணங்கள், மருந்துப் பொதி தாங்கி இருக்க வேண்டிய அடையாளங்கள் (Labels) எனப் பெருந்தொகை ஆவணங்களை சீர்தரங்களுக்கு ஏற்ப (எ.கா Standard Product Labeling - SPL) அந்த நிறுவனம் உருவாக்கிப் பராமரிக்க வேண்டும்.  இந்த ஆவணங்கள் அனைத்து மனிதர்களுக்கும் அவசியமான பெரும் அறிவுச் சொத்து ஆகும். 

வட அமெரிக்கா, ஐரோப்பா, சீனா, யப்பான், அரபு நாடுகள் ஆகியவற்றில் ஒரு மருந்து விற்க அனுமதி பெற வேண்டும் என்றால் அந்த அந்த நாட்டுச் சட்ட சீர்தர முறைமைகளுக்கு ஏற்ப பெருந்தொகை ஆவணங்களை ஒரு நிறுவனம் சமர்ப்பிக்க வேண்டும்.  எ.கா ஐரோப்பிய ஒன்றியத்தில் மருந்து பற்றிய ஆய்வுகளும், அடையாளங்களும் 27 மொழிகளில் சமர்பிக்கப்பட வேண்டும்.  ஒரு மருந்து பற்றிய விபரங்கள் அந்த நாட்டு மொழியில், அதனைப் பயன்படுத்தும் மக்களின் மொழியில் இருக்க வேண்டும் என அந்த அந்த நாடுகள் எதிர்பார்ப்பதில் வியப்பேதும் இல்லை.  ஒருவர் ஒரு மருந்தை எப்படிப் பயன்படுத்த வேண்டும், அந்த மருந்தால் விளையக் கூடிய பக்க விளைவுகள் போன்றவற்றைப் பற்றிய தகவல்கள் அவரது தாய்மொழியில் அமைவது அவரது நலத்துக்கு உடனடி பாதிப்பை ஏற்படுத்தக் கூடிய முக்கியமான தகவல்கள் ஆகும். 

இந்தத் தேவையை பூர்த்தி செய்யும் வகையில், மொழிபெயர்ப்பு வசதிகளைச் சிறப்புக் கவனம் எடுத்து ஆவண உருவாக்க மென்பொருட்கள் (Authoring Tools), ஆவண மேலாண்மை மென்பொருட்கள் (Document Management Systems), செயலாக்க மேலாண்மைத் தொகுதிகள் (Workflow Management Systems) பல உள்ளன.  இவற்றில் தொகுக்கப்படும் தகவல்கள் பொதுமக்கள், துறைசாரார் அணுகக் கூடிய முறையில் பொருளுணரப்பட்டு (semantically extracted) வலைவாசல்களாக அமைக்கப்பட்டு வழங்கப்படுகின்றன.

இவ்வாறு பல நாடுகள் அந்த அந்த நாட்டு மொழிகளில் மருந்து பற்றிய ஆய்வுகளையும் தகவல்களையும் வழங்க இந்தியா அப்படிச் செய்வதில்லை.  இந்தியச் சட்டத்தின் (Drug and Cosmetics Act) படி ஒரு மருந்து அனுமதி தொடர்பான பொறுப்பு நடுவன் அரசைச் சார்ந்தது, உற்பத்தி விற்பனை தொடர்பான பொறுப்பு மாநில அரசுகளைச் சார்ந்தது.  இரு நிலைகளிலும் இந்திய மொழிகளில் தகவல்கள் பகிரப்பட வேண்டும் என்ற எந்த விதிகளோ(Regulations), பரிந்துரைகள் கூட இல்லை.  குறைந்த பட்சம் இந்த இரு நிலைகளின் வலைத்தளங்கள் கூட (http://cdsco.nic.in, http://www.tnhealth.org/) கூட பன்மொழியில் இல்லை. 

ஒரு நிறுவனம் ஐரோப்பாவில், சீனாவில், யப்பானில், அரபு நாடுகளில், இசுரேலில் அந்த அந்த நாட்டு மொழியில் தனது தகவல்களைச் சமர்ப்பிக்கத் தயாராக இருந்தால், அதே நிறுவனம் இந்தியாவில் அப்படி ஏன் செய்ய முன்வராது.  இது ஒரு நுட்ப அல்லது நிதிச் சிக்கல் இல்லை.  இந்திய அரசின் விதிமுறைகள் சார்ந்த ஒரு சிக்கலே. 

மருத்துவம் (Medicine), நலம் (Health), மருந்துகள் (Drugs) தொடர்பான தகவல்கள் மக்களின் மொழியில் இருத்தல் அவசியமானதாகும்.  விக்கியில் இவற்றின் தகவல்களைத் தொகுப்பதில் அவை இந்திய மொழிகளில் இல்லாமல் இருப்பது பெரும் தடையாக அமைகிறது.  சிறிய மொழிபெயர்ப்புச் செலவுடன், ஒரு பெரும் பலனைத் தரக் கூடிய இந்த மாதிரி விதிகள் தொடர்பாக அறிவு அணுக்கம் தொடர்பான செயற்திட்டங்கள் (Centre for Internet Society's Access To Knowledge - http://meta.wikimedia.org/wiki/India_Access_To_Knowledge) கவனத்தில் கொள்ள வேண்டும்.

ஒரு பொது, திறந்த, இணையத் தமிழ் நூற்பட்டியலின் (Catalog) தேவை

தமிழ் நூல்கள் பற்றிய தகவல்கள் தனித் தனித் தீவுகளாகத் தொகுக்கப்படுகின்றன.  தமிழம், நூலகத் திட்டம், மதுரைத் திட்டம், படிப்பகம், தமிழ் விக்கியூடகங்கள், கன்னிமரா நூலகம், ரோசா முத்தையா நூலாகம், விருபா, இணையத் தமிழ் நூற் கடைகள், பதிப்பகங்கள் போன்றவை இணையத்தில் தமிழ் நூல்கள் பற்றிய மீதரவை (metadata) அல்லது நூற்பட்டியலைத் (catalog) தருகின்றன.  இந்த அமைப்புக்கள் வெவ்வேறு ஆயினும் இவை ஒரு பொது நோக்கத்தைக் கொண்டுள்ளன.  அதாவது தமிழ் நூல்களைப் பற்றிய தகவல்களைத் தருவது.  இதை இந்த அமைப்புக்கள் தனித் தனியே செய்யாமல் இணைந்து செய்வது இன்று பல காரணங்களால் அவசியமாகிறது. 

பொதுவாக நூற்பட்டியலை வெளியிடுவது, ஆவணப்படுத்துவது அரசுகளின் ஒரு முக்கிய கடமை ஆகும். ஐக்கிய அமெரிக்கா, கனடா, பிரித்தானியா, உருசியா, செருமனி போன்ற நாடுகள் பெரும் வளங்களை ஒதுக்கி இந்தப் பணிகளைச் செய்கின்றன.  எடுத்துக்காட்டாக பல மேற்குநாடுகளில் இயங்கும் பதிப்பகர்கள் எல்லாம் காங்கிரசு நூலகத்துக்கு (Library of Congress) அல்லது தமது தேசிய ஆவணகங்களுக்கு நூல்களையும் நூல்களைப் பற்றிய தகவல்களையும் கட்டாயம் அனுப்ப வேண்டும்.  இத் தகவல்களை நூலகக் கூட்டமைப்புக்கள் தொகுத்துப் பகிர்கின்றன.  குறிப்பாக Online Computer Library Center, Inc (OCLC) கூட்டமைப்பே உலகின் அதிக உசாத்துணைகளை (Bibliography) கொண்ட இலாப நோக்கமற்ற கூட்டமைப்பு ஆகும். 

ஆனால் தமிழ்ச் சூழலில் அரசுகள் இந்தப் பணிகளை முறையாகச் செய்யவில்லை. இந்திய அளவில் ஆவணகவியலும் நூலகவியலும் மிகவும் புறக்கணிக்கப்பட்ட திணைக்களங்கள் ஆகும்.  தமிழ்நாடு அரசும் இத் துறையைக் கவனிக்க வில்லை.  எடுத்துக்காட்டாக பல ஆண்டுகளாக தமிழ் நூற்பட்டியல்கள் வெளியிடப்படவில்லை.  இலங்கையில் பல கால கட்டங்களீல் அரசுகள் திட்டமிட்ட முறையில் தமிழ் தகவல் வளங்களை அழித்து வந்துள்ளது.  ஈழத்தில் உருவாக்கப்பட்ட பெளதீக ஆவணகங்களும் போரில் அழிந்துவிட்டன.  செல்வராஜாவின் நூல் தோட்டம் போன்ற சில தனிப்பட்ட முயற்சிகள் விதிவிலக்காக தமிழ் நூற்பட்டியல் (catalog) இன்னும் தொகுக்கப்படவில்லை.  இந்தச் சூழலில்தான் ஒரு பொது, திறந்த, இணைய தமிழ் நூற்பட்டியலின் தேவையை தன்னார்வ அமைப்புக்களும், அரசு சாரா அமைப்புக்களும் சேர்ந்து உருவாக்க வேண்டிய தேவை எழுந்துள்ளது.  இணையக் கட்டமைப்புக்கள் இதற்கான ஒரு பெரும் வாய்ப்பை உருவாக்கித் தந்துள்ளன. 


நாம் தனித்தனியே தமிழ் நூற் தகவல்களைத் தொகுப்பதால் வளங்கள் வீணாகும்.  தகவல் முழுமை பெறாது. அவரவர் பயனர்கள் விரிவான சேவையைப் பெற முடியாது.  ஆனால் நாம் இணைந்து ஒரு பொது, திறந்த, இணைய தமிழ் நூற்பட்டியலைத் தொகுத்துப் பகிர்ந்தால் அனைவரும் பயன்பெறலாம்.  எமது தேவைகள் வேறுபட்டால், நாம் அனைவரும் ஒரு பொது அடிப்படையிலாவது (டுப்பிளின் கருவகம் - Dublin Core) சேர்ந்து இயங்கி, பின்னர் மேலதிக தகவல்களை எமது தேவைகளுக்கு ஏற்ப இணைக்கலாம். 
இதில் உள்ள நடைமுறைச் சிக்கல்கள் பல.  யார் தொகுப்பது,  அதற்கான கட்டமைப்பு என்ன.  என்ன சீர்தரத்தைப் பயன்படுத்துவது. எப்படிப் பகிர்வது.  மிக யாதார்த்தமான சிக்கல்களே.  ஆனால் உலக அரங்கில் பலர் திறனாக நிறைவேற்றிய தீர்வுகள் உண்டு.  நுட்பம் இதில் ஒரு சிக்கல் இல்லை.  எமக்கு இருக்கும் உண்மையான சிக்கல் பல தரப்பட்டவர்களை இணைத்து இவ்வாறான ஒரு திட்டத்தை முன்னெடுப்பதுத்தான்.  இந்தப் பணியை ரேசா முத்தையா நூலகம், நூலகத் திட்டம், உத்தமம் முன்னின்று எடுக்க வேண்டும்.  தமிழ் விக்கிச் சமூகமும் இதில் ஒரு முக்கிய பங்கேற்கும்.



 

தமிழ் விக்கி ஊடகப் போட்டி முடிவுகள்

இணையத்தில் தமிழ்/தமிழர் தொடர்பான கட்டற்ற (public domain) பல்லூடக ஆவணங்களை (படங்கள், ஒலிக்கோப்புக்கள், நிகழ்படங்கள்) அதிகரிக்கும் நோக்கில் தமிழ் விக்கியூடகம் ஒரு போட்டியை நவம்பர் 15, 2011 இல் இருந்து பெப்ரவரி 29, 2012 வரை நடத்தியது. இந்தப் போட்டி மிக வெற்றிகரமாக முடிந்துள்ளது. இப் போட்டியில் 15 000 மேற்பட்ட ஆக்கங்கள் பதிவேற்றப்பட்டன. 300 மேற்பட்ட பயனர்கள் கலந்துகொண்டார்கள்.

போட்டிக்கு வந்த அனைத்து ஆக்கங்களும் முறையாக மதிப்பீடு செய்யப்பட்டு முடிவுகள் அறிவிக்கப்பட்டுள்ளன. போட்டி மிகக் கடுமையாக இருந்தது. இயன்ற வரை தகுதி வாய்ந்த சிறந்த ஆக்கங்களுக்கு பரிசளிக்க வேண்டுமென்ற நோக்கத்தில் பரிசுகளின் எண்ணிக்கையை கூட்டியுள்ளோம். இறுதிச் சுற்றுக்குத் தகுதி பெற்ற, ஆனால் பரிசு வெல்லாத ஆக்கங்கள் மதிப்பெண் அடிப்படையில் பரிசு வென்ற ஆக்கங்களுக்கு மிக மிக நெருக்கமாக அமைந்திருந்தன.

வெற்றி பெற்றவர்களுக்கு பரிசுத் தொகை மற்றும் சான்றிதழை அனுப்பி வைக்கப் பின்வரும் விவரங்களை tamil.wikipedia@gmail.com என்ற முகவரிக்கு மின்னஞ்சல் செய்யுங்கள்: 1) சான்றிதழில் இடம் பெற வேண்டிய பெயர் (தமிழில்) 2) முழு அஞ்சல் முகவரி 3) வசிக்கும் நாடு

முதல் பரிசுகள் (தலா 100 $)
* எஸ்ஸார்
* அரவிந்த் ரங்கராஜன்

இரண்டாம் பரிசுகள் (தலா 50 $)
* அறிவழகன்
* ஜாசன்
* ஜோ மனோஜ்

மூன்றாம் பரிசுகள் (தலா 25 $)
* Prinzy555
* Shamli071
* Amshudhagar

தொடர் பங்களிப்பாளர் பரிசுகள் (தலா 75$)
* அன்டன்
* அருணன் கபிலன்
* பார்வதிஸ்ரீ
* தமிழ்ப்பரிதி மாரி

தமிழர் தொழிற்கலைகள் (தலா 75$)
* Jayaseerlourdhuraj
* Balu 606902

பங்களிப்புச் செய்த அனைத்து பயனர்களுக்கும் வெற்றி பெற்ற அனைத்து பயனர்களுக்கும் வாழ்த்துக்கள்.

பிரித்தானியப் பாரம்பரியத் தொழிற்கலைகள்

பாரம்பரியத் தொழிகலை இழப்பு என்பது தமிழர்களுக்கு மட்டும் உரிய ஒரு சிக்கல் அல்ல. பிரித்தானியாவிலும் கூட இது ஒரு சிக்கல் என்று அடையாளம் காணப்பட்டுள்ளது.

பிரித்தானியாவின் தொழிற் புரட்சிக்கு அங்கு விருத்தி பெற்ற பாரம்பரியத் தொழிற்கலைகள் ஒரு முக்கிய மூலவேராக இருந்தன. இந்த தொழிற்கலைகளைப் பாதுகாக்கும் வண்ணம் பாரம்பரியத் கைத்தொழில்கள் அமைப்பு (http://www.heritagecrafts.org.uk) மற்றும் பிற நூற்றுக்கணக்கான அமைப்புக்களும் (http://www.heritagecrafts.org.uk/index.php/about/friends-and-affiliated-groups, http://www.worldskillslondon2011.com/) தனிநபர்களும் (http://traditionalcraftsblog.blogspot.com, http://greenwood-carving.blogspot.com, http://nicolawood-design.blogspot.com/p/projects.html) பல்வேறு செயற்திட்டங்களில் ஈடுபட்டு வருகிறார்கள். இதன் முக்கியத்துவத்தை உணர்ந்த பிரித்தானிய அமைச்சர் யோன் கெயின்சு இந்தப் பாரம்பரிக் கலைகளை ஆய்வு (http://www.ccskills.org.uk/LinkClick.aspx?fileticket=6cMoZSIdVOA=&tabid=81) செய்வதற்காக ஒரு பெரும் தொகை பணத்தை ஒதுக்கி உள்ளார். இந்தப் பாரம்பரியக் கலைகளை ஊக்குவிப்பதன் மூலம் நவீன பொருளாரத்தின் ஒரு முக்கிய கூறாகவும் இவற்றைப் பயன்படுத்தலாம் என்பதை அவரின் செயற்பாடுகள் உணர்த்துகின்றன.

வில்வித்தை, எழுத்துக்கலை போன்றவை நவீன பொருளாதாரத்துக்கு பயன்படாமல் கூடப் போகலாம். ஆனால் அவற்றில் ஒரு இயல்பான நிறைவு கிடைக்கிறது. இசைக் கருவியைப் வாசிப்பது போன்று இந்தக் கலைகளைப் பயில்வதிலும் செய்வதிலும் மகிழ்ச்சி கிடைக்கிறது. இதற்காகவாவது இக் கலைகளைப் பாதுகாப்பது முக்கியம் ஆகிறது.

தமிழ்ச் சூழலைப் பொருத்த வரையில் அரசுகள் இந்த மாதிரி தொலைநோக்கான செயற்பாடுகளில் ஈடுபடும் என்று எதிர்பார்க்க முடியாது. எமது தேவைகளை உணரக் கூடிய, தொலைநோக்கான அரசுகளை அமைக்க நாம் தவறிவிட்டோம். எனவே இந்த மாதிரி முன்னெடுப்புக்களை தனிநபர்களும், தன்னார்வலர் அமைப்புக்களுமே முன்னெடுக்க வேண்டிய அவசியம் உள்ளது.

எழுதப்படாத அறிவு

கருவியில், ஓவியத்தில், சிலையில், கட்டிடத்தில், கைவேலைப்பொருளில், நிகழ்த்தலில், செயலாக்கங்களில், நுணுக்கங்களில் நிறைந்துகிடைக்கிறது எமது அறிவு. ஓர் எண்ணத்தை வெளிப்படுத்த, அடுத்த தலைமுறைக்கு எடுத்துச் செல்ல எழுத்து என்பது ஒரு வழிமுறை மட்டுமே. இன்னும் பல வழிமுறைகள் உள்ளன.

உளவியலின் பல் அறிவுகள் கோட்பாட்டின் படி எழுத்தறிவை அல்லது மொழியறிவை விட வேறு பல அறிவுகள் உள்ளன. உடல்சார் அறிவு, இசை அறிவு, அக அறிவு, காட்சி அல்லது இடம்சார் அறிவு (spatial intelligence), மனிதத் தொடர்பாடல் அறிவு, இயற்கை அறிவு இருத்தலியல் அறிவு என்று பல்வேறு அறிவுகள் மனிதருக்கு உள்ளன. வெவ்வேறு நபர்கள் வெவ்வேறு அறிவுகளில் கூடிய ஆற்றல்களையும் பிறவற்றில் குறைந்த ஆற்றல்களையும் பெற்று இருப்பர். இந்த அறிவுகள் எல்லாவற்றையும் நாம் எழுத்து மூலம் முழுமையாக வெளிப்படுத்த முடியாது.

ஆடல்காரருக்கு, நடிகருக்கு, அறுவைச் சிகிச்சை நிபுணருக்கு, விளையாட்டு வீரருக்கு உடல் அறிவு முக்கியம் பெறுகிறது. நாம் எவ்வளவுதான் ஓர் ஆடலை எழுத்தில் விபரித்தாலும் அந்த ஆடலை காண்பதற்கு இணையாகாது.

ஓவியருக்கு, வடிவமைப்பாளருக்கு, கட்டிடக்கலைஞருக்கு இடம்சார் அல்லது காட்சியறிவு முக்கியம் பெறுகிறது. ஆயிரம் சொற்களுக்கு ஒரு படம் இணையானது என்பது ஒரு பழமொழி. வட்டத்தை வரையறை செய்து விளக்குவதிலும் பார்க்க படத்தைக் கீறி, இது வட்டம் என்று கூறுவது மிக எளிதானது. ஒருவரின் சிந்தனைத் திறனை விரித்து புது இயல்புகளை கற்பனை செய்ய அல்லது வடிவமைக்க இந்த அறிவு பயன்படுகிறது. இவ்வாறே பல்வேறு அறிவுகள் பல்வேறு வழிகளில் முக்கியம் பெறுகின்றன.

தமிழிலே நுட்பங்கள் பற்றி விரிவான தகவல்கள் எதுவும் எழுதப்படவில்லையெனினும் நாம் அவர்கள் விட்டுச் சென்ற தொல்பொருட்களில் இருந்தும், இன்றும் எம்மிடம் தலைமுறை தலைமுறையாக வழங்கும் கலைகளில் இருந்தும் அவற்றைப் பற்றி ஓரளவு அறிந்துகொள்ள முடிகிறது. இந்தக் கலைகள் அழியவிடுவது என்பது எமது பல் அறிவுகளை அழியவிடுவது என்பதாகும். இதில் இருந்து நாம் மீளலாம், எமது அறிவுகளை மீட்டெக்கலாம், மீளுருவாக்கலாம், பேணலாம், புத்தாக்கம் செய்யலாம்.

எழுத்தைத் தாண்டி படங்களாக, ஒலிக் கோப்புக்களாக, நிகழ்படங்களாக, பல்லூடகப் பதிவுகளாக, பொருட்களாக, நிகழ்கலைகளாக நாம் இவற்றை ஆவணப்படுத்தல் காலத்தின் தேவை ஆகும். அதன் ஒரு சிறு முயற்சியான தமிழ் விக்கி ஊடகப் போட்டியில் உங்கள் பங்களிப்பை நல்கிடுவீர்.

எமது தொழிற்கலைகளை பேணுதல், ஆவணப்படுத்தல், புத்தாக்கல்

எமது வாழ்வாதாரமாக விளங்கும் எமது தொழிற்கலைகளை நாம் தகுந்த மதிப்புத் தந்துப் பேணவில்லை, அவற்றில் புத்தாக்கம் செய்யவில்லை. மாற்றாக தொழில்களில் ஏற்றம் இறக்கம் காட்டி திறமைகளை சிறுமைப்படுத்தினோம். தொகை தொகையாக இலக்கியம் படைத்த தமிழ்ச் சமூகம், ஒரு சில தொழிற்கலை ஆவணங்களைத் தானும் உருவாக்க வில்லை. இப்போ, அந்தக் கலைகள் எல்லாம் காலவதியாகி விட்டன. அவற்றால் ஒரு பயனும் இல்லை. எனவே அவை அழிவதே இயல்பு என்ற மனநிலைக்கு தள்ளப்பட்டு விட்டோம்.

அந்தக் கலைகள் எல்லாம் காலவதியாகி விட்டன என்பது ஒரு பெரும் பொய். இன்றும் இன்னும் பல மில்லியன் தமிழர்கள் கலப்பையால் உழுத அல்லது கையால் நாத்து நடப்பட்ட அரிசியையே உண்ணுகிறார்கள். இன்றும் இன்னும் பல்லாயிரக்கணக்காண தமிழர்கள் கரைவலையால் இழுக்கப்பட்ட மீன்களையே உண்ணுகிறார்கள். இன்றும் இன்னும் உள்ளூரில் மரவேலைக்கலை உயிர்ப்புடன் இருக்கிறது. உலோகக் கலை, நெசவுக்கலை, கட்டிடக்கலை, பல்வேறு கைத்தொழில்கள் என்று பல தொழிற்கலைகள் இன்றும் இன்னும் எமக்கு வாழ்வாதரமாக இருக்கின்றன. இவை வாழ்வாதரம் மட்டும் அல்ல எமது அடையாளமும் கூட. ஆனால் நாம் இவற்றைப் பேணுவது பற்றியோ, ஆவணப்படுத்துவது பற்றியோ சற்றும் அக்கறை அற்றவர்களாகவே இருக்கிறோம்.

நாம் ஏன் இவற்றை மதிப்பதில்லை. யேர்மனியர்களைப் போல், யப்பானிர்களைப் போல் நாம் ஏன் தொழிற்கலைகளை, தொழிற் கலைஞர்களை மதிப்பதில்லை. சாதியம் எம்மீது நடத்திய அட்டூளியத்தின் பாதிப்பா. அல்லது உலகமயமாதலால் நாம் எல்லோரும் முதலாளிகள் ஆகிவிடலாம் என்ற மாயையாலா. அலுவலக வேலை உயர்ந்தது, கைத்திறன் வேலை தாழ்தந்து என்ற எமது போலிச் சமூகச் சட்டகமா. இந்த மனநிலையின் அபத்தத்தை புகலிட நாடுகளில் இன்னும் விகாரமாகப் பார்க்கலாம். அங்கு சராசரி அலுவலக ஊழியரை விட சாராசரி தொற்கலைஞர், ஒர் இயந்திரவியலாளர், ஒரு கட்டுமானக் கலைஞர், ஒரு மரவேலைக்காரர் அதிக ஊழியம் பெறுகிறார். ஆனால் எமது சமூகத்தில் இந்தத் தொழிகளுக்கு மதிப்பு இல்லை.

இந்தியாவிலும், இலங்கையிலும் தமிழர் நிலப்பரப்புக்களில் பெரும்பகுதி கடற்கரையை அண்டியவை. அதனால் இயல்பாக மீன்பிடிப்பு மற்றும் கடற்தொழில்களில் தமிழர்கள் அதிகம் ஈடுபட்டுவந்துள்ளார்கள். கடல் பற்றிய அறிவு, அதில் உள்ள உயிரினங்கள் பற்றிய அறிவு, அவற்றைப் பிடிப்பதற்கான பல்வேறு பொறிகள், வலைகள், தூண்டில்கள், கலவைகள் போன்ற கருவிகளின் தொழில்நுட்ப அறிவு எம்மிடம் உண்டு. கட்டுமரத்தில் இருந்து பல்லாயிர படைவீரர்களை பல மைல்கள் ஏற்றி இறக்கிய பெரும் கப்பல்கள் கட்டிய கப்பற்கலை என்று எமது அறிவு பரந்து இருந்தது. அண்மை வரை கப்பல் கட்டுவதில் நாம் பல புத்தாக்கங்களை செய்திருந்தோம். ஆனால் இவற்றை நாம் இன்னும் விரிவாக ஆவணப்படுத்தவில்லை, பேணவில்லை.

பல போதாமைகள் இருந்தாலும் ஒரு சில முயற்சிகளை இங்கு அடையாளப்படுத்துவது நன்று. தமிழ்நாட்டிலேயே பல்கலைக்கழகளுக்கான சிறந்த வலைத்தளங்களில் தமிழ்நாடு வேளாண் பல்கலைக்கழகத்தின் வேளாண் இணையத் தளமும் (http://agritech.tnau.ac.in/ta/) ஒன்று. இங்கு வேளாண்மை, மீன்பிடிப்பு, கால்நடை, வனவியல் போன்ற பல துறைகளில் விரிவான கட்டுரைகளும் தகவல்களும் தமிழில் கிடைக்கிறன. கடந்த ஆண்டு தமிழ் விக்கிப்பீடியாவில் கட்டுரைப் போட்டி நடத்திய போது பல மாணவர்கள் பிரதி செய்து அனுப்பி இருந்த கட்டுரைகளில் பெரும்பாலானவை இந்த வலைத்தளத்தில் இருந்துதான் வந்திருந்தன. (வேளாண் தளம் பற்றி ஒரு தனிக் கட்டுரை எழுதவேண்டும்.) இதே போல ஒரு பொறியல் பல்கலைக்கழகம், ஒரு மருத்துவப் பல்கலைக்கழகம் செய்தால் அதனால் கிடைக்கும் பலன்களை எண்ணிப் பாருங்கள். தற்போது தமிழ் விக்கிப்பீடியாவிலும் நாம் இயன்றவரை இவ்வாறான தகவல்களைத் தொகுக்த்து வருகிறோம். நூலகத் திட்டத்திலும் இந்தவகை அறிவை ஆவணப்படுத்துவதை ஒரு முக்கிய நோக்கமாக கொண்டுள்ளார்கள்.

இதில் நீங்களும் உங்கள் பங்களிப்பைச் செய்யலாம். நீங்கள் அன்றாடம் பயன்படுத்தும் ஒரு உள்ளூர் கருவியைப் பற்றி, தொழில் நுட்பத்தைப் பற்றி, தொழிலைப் பற்றி, தொறிற் கலைஞரைப் பற்றி, அது சார்ந்த பரந்த அறிவைப் பற்றி ஒரு படம், நிகழ்படம், ஒலிப் பதிவு அல்லது கட்டுரை என்று வழங்குங்கள். இவ்வாறு நாம் கூட்டாக இவற்றைப் பேணுவோம், வளர்த்தெடுப்போம்.

தமிழ் ஆய்வுக் களங்களுக்கு தமிழ் விக்கியூடகப் பயன்பாடு

தமிழ்மொழிக் கல்விமுறையில், பாடத்திட்டங்களில் வரவேற்கத்தக்க மாற்றங்கள் நிகழ்ந்து வருகின்றன. தமிழ்மொழி கற்கப்படும் மாறுபடும் சூழல்கள், தொழில்நுட்பம், மொழித் தேவைகள், கல்வியாளர்களின் தேடல்கள் எனப் பல காரணங்கள் இந்த மாற்றத்தின் உந்தல்களாக அமைந்துள்ளன. நோர்வேயில் நடைபெற்ற தமிழ் - தாய்மொழி மாநாடு, மலேசியாவில் நடைபெற்ற பன்மொழித் தமிழ் மொழியியல் மாநாடு மற்றும் கற்றல் கற்பித்தலில் புதிய சிந்தனைகள் பன்னாட்டு மாநாடு, தற்போது அமெரிக்காவில் ஒழுங்குசெய்யப்படும் புலம்பெயர்ந்தோர் தமிழ்க் கல்வி மாநாடு ஆகியவற்றின் உள்ளடக்கங்கள் இந்த புதிய மாற்றங்களை சுட்டுவதாக அமைதுள்ளன.

தமிழ்மொழிக் கல்வியில் முக்கியமாக இடம்பெற்றுவரும் ஒரு மாற்றம் தமிழ்மொழி தொடர்புடைய பல்வேறு துறைகளை தமிழ்மொழிக் கல்வியின் முக்கிய உறுப்புக்களாக இடம்பெறச் செய்வதாகும். இவற்றின் ஊடாகத் தமிழ் கற்பதும், தமிழ் ஊடாக பிற துறைகளைக் கற்பதும் நலம் மிக்க ஒரு பரிமாற்றம் ஆகும். முதற்கட்டமாக இலக்கியம், இலக்கணம் என்று இருந்த மரபு உடைக்கப்பட்டு ஊடகவியல், நாட்டுப்புறவியல், திறனாய்வு, மொழியியல், மொழிபெயர்ப்பு, வரலாற்றியல் போன்ற துறைகள் உள்ளுக்குள் வந்தன. இன்று தமிழாய்வில் இடம்பெறும் ஆய்வுகளின் பெரும்பகுதி இத் துறைகளைச் சார்ந்தனவே. அடுத்தகட்டமாக
தமிழ்க் கணிமை (தட்டச்சில் இருந்து இயற்கைமொழி செயலாக்கம் வரை), அறிவியல் தமிழ், எண்ணிம ஆவணவியல், சமூக அறிவியல் போன்ற துறைகள் தமிழ்மொழிக் கல்வியின் அங்கமாகி வருகின்றன. தமிழ்மொழிக் கல்வியின் அனைத்து களங்களுக்கும் தமிழ் விக்கியூடகங்களை நல்ல உசாத்துணைகளாக வளர்த்தெடுக்க முடியும்.

தமிழ் நூல்கள், இதழ்கள், பத்திரிகைகள், இசைத்தட்டுக்கள் பற்றிய ஒரு தரவுத்தளமாக, தமிழரின் ஆடற்கலைகள், நாடகங்கள், இசை வடிவங்கள், இசைக் கருவிகள், வாழ்வியல் கூறுகள், மெய்யியல், பண்பாடு, அறிவியல், அரசியல், வரலாறு ஆகியவற்றின் தகவல் கோப்பாக தமிழ் விக்கிப்பீடியாவை வளர்க்க முடியும். தமிழ் மக்களின் பரம்பல், அவர்கள் வெவ்வேறு நாடுகளில் வாழும் முறை, அங்கு அவர்களின் அரசியல் பொருளாதார நிலைமைகள், அவர்கள் நடத்தும் அமைப்புகள், ஊடகங்கள் பற்றிய தகவல்களை தமிழ் விக்கிப்பீடியாவில் தொகுக்க முடியும். இவற்றை விட, தமிழ் விக்கிப்பீடியா அறிவியல் தமிழின் மிகச் சிறந்த எடுத்துக்காட்டாக, அதற்குரிய களமாக செயற்படமுடியும். இலங்கை-தமிழக கலைச்சொற் வேறுபாடுகளை இணைக்கும் இடமாக, தமிழ்மொழி ஊடாக கல்வி பயிரும் மாணவர்களின் மூலமாக இதனை நாம் வளர்க்க முடியும்.

விக்கி செய்திகளில் ஒவ்வொரு நாட்டில் நடைபெற்றும் முக்கிய நிகழ்வுகள், குறிப்பாக தமிழர்களுக்கு பாதிப்புடைய செய்திகளை நாம் உடனுக்குடன் தொகுத்துப் பகிர முடியும். விக்சனரியை ஒரு தமிழ்-பன்மொழி பன்மொழி-தமிழ் மின்னகராதியாக வளர்க்க முடியும். தமிழ் இலக்கியங்களை, எழுத்து மூலங்களை விக்கி மூலத்தில் சேர்க்கலாம். எமக்குத் தேவையான நூல்களை விக்கி நூல்களில் ஆக்கலாம். இவ்வாறு விக்கியூடகத் திட்டங்கள் பலவும் பலவகைகளில் தமிழ்மொழி மாணவர்களுக்கும் ஆசியர்களுக்கும் பயன்படும்.

தமிழின் பழைய, புதிய ஆய்வுகள் களங்கள் தொடர்பான ஒரு விரிந்த தகவல் தொகுப்பை நாம் விக்கியூடகங்களில் செய்யமுடியும். தமிழுக்கு சமயங்களின் பங்களிப்பு, தமிழின் பதிப்புத்துறை வரலாறு, தமிழ் சிற்றிதழ்களின் பாதிப்பு, வாழ்கை வரலாறுகள், தமிழர் கட்டிடக்கலை, நாட்டுப்புறைக் கதைகளின் பொதுக் கூறுகள், தமிழ்க் கணிம், தமிழர் வானியல், 19 ம் நூற்றாண்டில் அறிவியல் தமிழ் எனப் பல வகைத் தலைப்புகளுக்கு இன்றே தமிழ் விக்கியூடகங்களில் நல்ல தகவல்கள் கிடைக்கின்றன. இன்றைய ஆய்வாளர்கள் அவற்றை மேலும் விரிவாக்கி, அடுத்த தலைமுறையினரை புத்தாக்கங்கள் நிகழ்த்திட உதவிடனும்.

தமிழில் திறந்த தரவுகள் ஏன், எப்படி

இணையம் மிக வேகமாக மாறி வருகிறது. இணையம் உலகளாவிய வலையாகவும், பின்னர் வலை 2.0 ஆகவும், இப்போது பொருளுணர் வலையாக (semantic web) உருவாகி வருகிறது. பிற ஊடகங்கள், அல்லது துறைகள் போல் அல்லாமல் தமிழ் இணையத்தில் அதன் மைய வேகத்துக்கு ஈடுகொடுத்து முன்னேறி வந்துருக்கிறது. அந்த வகையில் இந்தப் பொருளுணர் வலைக்கு எப்படித் தமிழ் வளர்ச்சி பெறவேண்டும் என்று தமிழ் ஆர்வலர்கள் சிந்திக்கத் தொடங்க வேண்டும். அந்த நோக்கத்துடன், மிக மேலோட்டமான அலசலாக இந்தப் பதிவு அமையும்.

உலகளாவிய வலையின் முதல் கட்டத்தில் நாம் வ்லைப்பக்கங்கள் சென்று செய்திகளைப் படித்தோம். மின்னஞ்சல்களை பயன்படுத்தத் தொடங்கினோம். தமிழ் படிக்க வேண்டும் என்றால் தமிழ் எழுத்துக்களை தரவிறக்கல், நிறுவுதல் என்று சிக்கல்கள் இருந்தன. அந்தச் சிக்கல்களுக்கு எல்லாம் ஒருங்குறி ஓரளவு தீர்வாக அமைந்தது. வலை 2.0 இற்கு தமிழ் வேகமாகவே வந்தது. வலைப்பதிவுகள், விக்கி, டிவிட்டர், முகநூல் என எல்லா வலை 2.0 தொழில்நுட்பங்களும் தமிழில் பயன்படுத்த முடியும். நகர்பேசித் தொழில்நுட்பங்களில் சில தடைகள் இருந்தாலும், தமிழில் சமாளித்துக் கொள்ளலாம். இதுவெல்லாம், ஒட்டு மொத்தமாக தமிழ் ஆர்வலர்களால் சாத்தியமானவையே. (இன்றுவரைக்கு தமிழக அரசால் இவற்றுக்கு துளிப் பங்களிப்பும் கிடையாது. தமது கட்சி வலைத்தளங்களில் இருந்து, பல்கலைக்கழகங்கள், அரச திணைக்களங்கள் என எல்லாம் பெரும்பாலும் ஆங்கிலத்தில் மட்டுமே வலைத்தளங்களை வைத்திருகின்றன என்பது மட்டுமே தமிழக அரசின் கொள்கை நிலைப்பாட்டையும், செயற்திறனையும் சுட்டிநிற்கின்றன. கனடாவில் பிரெஞ்சு மாநிலத்தில் (கியூபெக்) போல், எல்லாக் கணினிகளிலும் (வணிக நிறுவனங்கள் உட்பட) பிரெஞ்சு நிறுவப்படவேண்டும் என்ற கொள்கையை தமிழகத்தில் எதிர்பார்க்க முடியாது.)

பொருளுனர் வலை (semantic web) இணையத்தில் அல்லது உலகளாவிய வலையின் அடுத்த கட்டமாக கூறப்படுகிறது. அடிப்படையில் பொருளுணர் வலை என்றால், வலையில் கிடைக்கும் தரவுகள் அல்லது தகவல்களை கணினிகள் பொருள் புரிந்துகொள்ளத்தக்கவாறு ஒழுங்குபடுத்தும் நுட்பம் ஆகும். தற்போது ஒரு வலைப்பக்கத்தில் உள்ள தரவுகள் அல்லது தகவல்கள் எந்த வகையான சீர்தரப்பட்ட கட்டமைப்புக்குள் இருப்பதில்லை. இதனால் இந்த தரவுகள் மீது கணித்தல் செய்வது சிரமானது. இந்தத் தகவல்கள் முறையான ஒரு கட்டமைப்புக்குள் வந்தால், பல்வேறு வகையான தேவைகளுக்கு, கணித்தலுக்கு அவற்றைப் பயன்படுத்த முடியும். அத்தகைய முறைமைகளையே பொருளுணர் வலை சுட்டுகிறது. உலகளாவிய வலையின் முதல் இரு கட்டங்கள் தகவலால் முதன்மை பெற்றது என்றால், அதன் அடுத்த கட்டம் தரவுகளால், அவற்றின் மீதான கணித்தலால் முதன்மை பெறும்.

சரி அவைதான் என்ன தரவுகள், அவை ஏன் முக்கியம். ஒரு நகரத்தின் பல்வேறு கூறுகள் அல்லது தொழில்பாடுகள் பற்றிய தரவுகளை எடுத்துக் கொள்வோம். நகரத்தின் நிலவரைபடம். போக்குவரத்துச் சாலைகள். பொதுப் போக்குவரத்து வசதிகள். நகரத்தில் வாழும் மக்கள்வகைப்பாடு. மிகவும் ஏழையான மக்கள் எங்கு வாழ்கிறார்கள். அவர்கள் வாழும் இடங்களில் உள்ள பாடசாலைகளின் தரம் என்ன? அரச திட்டங்கள் எங்கு, யாரால், எப்போது, எப்படி நிறைவேற்றப்படுகின்றன. எங்கு குற்றங்கள் அதிகம் நடைபெற்றுகின்றன. எங்கு ஊழல் அதிகமாக இருக்கிறது. இப்படிப் பட்ட தகவல்கள் பொதுமக்களுக்கு கிடைக்குமாயின் அவர்களின் முடிவொடுக்கும் ஆற்றலை, அல்லது அவர்கள் முடிவுகளின் தரத்தை பல மடங்கு அதிகரிக்கும். ஐக்கிய அமெரிக்கா, கனடா, ஐரோப்பா போன்ற நாடுகளில் இந்தத் தரவுகள் பொதுவில், திறந்த முறையில் தற்போது கிடைக்கத் தொடங்கி இருக்கின்றன. அந்த நாட்டு அரசுகளின் கொள்கையாக இது நடக்கிறது. எ.கா toronto.ca/open, toronto.ca/wellbeing/. நகரங்கள் மட்டும் அல்ல, ஊர்களுக்கு இதே தேவை இருக்கிறது.

மாணவர்களுக்கு தரவுகளும், கணிக்கும் கருவிகளும் முக்கியம் ஆகும். எ.கா www.wolframalpha.com என்ற தேடல் அல்லது கணித்தல் கருவி பல்வேறு கேள்விகளுக்கு பதில் சொல்லும் திறமை கொண்டது. www.gapminder.org, google.com/publicdata, linkeddata.org எனப் பலரும் தரவுகளை ஆழத் தோண்டத் தொடங்கி இருக்கிறார்கள். தரவுகளைக் கணித்தலும் காட்சிப்படுத்தலும் நாமும், நமது கணினிகளும் தொழிற்படும் முறையை புரட்சிகரமாக மாற்றிவருகின்றன.

நாம் தரவுகள் என்ற அடுத்த கட்டத்தை நோக்கும் முன், தற்போது இணையத்தில் தமிழ் உள்ளடக்கம் என்பது இன்னும் பல போதாமைகளைக் கொண்டது என்பதை ஏற்றுக் கொள்ள வேண்டும். மதுரைத் திட்டம், நூலகத் திட்டம், விக்கியூடகத் திட்டங்கள், தமிழ் இணையக் கல்விக்கழகம் போன்று சில நல்ல திட்டங்கள் இருந்தாலும் இவை சிறு துளியே. தமிழின் அறிவியல், வாழ்வியல், மருத்துவ மற்றும் பிற கலைக்களஞ்சியங்கள் இணையத்துக்கு வரவேண்டும். நாட்டுடமை நூல்கள் இணையத்துக்கு வர வேண்டும். எமது கலைகள், தொழில்கள், வாய்மொழி அறிவு பல்லூடக முறையில் ஆவணப்படுத்தப் பட வேண்டும். இவற்றை நாம் விரைந்து செய்தல் மூலமே மிக வேகமாக உருவாகி வரும் அறிவுச் சமூகத்தில் பங்கு கொள்ள முடியும்.

தரவு என்பது எண்தானே, அதில் எப்படி தமிழ் வர முடியும் என்று எண்ணக் கூடும். ஆனால் நாடுகள் பெயர்கள், அளவீடுகள் பெயர்கள் போன்றவை தமிழில் அமைவதில்லை. அவற்றைத் தமிழ்ப் படுத்த வேண்டும். (கூகிள் தனது மொழிபெயர்ப்புக் கருவியில் தமிழ் விக்கிப்பீடியாவில் இருந்து எடுத்த தரவுகளின் ஒரு பகுதி இந்த வகையானவை.) இது ஒரு வகை தன்மொழியாக்கமே. அடுத்தது தரவுகளைக் கையாளும் முக்கிய கருவிகளில் தமிழ் இடைமுகங்களை உருவாக்க வேண்டும். இது தமிழில் தரவுகளை உருவாக்க ஒரு வழி.

அடுத்தது தமிழ், தமிழர் பற்றிய தரவுகளை நாமே உருவாக்க அல்லது தொகுக்க வேண்டி இருக்கிறது. தரவுகள் பற்றி தமிழ் ஆர்வ அமைப்புகள் ஒரு பொது உடன்பாட்டுக்கு வரவேண்டிய தேவை இருக்கிறது. தமிழ் நூல்கள், தமிழ்த் திரைப்படங்கள், தமிழ் இதழ்கள், தமிழ்க் கலைகள், தமிழ் மக்கள்வகைப்பாடு, ஊடகங்கள், அமைப்புகள் ஆகியவற்றைப் பற்றிய தரவுகளை எந்த முறைமையின் கீழ் சேர்க்கப் போகிறோம். எப்படிப் கூட்டாக உருவாக்கிப் பகிரப் போகிறோம் என்பது எமக்கு முன் உள்ள ஒரு முக்கிய பணி ஆகும்.

ஈழம், தமிழகம், மலேசியா எங்கும் ஆங்கிலம் திறமையாகத் தெரிந்த அந்த 20-40% விட்டுவிடுவோம். மற்றவர்களுக்காக, எமது தற்சார்பு மிக்க அறிவுக்காக, எமது சமூக உரையாடல்களுக்காக தமிழில் தரவுகளை உருவாக்குவது எமது பணியாகிறது.

தமிழில் பல்லூடக ஆவணப்படுத்தல்

தமிழின், தமிழரின், பிறரின் வரலாற்றை, கலைகளை, நுட்பங்களை, அறிவியலை எண்மிய பல்லூடக முறையில் தமிழில் ஆவணப்படுத்திப் பகிர்வது தமிழ்ச் சமூக வளர்ச்சிக்குத் தேவையான முக்கிய செயற்பாடுகளில் ஒன்று. சங்க காலம், சோழ-பாண்டிய பேரசுக் காலங்களை நோக்குகையில் தமிழர்கள் பல் துறைகளில் உயர்ந்த அறிவைப் பெற்றிருந்ததை அறிய முடிகிறது. உலக நாகரிகங்களில் ஒரு முக்கிய ஊற்று தமிழர்களுடையது. ஆனால் தமிழர்கள் வெல்லப்பட்டு அடக்கி வைக்கப்பட்டபோது நாம் எமது அறிவை இழந்தோம். எமது ஆவணப்படுத்தலின், பாதுகாத்தலின் போதாமைகளும் எமது அறிவை நாம் இழக்கக் காரணமாயின. இதனால் நாம் பண்பாட்டு, அரசியல், பொருளாதார முனைகளில் பல பாதிப்புக்களைச் சந்தித்தோம்.

எனினும் பிற பல மொழிகள் போல் அல்லாமல் தமிழுக்கு தொன்று தொட்டே எழுதப்பட்ட இலக்கியங்கள் உண்டு. கல்வெட்டுக்கள், சிலைகள், கட்டிடங்கள், தொல்பொருட்கள் ஆகியவை தமிழர் அறிவியலைச் அறிய உதவும் சான்றுகளாக உள்ளன. வாய் மொழி இலக்கியம், கலைகள், தொழில்கள் தமிழிர் அறிவின் வாழும் ஆதாராங்களாக உள்ளன. இன்று இந்த அறிவு எண்மிய பல்லூடக முறையில் ஆவணப் படுத்தப்படுவது ஒரு முக்கிய தேவையாக உள்ளது.

19 ம் நூற்றாண்டில் ஏட்டில் இருந்தல் தமிழ் இலக்கியங்கள் அச்சுப் பதிக்கப் பட்டமை தமிழரின் மறுமலர்ச்சிக்கு ஒரு வளமாக அமைந்தது. 20 ம் நூற்றாண்டில் பலர் மேற்கொண்ட நாட்டாரியல் ஆய்வுகள் எமது பழமொழிகளை, பாடல்களை, வழக்கங்களை, இன்னும் பல கூறுகளைப் பதிவு செய்து தமிழ்ச் சமூகத்தின் உயர்நாடி ஒன்றைப் பாதுக்காத்தது. ஆனால் இதே போன்ற செயற்பாடுகள் தமிழர் தொழில்நுட்பங்கள், அறிவியல் நோக்கிச் செயற்படுத்தப்படவில்லை. இன்று எமது சூழல், அது சார்ந்த உற்பத்திகள் பற்றி நாம் கொண்டிருந்த இயல்பான அறிவை இழந்து நிற்கிறோம். மீண்டும் மேற்குநாடுகள் வழியே இயற்கை வேளாண்மை, பேண்தகு மீன்பிடிப்பு, மர வேலை, கட்டிடக்கலை போன்ற அறிவுகளை அறிய தள்ளப்பட்டிருக்கிறோம். இனியும் காலம் தாழ்த்தாமல் நாம் எமது அறிவை அவணப் படுத்தல் அவசியமாகும்.

எமது அறிவு மட்டும் அல்லாமல் வேகாமாக மாறும் உலகின் பல்துறை அறிவும் தமிழில் உருவாக்கப்பட வேண்டும். உலகில் பரந்து வாழும் தமிழர்கள் அந்த அந்த நாட்டு புவியியல், பண்பாடு, கலைகள், இலக்கியங்கள் பற்றி மட்டும் அல்லாமல், அங்கு உள்ள சமூக அமைப்புகள், சட்டங்கள், தொழில்நுட்பங்கள் பற்றிய அறிவையும் பகிர வேண்டும். இது எமக்கு இன்று இருக்கும் ஒரு அரிய வாய்ப்பு.

இந்த அறிவுகளை நாம் இணையம் மூலம், பல்லூடக வழிகளில் ஆவணப் படுத்திப் பகிர வேண்டும். இன்று காட்சி ஊடகமே முக்கியம் பெற்று வருகிறது. பல பத்திகளில் சொல்வதை, ஒரு காட்சியில் காட்டி விட முடியும். ஒலிக் கோப்பு (audio), நிகழ்படம் (video), இயங்குபடம் (animation), நிகழ்த்தல் (ppt), படங்கள் (images), தரவுகள் (data), எழுத்து (text) என எண்மிய பல்லூடக முறையில் நாம் ஆவணப் படுத்தி, எளிய முறையில் பகிர வேண்டும்.

இந்த கூட்டறிவு ஆவணப் படுத்தலை, உற்பத்தியை நாம் கூட்டாக, பரவலான முறையில், சேர்ந்தியங்க உதவும் நுட்பங்களைப் பயன்படுத்திச் செய்யலாம். எமது விளைச்சல்களை கூட்டாக உரிமைப் படுத்தி அனைவரும் பயன் பெறலாம்.

இந்த செயற்பாடுகளில் தமிழ் விக்கியூடகங்கள், மதுரைத் திட்டம், நூலகத் திட்டம், தமிழ் மரபு அறக்கட்டளை போன்ற பலர் செயற்படுகிறார்கள். இவற்றில் பல நிறைகளும் குறைகளும் உள்ளன. இவற்றை மேம்படுத்தி, மேலும் பல களங்களை அமைக்க வேண்டியது எமது இன்றைய தேவையாகிறது.